Хол селәдт эмчнр бас одх

Хальмг Таңһчин Толһач Хаска Батун седвәрәр хойр җил дарандан «Эрүл-менд бәәтн» гидг керг-үүлдвр давулгдҗана. Давсн җилд эмчнр таңһчин селәдәр йовад, бәәрн улсин эрүл-менд шинҗләд, 3 миңһн һар күүнд дөңгән күргв. Эмчнрт бийән үзүлсн улсас 130 күн немр шинҗллт келһнд йовулгдв, 27 күүнд месллһ болн 193 күүкд күн маммографь кев. Гемтә-шалтгта улст эмчнр онц оньг тусхаһад, 17 күүнд гертнь одад эрүл-мендин бәәдлинь хәләһәд, эмнлһнә туст сүв-селвг өгв. Давсн җилд бүрдәгдсн керг-үүлдврин ашар терүг эн җил дәкәд давулҗ хол селәдт бәәдг әмтнд эрк биш күрч кергтә шинҗллт кех шиидвр батлгдсмн.

Эн җил «Эрүл-менд бәәтн» гидг керг-үүлдврин түрүн девсң лу сарин 12-т Үстин района Цаһан Амн болн Эрдниевский селәдт, Целинн района Троицкое селәнд эклв. Терүнә хөөн эмчнрин багмуд Баһ Дөрвдә района Тундутово болн Баһ Дөрвд, Городовиковск района Чапаевское, Виноградное селәдт болн Городовиковск балһснд, Яшалтан района Красномихайловское болн Яшалта селәдт одв. Өцклдүр Приютна района Үлдчн болн Приютное селәдин бәәрн улс эмчнрт бийән үзүлҗ, кергтә шинҗллт кев.
Хальмг Таңһчин эрүл-менд харлһна министрин үүл дааҗадг Булат Сараевин келсәр, эн керг-үүлдвр эклснәс авн миңһн һар күн эмчд бийән үзүлв. «Селәнәхн эн кергт шунмһаһар орлцҗана. Эн керг-үүлдвр эрк биш кергтә, юңгад гихлә олн зүсн гем цаглань илдкгдҗ, цааранднь гүн шинҗллт кеҗ эмнлһиг эклхд туслна. Тиигәд, миңһн күүнәс 100 күүнд түрүн болҗ ямр нег гем илдкгдв. Эдн таңһчин эмнлһст цааранднь гүн шинҗллт кеһәд, эмнлһ авхмн. «Эрүл-менд бәәтн» гидг керг-үүлдвр моһа сарин 19 күртл болхмн. Болв бидн терүгәрн көдлмшән төгсәҗәхшвидн. Ноха сард эн керг-үүлдврин хойрдгч девсң болхмн, мана эмчнр таңһчин хол селәдт эрк биш күрх. Түрүн девсңгин медлд эс одсн селәдт эмчнр зуни кемд болх керг-үүлдврин йовудт одад, бәәрн улст дөңгән күргхмн. Шинҗллт келһнд райодын эмнлһст бәәдг кергсл олзлгдҗана. Кемр кергтә кергсл уга болхла мобильн комплексмуд олзлгдҗ, селәдәр йовхмн. Райодын эмнлһст ямр нег мергҗлт уга болхла, таңһчин эмнлһсин эмчнр эн кергт орлцҗана. Эмчнрин багмуд нурһлҗ района эмнлһнә көдләчнрәс бүрдәгднә», - гиҗ Булат Амангельдыевич келв.
«Земск эмч/фельдшер» гидг көтлвр мана таңһчд күцәмҗтәһәр бәәдл-җирһлд тохрагдҗахин тускар Булат Сараев темдглв. Тиигәд, сүл тавн җилин эргцд эн көтлвриг бидн 100 процентд күцәһәд, Әрәсән эрүл-менд харлһна министерствин дөң-тусар немр орм йилһҗ өглһнә төр хаһлвидн. Эн көтлврин медлд 545 күн таңһчин селәдин эмнлһст эмчәр болн фельдшерар көдлҗәнә. Таңһчин һардвр эрүл-менд харлһна көдләчнрәр тетклһнә төрт ик оньг өгчәнә. Тиигәд,таңһчин һардврин седвәрәр ординатурт сурчадг баһчуд нааран ирҗ дамшлт хоршаҗ чадҗана. Ода Әрәсән медицинск ик сурһульд сурчадг 5 күн күч-көлснә бооца батлад, таңһчин эмнлһст көдлҗәнә.

ДАВАН Наталья