Таңһчин оютнр марһлдҗана

Элстд көдлмшч кесг эрдмәр эклсн таңһчин «Профессионалмуд» гидг марһанд хальмг вузин колледжин оютнр шунмһаһар орлцҗана.
Кесг эрдмәр авсн медрлән, эв-дован баһчуд марһанд үзүлх зөвтә. Хальмг Таңһчин чемпионат лу сарин 24-әс авн 28 күртл болҗана. Энүг бүрдәлһнд Хальмг ик сурһулин кесг эрдмд дасхдг колледжин багшнр болн оютнр шунмһаһар орлцҗана. Җил болһн эдн тиим дааврта кергиг күцәҗәнә.
Шин 2025 җилин марһана төлә эдн 6 талвң белдв, тер тоод ветеринарийин, күч-көлс харлһна, түүмрәс саглуллһна болн теднлә хамдан чидлән сөрх 14-тә уйн настнрин төлә веб-технологийин, вожатнрин үүлдврин, арһлачнрин әңгүд бүрдәв.
Марһана керг-үүлдвр Хальмг ик сурһулин бәәрнд болсн деерән региона мал өсклһнә номин-үүлдврин төвин, түүмр унтрадг әңгин ул деер чигн болхмн. Хальмг вузин колледжәс нань таңһчин талдан СПО-н бүрдәцсин оютнр эн талвңгудт эв-дован сөрх.
- Эднә медрлинь, эрдмд кергтә эв-арһан яһҗ дасч авсна тускар шинҗләчнр үнлх, эдн ик дамшлт хоршасн мергҗлтнр болҗана, - гиҗ маднд хальмг вузин СПО-н колледжин багш, дааврта бүрдәһәч болн һоллгч шинҗләч Вера Амыкова келв.
Тер тоод күч-көлс харлһна талвңд таңһчин күч-көлснә шаңһа инспекцин һардачин дарук Матвенә Савр оютнрин күцәсн үүлдвринь йилһҗ үнлҗәнә. Ветеринарийин әңгд шинҗләч болҗ Конин Очр үүлдҗәнә, малын гемлә гетллһнә Элстин станцд эн көдлҗәнә. Түүмр унтраһачнрин эв-довинь МЧС-ин таңһчин заллтын әңгин һардач, капитан Бадмин Арслң үнлҗәнә, гиҗ Вера Нахаевна цәәлһв.
Кен ямаран талвңд дөрлдхиг хальмг вузин СПО-н колледжин оютнрас йилһәд авчксн бәәнә. Эднәс зәрмнь урдк марһаст орлцла, наадкснь түрүн болҗ чидлән сөрх. Эдниг колледжин шинҗләчнр Адҗгән Данара, Нимән Гилән, дамшлтта талдан багшнр белдҗ цәәлһвр өгнә. Урдк марһаст чигн эдн оютнртан нәрн кесг тоотыг медүлҗәлә. Болв җил болһн оютнрт тәвдг неквр сольгдад бәәнә, тегәд шинҗләчнрин дөң кезә чигн керглгднә.
Хальмг ик сурһулин колледжин оютнрас волонтермудын штаб тогтагдсн бәәнә, эдн марһан болҗадг өдрмүдт кесг талвңгудт көдлв, тедниг кергтә кергсләр болн нань чигн тоотар теткв, бүрдәмҗин көдлмшт орлцв.
- Сурһульмудт багшнр бас шинҗләчнр болҗ үүлдҗ, марһанд арвтнриг белднә. Тер тоод арһлачнрин үүлдврин тускар келҗ өгнә, тер төр арвтнрин төлә амр биш, тиим болв чигн эдн багшнрин дөңгәр төсвән белдҗ дааврта марһанд орлцна. Эн кергт эднд сурһуль-эрдмин болн номин министерствин бүрдәцсин методистнр дөң болна, эдн бас шинҗләчнр болҗ үүлднә,- гиҗ министерствин әңгин һардач Увшин Зоя келнә.
Нег үлү сурһульчнр веб-технологийин марһанд дуран өгч орлцна, энд программированя медрл кергтә, компьютер олзлҗ көдлдгән чигн арвтнр үзүлнә. Бичкдүдиг сурһмҗлхар седҗәдг ах классмудын сурһульчнр вожатнрин талвңд чидлән сөрх, гиҗ Зоя Петровна цәәлһв.
- Җил болһн мана политехникин колледж марһанд сән күцәмҗ бәрнә. Эн саамд 10 эрдмәр таңһчин кесг талвңд болх дөрлдәнд диилвр бәрхин төлә мана оютнр эв-арһан сөрҗ үзв, - гиҗ СПО-н бүрдәцин һардачин дарук Бембән Екатерина келв. - Мана колледжин талвңд тер мет веб-технологийин, социальн көдлмшин болн ке хувцна зүсәр оютнр дөрлдв. Нүүрлгч орм эзлхин төлә Анастасия Гермашева, Санҗин Делгр («Ке хувцна технологий» гидг әңгд), Бадмин Игорь («Веб-технологий»), Цеднә Мазн («Виртуальн ил бәәдл»), Бодров Илья, Савченко Никита («Зәңгллһнә туст әәмшг уга бәәдл»), Цевгә Ульян («Кузовин ясвр»), Михаил Жердев («Күч-көлс харлһн»), Акугинә Юрий («Гиигн машидин ясвр»), Багандов Курбан («Һаңнлһна технологий»), Мария Гольдинова, Зарина Хакимова («Социальн көдлмш»), Роман Бербенцев, Кирилл Миткеев («Түүмрәс сагллһн») чидлән сөрв,- гиҗ Екатерина Михайловна цәәлһв.
Тиим кевәр «Профессионалмуд» марһанд цуг колледжин оютнр дигтә-даратаһар белдҗ нүүрлгч ормсин төлә дөрлдҗәнә. Эдн марһанд эврә мергҗлтән, хоршасн дамшлтан үзүлҗ үүлдх зөвтә. Ода эдн үүдәлтин кесг эв-арһ олзлҗ, багшин заавр мартлго дааврта марһанд орлцҗана.
ТҮРВӘН Һуна