Хальмг дәәчнрт нөкд болна

Хальмг ик сурһульд төрскнч седклтә баһчуд баһ биш, эдн эврә дацңгудтан СВО-д орлцҗах хальмг дәәчнрт гуманитарн дөңгән күргнә, концертмүдт билг-эрдмән үзүлҗ мөңг олна. Дәкәд тер мөңгәр Донбасст болҗах цергә керг-үүлдврт орлцҗах таңһчин цергчнрт кергтә техникиг, нань чигн үнтә тоотыг хулдҗ авна, тедн дунд волонтермуд бас баһ биш. Үлгүрнь, одахн хальмг вузин оютнр Саңһҗин Бата болн Бадм-Һәрән Басң «Фронтд дөңгән күргснә төлә» гидг II девсңгин медаляр ачлгдла.

- Тернь көвүдин ач-тусинь медүлҗәдг өөдән ачлвр болҗана. Эдн цергә шишлң керг-үүлдвр эклснәс нааран төрскнч болн буйнч седклән үзүләд, СВО-д орлцҗах дәәчнрт дөңгән күргҗәнә, гуманитарн дөң тархана, юмнас әәлго талдан чигн даалһвриг күцәнә. Энтн залу-зөргин болн буйнч седклин үлгүр болҗана, таднар бахмҗ кеҗәнәвидн! – гиҗ зөргтә оютнрин тускар вузин һардач Салан Бадм келнә.
Саңһҗин Бата инженерин-технологин дацңгин 4-ч курст сурна. Кесг җилдән волонтер болҗ үүлдҗәнә. Кесг дәкҗ Әрәсән шин регионмудт болн дәәлдән болҗах Курск мүҗд һарч йовҗала. Түүнлә хамдан әәмшг угаһар үүлдҗәх волонтер Бадм-Һәрән Басң эмнлһнә дацңгин 3-ч курсин оютн болҗана. Дәәлдән болҗах һазрт эмндг ах болҗ көдлнә, шав авсн дәәчнрт дөңгән күргнә.
- Хальмг ик сурһулин оютнрин күцәҗәх керг мана Элстин политехникин колледжин төлә бас сән үлгүр болна. Мана оютнр-волонтермуд «За наших-08!» гидг саңгин һардач Елена Барсуковала болн түүнә бүрдәцлә нөкцлтҗ гуманитарн дөң цуглулна, цергчнриг дронмудас харсдг кергтә гөлм өлгдг кергт бас шунмһаһар орлцна, – гиҗ колледжин һардачин дарук Жанна Сильнеева келҗ өгв.
Тер мет эднә оютнр «Улсин фронт» олна бүрдәцлә нөкцлтҗ даалһвр күцәҗәнә. Эднә МЧС-ин әм аврдг оютнрин баг бас гуманитарн дөң күрглһнд, волонтермудын үүлдврт орлцҗ дааврта керг күцәхд кезә чигн белн бәәнә.
Тиим кевәр Хальмг ик сурһулин оютнр таңһчин цуг баһчудт сән үлгүр үзүлҗәнә, эднә зөргтә үүлдвр көвүд-күүкдт омг өгч улм өргнәр дөң күрглһнә болн волонтерин дааврта болн зәрмдән нам әәмшгтә көдлмшт орлцх төрскнч седкл зүүлһҗәнә.
ТҮРВӘН Һуна