Әрәсән йилһән сән ик сурһулин тоод орв

Хальмг ик сурһулин номтнр Әрәсән вузмудын «Приоритет-2030» төсвд орлһна марһанд диилвр бәрв.

Давсн үлмҗ өдрлә, моһа сарин 19-д, Элстд «Хальмг Таңһч» РИА-н барин төвд брифинг болв. Хальмг ик сурһулин номтнр Әрәсән вузмудыг дөңндг «Приоритет-2030» көтлврт орад, түүнә өмн болсн чинвртә марһанд диилвр бәрснә ончта йовдлд эн нерәдгдв. Күүндврт Хальмг ик сурһулин һардач Салан Бадм, түүнә дарук Бадмин Кермн, таңһчин селәнә эдл-ахун министрин үүл дааҗадг Гаван Тимур орлцҗ, тер йовдлын тускар тодрхаһар келҗ өгв.
- 2025 җиләс авн «Приоритет-2030» көтлврин һол күслнь шин эв-арһсин халхар орн-нутгиг нүүрлгч ормд һарһлһн мөн. Тегәд Хальмг ик сурһулиг 2036 җил күртл делгрүллһнә көтлвр үүдәләвидн. Хальмг номтнрин шинҗллтәр ул кеҗ мана таңһчд болн орн-нутгт АПК-н халхар шин эв-арһс өргҗүллһнә төр тәвҗәнәвидн.
Тер төриг бидн «Дамате» компаньла болн селәнә эдл-ахун министерствлә хамдан күцәҗәнәвидн. Махна мал өсклһнә салврар нарт-делкән кемҗәнә агросервисин төвиг тогталһна төсвиг бидн ода экләд тохраҗанавидн, – гиҗ Бадм Катинович келв.
Төсвиг харслһна кемд дөңгән күргсн таңһчин Толһач Хаска Батуд, Залврин Ахлач Босхмҗин Гиләнд селәнә эдл-ахун министрин үүл дааҗах Гаван Тимурт болн «Дамате» компаня элч Андрей Ерохинд Салан Бадм ханлтан өргв.
- Әрәсән вузмудын «Приоритет-2030» төсвд, Әрәсән сән гисн 100 ик сурһулин тоод орснь цугтаднь ик байр үүдәв. Тиим кевәр Әрәсән залврин шиидврәр Хальмг ик сурһульд мал өсклһнә болн нань чигн салврар шинҗллт кехин, шин эв-арһс үүдәхин төлә 100 сай арслң һарһгдҗана, - гиҗ селәнә эдл-ахун министрин үүл дааҗадг Гаван Тимур зәңглв.
АПК делгрүллһнә хальмг вузин төвин нилчәр ода бат чинәтә төл авгдҗана, тиим кевәр көдлмшин чинрән өөдлүлҗәнәвидн. Малын идгин аһу ода кемҗәлгдсн бәәнә, тиим таалд махна мал өсклһн кесг төр хаһлхд дөң болх гиҗ министрин үүл дааһач темдглв.
Мадниг Әрәсән селәнә эдл-ахун Министерств дөңнҗәнә. Эдл-уушар тетклһнә орн-нутгин көтлвриг күцәхин төлә хальмг вузин шинҗллт ик нилчән күргх гиҗ министерствин мергҗлтнр тоолҗана. Таңһчин фермермүд болн эдл-ахус хальмг вузин АПК-н төвин дөңгәр эдл-ууш һарһлһна кемҗәһән икдүлҗәнә. Тиим кевәр хальмг вузла болн орн-нутгин нүүрлгч компаньла хамдан бидн шин эв-арһин нүүрләчнрин хамцул тогтаҗанавидн, гиҗ Тимур Сергеевич заав.
- Ода ик сурһуль болһн, тер тоод Хальмг ик сурһуль цуг орн-нутгин төриг күцәлһнд орцлҗ дөңгән күргхәр шунҗана, - гиҗ вузин һардачин дарук Бадмин Кермн келв. – Сүл нәәмн җилин эргцд бидн селәнә эдл-ахун, экологин, генетикин болн селекцин, чинртә нань чигн салврин төсвиг күцәҗ, шаңһа көтлвр күцәлһнд шунмһаһар орлцҗанавидн. Тер олн халхин шинҗллтиг өдгә цагин кемҗәнд күцәҗәх Хальмг ик сурһулин номтнрт ханлтан өргх кергтә, – гиҗ Кермн Евгеньевна келв.
Ода Хальмг Таңһчин эдл-уушиг Әрәсән йисн регионд хулдҗ авчана, һазадын орн-нутгудла эн туст нөкцлт делгрәд бәәх гиҗ нәәлҗәнәвидн.

ТҮРВӘН Һуна