Селәнә улсин эрүл-мендин бәәдл шинҗлв

Хальмг Таңһчин Толһач Хаска Батун седвәрәр бүрдәгдсн «Эрүл-менд бәәтн» гидг керг-үүлдврин түрүн девсң төгсв. Лу сарин 12-ас авн моһа сарин 19 күртл эмчнрин багмуд таңһчин селәдәр йовад, бәәрн әмтнә эрүл-менд шинҗлв.

Олн зүсн гемәс саглхин, ямр нег гемиг эртәр илдкҗ, эмнлһ эклхин болн эмнлһнә туст сүв-селвг өгхин төлә эмчнр хол селәдт күрәд, шинҗллт кев. Эн керг-үүлдврин йовудт ут тоодан 3976 күн эмчнрт бийән үзүлв. Цергә шишлң керг-үүлдврт орлцҗадг нег һазра улст онц оньг өггдв, тегәд эн кергин йовудт 17 күн эрүл-мендин бәәдлән шинҗлҗ, эмнлһнә туст мергҗлтнрин сүв-селвг авв. Эмчнрт ирсн улсас 137 күн эрүл-мендин бәәдлин гүн шинҗллт кеҗ, П.Жемчуевин нертә таңһчин эмнлһнә әңгүдт чинртә эмнлһ авх болв. Тиигәд, СВО-д орлцҗадг хойр күн таңһчин эмнлһнә эндокринологическ әңгд болн дәәнә ветеранмудын госпитальд эмнүлгдхмн гиҗ шиидгдв. Хуучта, олн зүсн гемтә 496 күүнд эмнлһнә туст эмчнрин сүв-селвг өггдв. Хол селәдт мобильн флюорограф, маммограф, УЗИ болн ЭКГ шинҗллтс кегдв, тегәд әмтн дор ормдан цуг халхин туслмҗ авч чадв.
«Эрүл-менд бәәтн» гидг керг-үүлдврин хойрдгч девсң эн җилин ноха-һаха сармудт болхмн гиҗ зуралгдҗана. Терүнә йовудт таңһчин райодын талдан селәдин әмтн эмчнрт бийән үзүлҗ чадхмн.
- Таңһчин әмтн эн керг-үүлдврт шунмһаһар орлцҗ, мергҗлтнрин хәләврт орлцснд ик ханлтан өргҗәнәв. «Эрүл-менд бәәтн» гидг керг-үүлдвр хол селәдт бәәдг әмтнд эмчнрт бийән үзүләд, шинҗллт кеһәд, эмнлһнә туст селвг авх арһ өгнә. Керг-үүлдврин хойрдгч девсңд урднь күрәд уга селәдин, эмчнрин хәләврт орхин төлә цуг таал тогтахвидн. Цаглань болн эртәр илдкҗ авсн гемиг арднь орҗ эдгәһәд, эрүл-менд бәәҗ болхмн, - гиҗ таңһчин эрүл-менд харлһна министрин үүл дааҗадг Саран Булат келв.
ДООҖАН Наталья