Эврә келән сәәнәр меддгнь диилвр бәрв

Одахн Элстд 2025 җилин хальмг келнә таңһчин марһан давв. Түүнә дииләчнрин болн призермудын тоод Элстин болн райодын, селәдин сурһульчнр орв.

Селәдт бәәдг өрк-бүлмүдт кесгнь төрскн келәр күүнднә, өвкнрин келән болн сойлан күндлнә, өвкнрин үлдәсн зөөриг сәәнәр дасч авхар седнә. Тиим селәд мана таңһчд баһ биш, теднәс үлгүр авх кергтә. Элстин 21-ч тойгта сурһулин 11-ч класст зурчадг Дорҗин Ноһан хальмг келәр болсн марһанд түрүн орм эзлҗ, дииләч болв.
– Ноһан мана сурһульд хойр җил хооран Яшкулин района Чилгр селәнәс ирлә, тер цагас нааран марһаст тасрхан угаһар орлцҗ эрк биш дииләч эс гиҗ призер болҗ, мана 21-ч тойгта сурһулин нер дуудулад йовна, – гиҗ Әрәсән сурһуль-эрдмин ачта көдләч, Хальмг Таңһчин мөрән лауреат хальмг келнә багш, Санҗин Людмила келнә.
Энүнә келсәр, Ноһан дегц хальмг келнә болн утх-зокъялын марһанд җил болһн орлцна. Марһана даалһврнь сурһулин көтлврлә залһлдата. Ноһана өрк-бүлд цугтан хальмгар келнә, тернь күцәмҗин нуувчнь болҗана.
Ноһан давсн җилд хальмг келнә марһанд дииләч болад бас түрүн орм эзллә. Хальмг утх-зокъялар Элст балһсна марһанд түрүн орм эзллә, таңһчин марһанд болхла һурвдгч призер болв. Тиим төрскн келән сәәнәр меддг арвтнр 21-ч тойгта сурһульд сурна. Келнә марһанд Элстин 15-ч тойгта сурһулин элч Акан Делгр хойрдгч орм эзлв, Көтчнрә района Тугтн селәнә сурһулин билгтә элч Нарман Савр һурвдгчнь болв.
Хальмг утх-зокъялын марһанд дииләчнь Октябрьск района Цаһан Нур селәнә сурһульч Болдра Ирина болв, Хальмг келн-улсин гимназин элч Дорҗин Алдр болн бас эн гимназин 11-ч классин сурһульч Какишә Санл хойрдгч ормд һарв. 21-ч тойгта сурһулин элч Дорҗин Ноһан һурвдгч орм эзлв.
Хальмг улсин «Җаңһриг» дуулдг уйн наста билгтнрин марһанд 8-11-ч классмудын сурһульчнр эв-дован сөрв. Целинн района Троицкое селәнә гимназин элч Ностан Чиңһс дииләчин өөдән нер зүүв, Хальмг келн-улсин гимназин сурһульч Баттөмрин Нарн хойрдгч ормд һарв. Бас нег хойрдгч ормиг Элстин техникин лицейин җаңһрч Болдра Айс эзлв. Элстин 17-ч тойгта сурһулин келмрч Шатлан Цедн һурвдгч ормд һарв. Тиим кевәр уйн настнр дунд марһан чинвртә болв гиҗ келх кергтә.
Төрскн һазрин тууҗиг болн сойлыг меддг сурһульчнр дунд болсн марһанд жюрин шиидврәр түрүн хойр орм кенд чигн өггдсн уга. Яшкуль селәнә дунд сурһулин шинҗләч Хулхачин Мөңк һурвдгч ормд һарв. Элстин 12-ч тойгта сурһулин элч Чудан Алина дөрвдгчнь болв. «Алина кезә чигн түрүн орм эзлҗ йовла. Болв эн җил невчк ард хоцрад бәәв, даалһврнь чигн амр биш билә», - гиҗ хальмг келнә багшнь Босхмҗин Антонина цәәлһв.
Тод бичгән чигн сурһульчнр дасна. Тер амр биш бичмрин марһанд Элстин олн салврта гимназин билгт Хатан Бата түрүн орм эзлв. «Бата социальн-экономикин салврин 1-ч класст орна. Эклц сурһуляс авн олн тоотар соньмсна, эсвин, англь келнә болн тууҗин балһсна марһаст дииләчин нер зүүлә. Тавдгч классас авн тод бичгәр соньмсна. Эн җил болн 2023 җилд тод бичгин марһанд түрүн орм эзллә. Тер ик күцәмҗлә Батаг йөрәҗәнәвидн», - гиҗ хальмг келнә багшнь болн сурһмҗин халхар ЭМГ-н һардачин дарук Чокан Зоя келнә. Баһ Дөрвд селәнә гимназин элч Милена Катина хойрдгч ормд һарв.
Эн марһанд тер мет таңһчин колледжмүдин оютнр бас орлцв, тиим керг мана баһчудын төрскн келнә медрлинь ясрулҗ төрскнч сурһмҗ өгнә. Элстин политехникин колледжин оютн Нонин Владимир түрүн орм эзлв. «Ик Буурла района Орһахн селәнә сурһулиг Владимир төгсәсмн. Гертән эдн хальмгар күүнднә. Тер медрлинь оньгтан авад, мана колледжин хальмг келнә багш Һасандан Диана билгтә көвүг марһанд белдв. Владимир колледжд программированя халхар сурчана. Билгтә мана оютн улм өөдән күцәмҗ бәртхә!» - гиҗ колледжин һардачин дарук Жанна Сильнеева келв. Хальмг әңгин социальн технологийин РГУ-н оютн Дорҗин Цаһан хойрдгч орм эзлв, Лаганя политехникумин оютн Манҗин Михаил һурвдгчнь болв.
Марһанд орлцачнрт бидн хөв-кишг болн күцәмҗ дурдҗанавидн, төрскн келән дасч өвкнрин зөөриг цааранднь өргҗүләд бәәтн гиҗ йөрәҗәнәвидн.
ТҮРВӘН Һуна