Моңһл - Әрәсә: иньгллтин хаалһар

Алдр Диилврин 80 җилин өөнд нерәдәд, нарт-делкән кемҗәтә нег төсв эклсмн. Тернь машиһәр кесг һазр эргҗ йовад, олн харһлтс бүрдәх төсв болҗана. Агинск Бурятск һазрин зурачнр болн нань чигн эрдмтә улс ик эртәснь белдвр кесмн.

Мөрн сард эн бурят зурачнр, урн һарин эрдмчнр, Хальмгин һазрур һарч йовсмн. Деед Моңһлын болн Забайкальск крайин билгтнр эдниг дахҗ һарсмн.
Хаалһдан эдн кесг һазрт харһлт кесмн. Тиим нег харһлтын йовудт эднлә Бурятин, Иркутск мүҗин болн Красноярск крайин зурачнр негдәд хамдан ирсмн.
Дәәнә җилмүдт цергчнрт ик дөңгән күргсн мөрнд магтал өргҗ, эн һәәхүл бүрдәгдв. Терүнд Моңһлын, Бурятин болн Хальмгин зурачнр орлцҗана. «Салют Победа - 80» гидг нарт-делкән төсвин йовудт соньн эн керг-үүлдвр күцәгдҗәнә.
Элстд Н. Пальмовин нертә Келн-улсин музейин талвңд мөрн сарин 15-д һәәхүл көдлмшән эклв. Терүнд Моңһлын болн Әрәсән зурачнрин 60 һар көдлмш үзүлгдҗәнә. Зурлһна эрдмин олн-зүсн янзар тер үүдәврмүд зургдснь нег үлү олн хәләһәчнриг соньмсулҗана.
Арвн хонгтан машидәр йовад, зурачнр Элстд ирсмн. Будулан – Агинское - Улан-Удэ – Иркутск - Красноярск – Новосибирск - Элст хаалһар зурачнр йовв, хальмг теегин ке-сәәхн тоотыг зургудтан тодлулҗ чадв.
Зурачнр Валентина Никитина болн Марина Алексеева (Иркутск балһсн), Александр Хандаев, Баир Санжаев, Базаржап Ринчинов (Агинское поселк), Түвшин Базарагчаагийн болн Ганбат Ханшийн (Улан-Батор, Моңһл), Балта Батожаргалов болн Цымпилма Бадмаева (Будулан селән), Саяна Аюшиева (Москва балһсн), Евгений Болсобоев, Софья Суворова болн Баяисхалан Лыксыков (Улан-Удэ балһсн) эн төсвд орлцҗана.
Һәәхүлиг бүрдәснь Балта Батожаргалов болна. Төрскән харсгч Алдр дәәнд диилвр бәрәд, олн-әмтнд сулдхвр болн хөвтә җирһл делдсн баатрмудын санлыг мөңкрүлх күслтәһәр эн һәәхүл болн йовлһн зуралгдсн билә. Дәәнә күнд хаалһд ик дөң-түшг болҗ йовсн мөрдинь магтхар зурачнр эн кергән бүрдәсмн.
Балта Батожаргалов татсн седвәриг Бурятин болн Хальмгин зурачнр дөңнв.
Иигәд, мөрн сарин 15-д Н. Пальмовин нертә Келн-улсин музейд «Алдр Диилвр делдсн мөрнд нерәдсн магтал» гидг нертә хамцу керг-үүлдвр эклв.
Дарунь «Онон деер зургдх зург» гидг нарт-делкән һурвдгч пленэр болхмн. Әрәсән, Моңһлын зурачнр терүнд орлцҗана.

УШКАНА Сувсн