Сән төл авх күслтәһәр

Вчера, 15:28 | Общество, Таңһчин зәңгс, Зіњг, Селәнә эдл-аху

Малчнрин төлә үвлзлһнә кем төгсәд, төл авлһна дааврта көдлмш гүргүдән орчкв. Эн кемиг сән аштаһар давулхин төлә таңһчин фермермүд хаша-хаацан ясад, цуг тоотынь эртәснь белднә. Хавртан сән чинәтә төл авхин төлә үвлин цагт малын хотынь ясад төл авлһна кемд сән кевәр белднә.

Хальмгин селәнә эдл-ахун министерствин мал өсклһнә әңгин зәңглсәр, шидр кесн то-дигәр, таңһчин эдл-ахуст 123 654 туһл, 834 351 хурһн, 1221 унһн, 203 ботхн авгдв. Зәрм эдл-ахуст төл авлһна кем эртәр эклв. Ик цасн уга болад, үвлзлһнә кем һару угаһар давв, гиҗ темдглх кергтә. Чинән уга малыг бордад, шимтә хот өгәд, төл авлһна кемиг сән йовудтаһар күцәхәр зуралҗана.
Яшкулин района «Кировский» тохма мал өскдг эдл-ахуд төл авлһна кем яһҗ давҗахин тускар энүнә һардач Һәрән Бадм келҗ өгв. Эндр эдл-ахуд 80 шаху күн көдлнә. Тедн дунд җолачнр, малчнр, зоотехникчнр болн талдан мергҗлтнр мөн. Бадм Есиновичин келсәр, эн җилин төл авлһна кем сән йовудтаһар давҗана. Арвн негн миңһн һар хөөнәс 10 миңһн хурһн, 500 һар толһа бод малас 400 туһл, 500 яманас дигтә 500 ишк, 500 гүүнәс 400 унһн болн 300 темәнәс 30 ботхн авгдсн бәәнә.
Тер мет эдл-ахун һардачин темдглсәр, үвлзлһнә кем энд һару угаһар давв. Намрар белдсн хотнь ода чигн бәәнә. Өдгә цагт һаза дулан болад, мал өдртән теегт идшлнә.
Терүнәс нань «Кировский» эдл-ахуд мал өскчәдг деерән тәрә бас урһана. Удл уга хаврин тәрә тәрлһнә кем эклхмн, терүнд бас даавртаһар белдҗәнә. Эдл-ахун эдлврт кесг трактор, услврин көлгн болн талдан шишлң техник бәәнә. Үвлин хөөн эн ясгдад, теегт һархар белдгдв.
Хальмг Таңһчин селәнә эдл- ахун министрин үүл дааҗадг Гаван Тимур эдл-ахуст төл авлһна кем яһҗ давҗахинь бүрткчәнә. Тер мет шаңһа дем олзлад, кесг райодт бордлһна талвңгуд тосхгдҗана.
Тодлхас, одахн Элстд давсн таңһчин бәәрн залврин бүрдәцсин ик хургин йовудт мал өсклһигд болн мал бордлһиг дөңнҗ, шаңһа дем йилһҗ өглһнә төр хәләгдв. Терүнә йовудт нег һазра фермермүдәс орҗ ирсн нег миңһн һар эрлһн хәләгдв. Селәнә эдл-ахун министерствин медлд бәәдг олна хүүвин хургт болхла ирлцңгү шиидвр удл уга һарһгдх болв.
Җил болһн нег һазра мана арһлачнр бод малын 30 миңһн тонн мах эд-бод кеҗ һарһна. Орн-нутгин хулд-гүүлгәнә әәмшг уга бәәдл тогталһнд мана фермермүд ик тәвцән орулҗахинь темдглхмн. Селәнә эдл-ахуд һарһгдҗадг эдл-уушин орунь җилдән 30 җува шаху арслң тогтана. Хальмгин Толһач Хаска Батун даалһсар 2030 җил күртл эн кемҗәг 25 процентд икдүлх болҗ зуралгдҗана.
Төл авлһна кем цаарандан давҗана. Мөрн сар чилтл таңһчин эдл-ахусар энүнә ашнь диглгдхмн.

КАРСАНА Евгения
Зургт: «Кировский» тохма мал өскдг эдл-ахуд төл авлһна көдлмш давҗана

Видео