Зөргтә баатрла харһв

А. Амр-Санана нертә Келн-улсин дегтрин саңд Элстин хулд-гүүлгәнә-экономическ колледжин оютнр СВО-д орлцач Манҗин Пүрвәлә (зургт) харһв.

Цергә шишлң керг-үүлдвр эклсн цагас авн Пүрвә терүнд орлцв. Эн бичкнәсн авн цергч болхар бәәсмн. Эцкин цергә үүлдвр терүнд үлгүр болв. Эцкнь көвүнә седвәриг дөңнәд, спортд терүг орлцулҗ, цогц-махмудан чаңһалһнд туслсмн. Хол Дорд үзгин цергә училищ төгсәһәд, Пүрвә тендән церглҗәсмн, тендәсн СВО-д эн йовулгдв.
Цергчнриг поездәс буулһад, машиһәр дәәлдәнә һазрур авч ирсмн. Тенд ВСУ-н церг тедү дүңгә күчтәһәр дәәлдәнд белдәд авчкснь медгдв. ДНР-ин һазр бүклдән гишң хортна һарт бәәсиг цергчнр үзв. Дәәлдән тегәд амр биш болв. Хортн тер эзлсн һазран дегд сәәнәр батлҗ белдсн учрар тедниг эн һазрас көөҗ һарһхд ик күчллт керглгдв. Кедү күн тер өдрмүдт әмнәсн хаһцв. Тернь хортыг эндәс уга кех кергтә гисн Пүрвән шиидвринь батлв.
Хортна һарт орсн тер һазрин әмтн ямаран ик зовлңта бәәхинь цергчнр үзв. Нег герин өөр зогсчасн күүкд күүг сәәнәр тодлсан Пүрвә келв. Өөрхн улсан цугтаһинь геесн бәәдлтә гиҗ дотран сансан Пүрвә тодлна. Тер һазрт дәәнд эртәснь белдәд, хортн салдсмудан бәәлһдг гермүдән өргндән арвн тавн метр бетон эрсмүдәр батлсмн. Дәкәд эргнднь хойр зун дууна һазрт мин тәвәд, өөрдҗ хортыг уга кедг арһ уга бәәсмн. Мана дәврлһиг зогсахар хортн һарч ирәд, олн зүсн товар хаһад, бәәрндән бултҗ оддмн. Хортна цуг эв-довинь медҗ, харслтын шивәһинь эвдҗ, ичәнднь күрч уга кетл кедү һару учрв. Кедү эв-арһ олзлх кергтә болв. Цуг терүгинь тодлҗ келхлә, кесг өдр кергтә болх, гиҗ Пүрвә инәнә.
Дәәлдәнә түрүн сармуд болн ода цаарандан болҗадг дәәлдәнд ямаран йилһвр бәәхин тускар баһчуд сурснд цәәлһвр өгхләрн Пүрвән келсәр, хортн мана цергиг күүчхәр йир сәәнәр теткгдсинь цергчнр сәәнәр медв. «Артиллерин һалыг ик зуудан олзлҗ, дәәлдәнә түрүн сармудт хортыг хәрү цокчасмн. Дарунь дәәнә йовудт дронмуд болн нань чигн тоот өргнәр олзлдг болв. Хортнас үлдсн зер-зевиг шинҗлҗ дасад, эврә кергтән олзлад бәәв. Цергә үүлдвртән шин эв-арһ хәәдг болвидн», - гиҗ офицер тодлврарн хувалцв.
Манҗин Пүрвә эврәннь взводын 19 цергчтә хамдан кесг дәәлдәнд орлцсмн. Иигәд нег селәнә өөрк дәәлдәнд Манҗин Пүрвән взвод хортна нүүрт һарад, эдниг селәнә захд тосх даалһвр авсмн. Тооһарн кесг холванд ик хортна дәврлһиг энүнә взвод зогсаҗ чадв. Иим нәрн бәәдлд командир түргәр шиидвр авх йовдлмуд баһ биш учрҗав.
Нег дәкҗ хортыг сөргҗ дәврҗ йовсн кемд взводын дунд йовсн командирин машин генткн зогсч одв. Маши залҗасн механик юн эвдрсинь медҗ автл эднә машин тал хортна цергч өөрдәд күрч ирв. Терүг тер дарунь хаһад уңһачкхла, хортн тедниг уга кехинь медәд, бәәх цуг товарн мадниг уга кех бәәсмн. Агчмин зуур цугнь тагчгрв. Тиигҗәтл механик машиг ясад, арһул көндрв, эдн ардагшан цухрв.
Сулдхсн селәдт хортыг күццднь көөҗ һарһтл әәмшгтә кедү йовдл учрна. Сулдхгдсн нег селәнд кесг хонгтан зууньрсн дәәлдән болв. Бүтн нөр уга, хоолан норһдг усн уга болад, тесх кергтә бәәсмн. Селәнд үлдсн әмтиг эргәд, өдмгин зүүтә юм хәәһәд, зуг нег өрк-бүлд өдмг болһҗахиг эдн үзв. Хувалцтн гиҗ сурхла, теднә келәр эн өдмг болһхин төлә өрәл җилдән энд-тенд үлдсн буудя болн һуйрин үлдл хәәһәд, хураһад, ода болһҗах болв». Ода яахв, тиигәд хоосн һарвидн. Дәәнә цагт усн, өдмг болн җирһлд кергтә йирин юмн ямаран хәәртә болдгинь тиигҗ медҗ авнач.
Товчлҗ келхләрн Манҗин Пүрвә бийән чаңһаҗ, ямаран чигн күнд тоотла харһв чигн күн кевәр бәәҗ, өөрк үүрмүдән хайлго үүлдх кергтә гиҗ баһчудт келв.
Харһлтын дару оютнр зөргәрн нер һарсн Манҗин Пүрвәлә зурган цокулв. Цаг болһн эврә баатрмудта гисн үгмүд үнн болдгинь баһчуд сән медҗ авв.

ХӨӨЧИН Галина