Москвад болсн харһлт

15-05-2025, 09:00 | Общество, Таңһчин зәңгс, Зіњг, Бурхн-шаҗна төрәр

Әрәсән хотл балһснд бәәдг Бурхн Багшин номд шүтдг улст шаҗна сән өдрмүдлә цуглрдг, мөргүлд ордг, нертә ик багшнрин шаҗна цәәлһврт орҗ болх бәәрн бәәнә. Тернь «Тубден Шедублинг» нертә хурл мөн. Москвад үүлддг тер хурлын ах багш – гевш Йонтен болҗана. Гевш Йонтен Әрәсән сүзгтнрин төв оюни заллтын толһачин үүл даадгинь бидн цугтан меднәвидн.

Шидр Хальмгин Шаҗн Лам гевш Тензин Чойдак Москван тер хурлд одв. Харһлтын йовудт хойр гевш эн җилин намрар Элстд болх шар шаҗна нарт-делкән хургт белдлһнә төрмүдәр күүндвр кев. Бурхн-щаҗна үүлдәчнрин ик чинртә эн цуглран Әрәсәд һурвдад кегдҗәнә. Терүнд белдлһн чигн ик нәрн үүлдвриг некчәнә. Бурхн Багшин номд шүтдг улсин эн хургт 35 орн-нутгас шаҗна үүлдәчнр болн зуульчнр ирх гиҗ күләгдҗәнә.
Нарт-делкән ик чинртә эн цуглранд хәләгдх төрмүд дунд гелңгүд белдлһнә, теднә нилчинь өөдлүллһнә төр болҗана. Бурхн Багшин номиг цааранднь цәәлһҗ, олнд медүлдг сән белдвртә шаҗна хувргуд кергтә болҗана. Тер учрар бурхн-шаҗна сурһулин учр-утхинь цагин неквр дахулҗ, улм ясрулх төр тәвгдҗәнә. Дәкәд болхла, бурхн-шаҗна номин шинҗллтиг делгрүллһнә тускар чигн хойр гевш тоолврарн хувалцв.
Гевш Йонтен Хальмгин Шаҗн Ламиг хурлар дахулҗ йовад, энд кегддг тоотын тускар келҗ өгәд, хурлын көдлмшиг улм делгрүлхин төлә ямаран зура бәәхин тускар гевш Тензин Чойдакд келҗ өгв.
- Москвад иим хурл бәәхнь йир сән йовдл, – гиҗ гевш Тензин Чойдак келв. - Бурхн-шаҗнд шүтдг улст, мөргүлд орлцҗ, шаҗна нань чигн кергән күцәх бәәрнтә болҗахнь әмтнд йир туста. Бурхн-шаҗин номд орсн деерән әмтн гелңгүдлә харһҗ, соньм сульҗадг цуг төрәр цәәлһвр авч чадҗана. Эн хурлын үүлдвр цуг халхарн делгрҗ йовтха, хурлын гелңгүд болхла оюни буйнта үүлдвртән даңгин белн йовтха, – гиҗ Хальмгин Шаҗн Лам гевш Тензин Чойдак йөрәлин үгән нерәдв.

УШКАНА Сувсн

Видео