Таңһчдан туста эрдм дасх

Элстин политехникин колледжин ханьд ордг Яндекс лицейд экләд сурхин төлә арвтнр ноха сард марһана даалһвран күцәх.

Элстд болн мана таңһчин райодар сурһульчнр болн теднә эк-эцкнр программистин эрдмәр улм икәр соньмсч, эн халхар эклц медрлән авхар зүткнә. Яһад гихлә тиим эрдмтә улс мана орн-нутгт болн цуг делкәд икәр керглгднә, ик җалв авна, өрк-бүлән сәәнәр теткнә, альд болв чигн эднд сән таалта көдлмш олҗ болхмн. Тегәд чигн «Яндекс Лицей» төсвәр эдн икәр соньмсна.
Ода эн эрдмәр сурһульчнриг болн СПО-н бүрдәцсин оютнриг Хальмг ик сурһульд болн Элстин политехникин колледжд дасхна. Яндекс лицейд шүүврән өгәд, арвтнр программированя халхар эклц медрлән авхмн. Одахн таңһчин то-дигин делгрлтин министерствд «Яндекс Лицей» төсвиг сурһулин шин җилд күцәлһнә болн 2024-2025 сурһулин җилин ашиг дигллһнә төрмүдт нерәдсн селвлцән болв.
- Мана Хальмг ик сурһулин эсвин, физикин болн зәңгллһнә эв-арһин дацңгин ул деер Яндекс лицейин талвң кесг җилдән үүлдҗәнә. Лицейд арвтнр хойр җилдән сурна. Түрүн җилд эдн программированя кел дасна, хойрдгч җилд болхла салг-үүлдврин программированя ул-сүүрин туст медрл авна, – гиҗ дацңгин һардач Сумьяна Елена келв.
Тиим кевәр ик сурһулин багшнр сурһульчнрт болн СПО-н оютнрт кергтә эв-арһ дасхна. Эднә сурһулин һаруг таңһчин хазн даана. Хальмг ик сурһульд 1-ч курст болн политехникин колледжин 2-ч курст сурчасн оютнрин сурһулин ашнь селвлцәнд диглгдв, гиҗ Елена Владимировна заав.
Яндекс лицейиг төгсәсн 2-ч курсин арвтнрт нерәдсн керг-үүлдвр хальмг вузд мөчн сард болхмн. Эдн эврәннь төсвән харсхмн. Хамгин ик балл хоршасн 1-ч курсин оютнр цааранднь сурх зөв авх болв.
Хойр җилин сурһулин сертификат техникин салврин вузд орхла тоод авгдх. Эн җил Яндекс лицейд сурлһна диг-даран невчк сольгдх. Негдгч курст зуг политехникин колледжин талвңд Яндекс лицейд авх, хальмг вузин талвңд хойрдгч курст орсн арвтнр сурх.
Мана күүндврт Элстин политехникин колледжин талвңгин зүүцүләч Эрднин Александра орлцҗ цәәлһвр өгв. «Ноха сард Яндекс лицейд шин селгә сурһульчнриг орулхвидн. Негдгч курст арвтнриг Элстин политехникин колледж орулҗ авх. Ут турштан хотл балһсна сурһуляс болн СПО-н бүрдәцәс 45 күн лицейд орх гиҗ зуралгдҗана. Шин төсв үүдәлһнә, нейросеть дасхлһна болн нань чигн соньн тоотыг арвтнр дасх», – гиҗ Александра Михайловна келв.
Сурһулин шин җиләс авн таңһчин кесг колледжин оютнр чигн лицейд сурч чадх. Тиим кевәр таңһчд шин эв-арһиг меддг баһчудын то өсәд бәәх. Тиим мергҗлтнр таңһчд, то-дигин делгрлтин министерствд эрк биш кергтә болҗана, тегәд чигн таңһч Яндекс лицейлә нөкцлтин өргн хәрлцә делгрүлҗәнә. «То-дигин экономикин төлә кергтә кадрмуд» гидг шаңһа төсвин ул деер эн нөкцлт күцәгдҗәнә. Цуг арвтнрт күцәмҗ дурдҗанавидн, цааранднь вузд орҗ таңһчдан туста керг күцәҗ, түүнә делгрлтд нилчән күргәд йовтн, гиҗ йөрәҗәнәвидн.
ТҮРВӘН Һуна