Алдр теегин магтал

Хальмг Таңһчин өдрт нерәдәд Элстд академическ көгҗмин ик байр болв. Алдр теегтән нерәдсн магталан дуучнр, көгҗмчнр, сойлын көдләчнр авъяс болҗ тохрсн концертдән хамцулна. Эн җил көгҗмин дееҗән Хальмгин билгтнр дөрвдгч кемдән төрскн һазртан нерәдв.

«Таңһчин 105 җилд нерәдсн көгҗмин байр – орн-нутгин кесг театрт көдлҗ йовдг хальмг билгтнриг болн таңһчин баһ наста артистнриг хамцулдг билг-эрдмин сәәхн байр болна, - гиҗ Хальмгин симфоническ оркестрин ах дирижер, Хальмг Таңһчин билг-эрдмин ачта үүлдәч Настинә Мергн келнә. - Дөрвдгч кемдән көгҗмин иим нәр болҗахнь нег үлү байрта. Көгҗмин олн зүсн халхар үүлдҗ йовдг нертә артистнр - мана һазра билгтнр төрскн һазртан цуглрҗ ирәд, билгәрн маднд байр үүдәҗәнә».
Москваһас, Санкт-Петербургас, Владивостокас, Аһшас, Кировас ирсн мана һазрин билгтнр - нертә артистнр көгҗмин байрт орлцв. Дуучнриг зааһад келхлә, Хальмг Таңһчин ачта артист Игорь Лазарев (Москва балһсн), Хальмг Таңһчин ачта артист Оҗан Мингиян (Владивосток балһсн), Хальмг Таңһчин ачта артистк Катан Светлана (Аһш балһсн), дууч Любовь Петрова (Москва балһсн) мөн. Онц көгҗмчнр – Хальмг Таңһчин ачта артистк Очра Амулң хуур татсинь, Киров балһснас ирсн билгтә көгҗмч Батыра Санҗ өвәрц зевсг татсинь дахулҗ көгҗмиг наадснь Хальмгин симфоническ оркестр болн «Царицынская опера» гидг оперин болн балетин Аһшин театрин оркестр болв.
Хальмг дуучнр – Хальмг Таңһчин улсин артистк Очкан Анна, Цевгә Төлән нертә дууна коллективин артистнр Баҗан Бадм болн Зулан Данзн дуулсинь цуглрсн әмтн оньган өгч соңсв.
Концертин көтлврт Вольфганг Амадей Моцартын, Джузеппе Вердин, Жорж Бизен, Сергей Рахманиновин, Чонкуша Петрин, Манҗин Аркадин көгҗмин үүдәврмүд соңсгдв. Көгҗмин эн ик нәәриг белдҗ, һардҗ давулснь Хальмг Таңһчин билг-эрдмин ачта үүлдәч, таңһчин симфоническ оркестрин художественн һардач болн ах дирижер Настинә Мергн болв.
Хальмг Таңһчин частрар эклсн байрин эн концерт Хальмг Таңһчин улсин артистк Очкан Анна өргҗ дуулсн «Цецгәрич, Хальмг минь» гидг дууһар төгсв.
Дууна болн көгҗмин билгәрн төрскн теегтән нерәдсн Хальмгин нертә артистнрин билг-эрдмин белг алдр теегин йоста магтал болҗ, таңһчин байриг герлткв.

ХӨӨЧИН Галина