Дала Ламин Гегәнд нерәдәд

Дала Ламин Гегәнә 90-җилин өөниг Хальмг Таңһчд өргнәр темдглв. Хальмгин әмтн Оюни Ик Багштан балһснд болн таңһчин райодар болсн байрин керг-үүлдврмүдән нерәдв.

Бурхн Багшин Алтн сүмин гелңгүд болн таңһчин төв хурлд цуглрҗ ирсн олн-әмтн Дала Ламин Гегәнә ут насна болн амулң- менд бәәдлин төлә мөргүл кев. Хальмг Таңһчин Толһач Хаска Бату байрин мөргүлд бас орлцв.
«Дала Ламин Гегән өр-өвч седклин үүлдврин болн цецн ухана, ик тесврин болн цуг әмтә тоотд дуран өглһнә үлгүр болҗ саяд улст церглнә, - гиҗ Хальмг Таңһчин Толһач йөрәлин үгдән темдглв (зургт). – Мана келн-улсин хөв-кишг Дала Ламин Гегәнлә тасрхан уга залһлдата. Хальмг Таңһчд хөв-кишг дурдҗ йөрәлән мана ик Багш нерәдсмн. Бурхн-шаҗнд шүтдг улст энтн онц чинртә һазр гиҗ Оюни Гегән даңгин келнә. Төрскн һазртан дурта болдгиг, эврә нутгин делгрлтин төлә көдлдгиг мана Ик Багш маднд дасхна. Дала Ламин Гегән маднд иткҗәнә. Бидн болхла, тер итклинь хәрүлхин төлә чидлән хамцулх зөвтәвидн».
Така сарин 6-д хамгин ик мөргүл болв. Өрүһәр «Сангсоль» гидг шаҗна шишлң йосрхл күцәгдв. Дала Ламин Гегәнә сәкүсдт болн әрүни харсачнрт нерәдгдҗ тернь күцәгдв.
Дарунь өрүн йисн часла байрин ик мөргүл эклв. Дала Ламин Гегәнә 90 җилин өөнләнь цуглрсн улсиг Хальмгин Шаҗн Лам Гевш Тензин Чойдак йөрәв. «Мана Оюни Көтлврч дәкн дөчн җил әмд- менд йовх зәңг цуг маднд ик байрта болв. Алдр Багшин һарсн өдрт бидн цугтан өөрхн улстан өр-өвч седклән медүлх зөвтәвидн. Зурһан зүүл әмтнә болн цуг әмтә тоотын тускар килмҗ һарһҗ зальврлһн – энтн Дала Ламин Гегәнд хамгин сән белг болхмн» - гиҗ Хальмгин Шаҗн Лам йөрәлән төгсәв.
Дала Ламин Гегәнд нерәдгддг дәкн нег авъяс таңһчд батрсн бәәнә. Эн өдр асхар Диилврин талвңд әмтн цуглрад, Дала Ламин Гегәнд нерәдсн ик концерт хәләв. Оюни Ик Багштан көгҗмин белгән нерәдснә дару Бурхн Багшин Алтн сүмин гелңгүд ном умшсна дару, әмтн әмтәхн хот-хоолар тоогдна. Эн җил тер әмтәхн хот өндртән хойр дундур метр болв. Цуглрсн улст ик байр үүдәсн әмтәхн тоовр байрин сән ашнь болв. «Мана багш Дала Лам ут нас наслҗ, хамг әмтнд туслҗ, хәәрхн, олн җилдән маднла бәәтхә!» - гиҗ цуг әмтн зальврв.
Бурхна номиг зааҗ, Оюни көтлврч болҗ йовх шаҗна алдр үүлдәчд, эвин төлә Нобелевск мөрәһәр ачлгдсн Дала Ламин Гегәнә ут наснд нерәдсн мөргүлмүд кесг хонгтан болҗ, олн улс терүнд орлцҗ чадв. Таңһчин әмтн Оюни Ик Багштан тиигҗ күндллһән медүлв.

УШКАНА Сувсн