Зург цокдг улст

Хальмгт бурхн-шаҗна төрт нерәдсн зургудын марһан болҗана. Зург цокдг әмтн бурхн-шаҗна әрүн һол тоотыг үзүлгч зургудыг тер марһанд орлцулҗ чадхмн.

Мөчн сард эклҗ зарлгдсн марһан һаха сарин 15 күртл болхмн. Бичкдүдин-баһчудын зуульчллһна болн эврә һазр шинҗллһнә таңһчин төв эн марһаг бүрдәсмн. Бурхн-шаҗна үүлдәчнрин нарт-делкән ик хургт болн Бурхн Багшин Алтн сүмин хөрн җилин өөнд нерәдҗ кегдҗәнә.
Нәәмдгч-арвдгч классмудын сурһульчнр, шишлң дунд сурһулин оютнр, тер тоод немр сурһульд сурчах баһчуд чигн эн марһанд орлцҗана. Зург цокдг эрдмтә баһчудыг йилһҗ авлһнд марһан туслхмн. Зург цокч авлһна эрдмин дөңгәр бурхн шаҗна тууҗиг болн әрүн тоотыг медҗ авлһнд бичкдүдин болн баһчудын оньг тусхах күслтәһәр эн марһан давулгдҗана.

ҖИРҺЛИН Кермн