Төрскән харсачнриг өскчәнә

Элстд Хальмг ик сурһулин «Җаңһр» лагерьт иргчдән дәәчнр болх уйн наста баһчуд амрч дамшчана.

Хальмг ик сурһулин «Җаңһр» лагерьт бичкдүд болн арвтнр цаган яһҗ давулҗахин тускар лагерин һардач, Хальмг ик сурһулин оютн Эльмира Умерова келҗ өгв: «Түрүн селгән «Эрүл-менд үй» гиҗ нерәдгдҗәлә, 150 күн амрла. Эднә тоод эклц классин сурһульчнр бәәлә, эргндк йиртмҗ харлһна, олнд туста үүлдврин кесг кергиг эдн хамдан күцәҗәлә. Ут тоодан 10 хонгтан эдн амрв.
Зуни цагин эргцд «Җаңһрт» 6 селгән бүрдәгдх. Җил болһн Элстд болн Хар теңгсин көвәд бәәдг лагерьмүдт хальмг оютнр көдлнә. Түүнә төлә эдн җилин эргцд шишлң белдвр авна, лекцс соңсна. Би болхла нам сурһулин цагас авн вожатын көдлмшәр соньмсад негдгч курсас авн педагогин багин үүлдврт орлцҗанав».
Ах вожат болҗ ода Болдра Бадм көдлҗәнә, кесг керг-үүлдвриг Нохан Баина бүрдәнә, вожатнр Диляра Урастаева болн Аңһун Альма олн зүсн кергүдт көвүд-күүкдиг орлцулна. «Дәәч» нертә таңһчин төвин көтлврлә ирлцҗ хойрдгч селгән ода бүрдәгдҗәнә, түүнә ханьд 120 арвт цуг райодас амрчана. «Уйн наста баатрмудын цаг» гиҗ селгән нерәдгдв. Өрүнәс авн арвтнрт лекц умшна, нань чигн керг-үүлдвр болна. Асхлад лагерьт концерт-дискотек, марһас давулгдна. Лагерин онц талвңд көвүд-күүкд дамшачла хамдан кичәлд орлцна. Ода «Җаңһрт» хойрдгч селгәнә йовудт цергә-спортын лагерь бүрдәгдсн бәәнә.
Ах классмудын сурһульчнр-арвтнр амрлһна таалд цергә дамшлтан гүүдүлҗ, сән белдвр авчана. Лагерьт орх арвтнриг таңһчин сурһуль-эрдмин министерствин селвгәр орулҗ авна. Зәрмнь «Дәәч» төвд ирәд, бооца батлад, талдан арвтнрла хамдан кичәлд орна.
Лагерьт белдвр авсн зәрм көвүд цергчнр, офицермүд болад, ода әәрмд эс гиҗ СВО-д церглҗәнә, гиҗ баһчудын һардач Кекшән Евгений келнә.
Дарунь арвтнр эврә тоолврарн хувалцв. «Би Көтчнрә района Ергенинский селәнә дунд сурһульд сурчанав. Тиим цергә медрл маднд сурһульд туста, шав авсн үүрмүдтән дөң болҗанавидн, бу-селм яһҗ олзлдгинь медвидн. Аһш балһснд болсн марһанд би «Дәәч» төвин ханьд орлцлав. Тиим кевәр эн халхар дамшлт хоршасн бәәнәв. «Җаңһрт» дасч авсн тоотан би үүрмүдтән келҗ өгнәв», – гиҗ Дандыра Алтана келв.
«Ода эн багин ханьд 18 күүкн болн көвүн лагерьт амрчана, баһ-саһар цергә кичәллә иҗлдҗәнә. Би вожат болҗ тиим селгәнд эврән орхар седләв. Бас цергә кергиг дасч авхар бәәнәв», – гиҗ Чакан Алдр келснь тодлгдв.
Тиим кевәр ода арвтнр амрчана, цергә кергнь амр биш болв чигн, эдн шин тоотыг оньган өгч дасчана, дәкәд хоорндан үүрмүд болҗана. Сурһмҗлачнран, ах үүрмүдән соңсад, эрүл-мендән батрулад, сәәнәр амртн гиҗ эднд дурдҗанавидн.

ТҮРВӘН Һуна