Түүмр ик әәмшг учрав

Сүл өдрмүдт таңһчд дегд халун өдрмүд зогсад олн-әмтиг зоваҗана. Метеорологическ төвин зәңглсәр, эн өдрмүдт аһарин кемҗән дундлад 30-33 градуст күрв, зәрм райодар болхла 40-41 градус халун болв. Тиим халунд һал шатад, хаалһст болхла хату девскр халад хүврснә ашт зеткртә йовдл учрдг әәмшг бәәнә.
Тер мет зүркнә судцна болн талдан гемтә улс бас халунд саг бәәх зөвтә. Эн кемд таңһчин райодар энд-тенд теегт хагсу өвсн шачана гисн зәңг һарв. Така сарин 14-д болхла Целинн района Баһ Чонс болн Аршан Булг селәдәс хол биш бәәдг һурвн хошт түүмр учрв. Хошт бәәсн хөд, малын идг болн хаша-хаацс түүмрт шатв. Тер дарунь гилтә зеткртә йовдлын тускар Хальмг Таңһчин Толһачд зәңглгдв.
Хаска Батун даалһсар таңһчин селәнә эдл-ахун министерствд дөңнлһнә ирлцңгү керг-үүлдврмүд бүрдәгдҗәнә. Шидр тенд Целинн района һардврин болн таңһчин ветеринарн заллтын мергҗлтнрин орлцлһтаһар селвлцән болв. Министр Гаван Тимурин келсәр, зеткрлә харһсн селәнә эдл-ахун арһлачнрт дөң-нөкд болхмн. Әмд үлдсн хөд хотар теткгдҗәнә, эдлврәсн һарсн идгүдт өвс урһахин төлә эк хулдҗ авлһнд малчнрт шишлң дем һарһгдх болв.
– Селвлцәнә ашар түүмрт авлгдсн мал ветеринарн некврлә ирлцҗ уга кегдхмн. Терүнәс нань Целинн района муниципальн бүрдәцлә хамдан дөңнлһнә эв-арһс цаарандан бүрдәгдхмн, – гиҗ селәнә эдл-ахун министрин дарук Азда Эсен темдглв.
Зуни халунд герин хашадан болн эргндк һазрт хагсу өвс бичә шататн, татҗ йовсн тәмкән унтраһад хайтн, гиҗ Хальмг Таңһчин МЧС-ин заллт дәкнәс нег һазра улсиг саглулҗана. Күн болһн эн цагт дааврта болх зөвтә.

КАРСАНА Евгения