Соньн эрдмән эртәснь шүүҗ автха гиһәд

Одахн Элстд таңһчин сурһуль-эрдмин болн номин министерствин коллегийин дарани сүүр болв. Энд 2024-2025 сурһулин җилин, ЕГЭ-н болн ОГЭ-н шүүврин урдаснь кесн аш диглгдв. Тер мет СПО-н бүрдәцсин ул деер үүдәгдсн мастерскойсин үүлдврин тускар күүндвр болв, эдн колледжмүдин сурһульчнрин мергҗлтиг өөдлүллһнд болн сурһулян төгсәсн арвтнрт эрдмән шүүҗ авлһнд дөң болна.

Цааранднь таңһчин сурһуль-эрдмин бүрдәцст инклюзивн үүлдвриг шалтгта бичкдүдин болн арвтнрин төлә улм сәәнәр бүрдәлһнә тускар тодрха күүндвр болв. Шин закадт эн төрмүдт һол оньг өггдҗәнә.
Таңһчин сурһуль-эрдмин болн номин министрин үүл дааҗадг Александр Ким 2024-2025 сурһулин җилин эргцд сурһульмудын болн СПО-н бүрдәцсин коллективсин бәрсн күцәмҗин тускар келҗ өгв.
Үлгүрнь, ода таңһчин 10 сурһульд болн хойр садт бат ясвр күцәгдҗәнә. Тиим кевәр шинрүлгдсн сурһульмудын гермүдт цуг күүкдин 60 һар процентнь дасх гиҗ Александр Аркадьевич темдглв. Йиртмҗиг шинҗллһнә кичәлмүдиг болн шин эв-арһсиг улм тодрхаһар дасхин төлә «Точка роста» гидг 13 төв тогтагдсн бәәнә.
Элстин 4-ч тойгта сурһулин болн Зая-Пандитан нертә Хальмг этносойлын гимназин ул деер хойр «Кванториум» технопаркс үүдәгдлә, нааран райодын болн хотл балһсна сурһульмудын бичкдүд болн арвтнр шин эв-арһсин тускар улм тордха медрл авч, шин даалһвр күцәҗ, өдгә цагин кергслин көдлмшлә таньлдна, иргчдән шүүҗ авх эрдмин тускар ухална гиҗ Александр Аркадьевич заав. Бас өдгә цагин техникин болн программированя туск гүн медрлиг Городовиковск балһсна Бичкдүдин үүдәлтин герин ул деер тогтасн IT-КУБ өгнә. Тооһин технологин кец-таал тер мет 39-ч сурһульд тогтагдла, тиим кевәр сурһульчнр эртәс шин тоотла таньлдҗ терүг яһҗ олзлдгиг медҗ авна гиҗ Александр Ким келв.
Хальмг Таңһчин Толһачин зәрлгәр баахн багшнрт нег дәкҗ өгдг дем 400 арслң тогтав. Урднь баһсна багшнрт 200 миңһн арслң, селәнә багшнрт болхла 300 миңһн арслң дем өгчәсмн. Давсн сурһулин җилд «Земск багш» гидг шаңһа көтлврәр 9 күн көдлмшт орулгдв.
Тер мет шаңһа «Сириус» сурһулин төвлә нөкцлт делгрҗәнә, таңһчин 50 сурһульч физикин, эсвин болн гуманитарн профильн кесг селгәнд Хар теңгсин көвәд амрч медрлән гүүдүлв.
Сурһульчнрин оюни-шагшавдын делгрлтиг өргҗүлхин төлә нарн өдрлә көдлдг шар шаҗна сурһуль секгдлә, түүнд 6-7 классин сурһульчнр орна гиҗ министерствин һардач онц темдглв.
Багшнрин дунд җалвиг таңһчин талдан салврин дунд җалвла ирлцүллһнә даалһвр сурһульмудар болн садмудар күцәгдҗәнә. Эднә җалвинь цааранднь өөдлүллһн кадрин төриг дигтә-даратаһар күцәлһнд ик тәвцән орухнь лавта.
Сурһуль-эрдмиг делгрүллһнә орн-нутгин көтлвр бас дигтә-даратаһар күцәгдҗәнә. 2024 җил эн кергт 8 144,7 сай арслң олзлгдла.
Бичкдүдин болн арвтнрин сурһмҗд ик оньг өггдҗәнә. Тегәд чигн эдн таңһчин болн Цугәрәсән марһаст орлцҗ, дииләчин болн призерин күндтә нер зүүнә. Тер тоод «Зуульчллһна болн эврә һазр-усан медҗ авлһна бичкдүдин-уйн настнрин таңһчин төвин» баг «Школа безопасности- 2025» гидг регионмуд хоорндк XIX марһанд дииләчнь болв гиҗ һардач темдглв.
Эндр таңһчин сурһульмудт баатрмудын 246 ширә секгдсн бәәнә. Тер тоод 135 ширә Советин Союзин Баатрмудт болн Төрскән харсгч Алдр дәәнә ветеранмудт нерәдгдсн бәәнә. 111 ширә цергә шишлң керг-үүлдврт орлцачнрт нерәдгдв.
Бичкдүдин зуни цагин амрлһна таалыг ясрулхин төлә ик көдлмш күцәгдҗәнә. Целинн района «Сайгачонок» лагерин хот-хоолын хоран бат ясвр күцәгдв, түүнә төлә 9 408,26 миңһн арслң һарһгдв. Тер мет Көтчнрә района «Родничок» лагерин хот-хоолын болн эмнлһнә бәәрнст бат ясвр кегдҗәнә, эн кергт 34 646,80 арслң һарһгдв. 2026 җил тиим ясвр Яшалтан района «Лесная сказка» лагерьт 6 994,740 миңһн арслңд күцәгдх, гиҗ А.Ким ашлв.
Тер мет коллегийд колледжмүдиг шин кергсләр тетклһнә болн профориентацин көдлмшин тускар министерствин әңгин һардач Увшин Зоя үг келҗ тер төрәр тодрха илдкл кев. «Таңһчин колледжмүдт түүнә ашт кесг эрдмәр медрл өглһнә чинрнь үзмҗтәһәр өөдлнә, оютнр кесг шин эв-довиг олзлҗ йоста урчнр болна.
Тер тоод Элстин политехникин колледжд программированя кесг эрдмиг дастха гиһәд 5 мастерской секгдлә, тенд өдгә цагин компьютермүд болн шишлң нань чигн кергсл тәвгдлә. Тер мет «Технологии моды» гидг мастерской 2024 җилд тогтагдла. Таңһчин талдан чигн колледжмүдт шинрүллһн кесг халхар күцәгдлә, энд 50 өдгә цагин нәрн эрдмиг дасч болҗана, цуг таал түүнә төлә бәәнә. Тиим кевәр Элстин болн райодын сурһульмудын 7-9 классмудын сурһульчнр колледжмүдт ирҗ кесг эрдмлә таньлдҗ теднәс таастаһинь бийдән шүүҗ авна. Тиим көдлмшиг бидн цааранднь чигн өргҗүләд бәәх санатавидн»,- гиҗ Зоя Петровна цәәлһврән өгв.
Коллегийин чилгчәр ашлгч шиидвр батлгдв. Колледжмүдин сурһуль-эрдмин таалыг цааранднь ясрулҗ арвтнриг улм өргнәр эрдмән шүүҗ авлһна көдлмшт орлцулхмн гиҗ түүнд келгдв.

ТҮРВӘН Һуна