Хамцу төсвс күцәх күслтәһәр

Урҗ өдо мана таңһчур Әәдрхн балһснд Казахстан Республикин Генеральн элч Канат Хасенов көдлмшәр ирв. Тер өдрин өрүһәр Хальмг Таңһчин Толһач Хаска Бату күндтә гиичлә хамдан «Мөңк һал» бумблвд цецгүд тәвәд, Төрскән харсгч Алдр дәәнд әмнәсн хаһцсн баатрмудын санл тевчҗ, тагчг зогсв.
Харһлтд «Дәәч» цергә-спортивн белдврин төвин күүкд-көвүд орлцв. Хаска Бату болн Канат Хасенов баһчудла күүндәд, зуни амрлһна кем яһҗ давҗахин тускар соньмсв. «Мана аавнр Төрскән харсгч Алдр дәәнд ээм-ээмән түшлдәд, хамдан дәәлдҗ йовсмн, залу-зөрмгән үзүләд, мана сән-сәәхн төвкнүн җирһлин төлә әмән әрвлсн уга. Бидн терүг мартх зөв угавидн, эднә туурмҗта санлыг хадһлх зөвтәвидн», - гиҗ Канат Абдыкаримович баһчудла болсн харһлтд келв. Дарунь Хальмг Таңһчин Толһач Хаска Бату күндтә гиичлә йовһар Баатрмудын аллейәр йовад, намртан Элстд болх шар шаҗна нарт-делкән ик хургт белдвр кегдҗәхин тускар келәд, эн чинртә керг-үүлдврт орлцх үрвр кев. Советин Союзин Баатр, алдр генерал-лейтенант Басан Городовиковин бумбд эдн цецгүд бас тәвв.
Дарунь Канат Хасенов мана орн-нутгин болн Казахстана хоорнд хулд-гүүлгәнә, промышленностин, сойлын, сурһуль-эрдмин болн зуульчллһна халхар батлгдсн залһлдана тускар күүндәд, нөкцлтиг делгрүллһнә төр хәләв. Тиигәд, хулд-гүүлгәнә болн экономикин халхар төсвс күцәлһнә, Көк теңгсәр аца зөөлһнә, хамцу керг-үүлдврмүд давуллһна, мана таңһчд бәәдг хасг улсин ниицәг дөңнлһнә, ик сурһульмудын хәрлцәг делгрүллһнә төрмүд харһлтд босхгдв.
Таңһчин Толһачла болсн харһлтын хөөн күндтә гиич таңһчин залврин гешүдлә болсн селвлцәнд орлцв. Хальмг Таңһчин Толһачин селвгч Салыка Владимир, Хальмг Таңһчин залврин Ахлачин негдгч дарук–таңһчин финансин министр Шурһчин Очр, таңһчин экономикин болн хулд-гүүлгәнә министр Чиҗин Андрей, таңһчин селәнә эдл-ахун министр Һаван Тимур, таңһчин баһчудын керг-төрин агентствин һардач Камиль Маркеев, таңһчин сойлын министрин үүл дааҗадг Түрвән Саглр харһлтд орлцв. Селәнә эдл-ууш эд-бод келһнә, хулд-гүүлгәнә, мал асрлһна, үснә-махна зүүтә, әмтәхн хот-хол келһнә, сойлын, сурһуль-эрдмин халхар хамцу төсвс күцәҗ, Хальмг Таңһчин болн Казахстана арһлачнр болн баһчуд хоорндк залһлда батруллһна, хамцу бүрдәцс тогталһна тускар харһлтд орлцачнр күүндв. Мана таңһчд эврә төсв күцәҗәдг арһлачнрт алвна болн һазр нәәмәдллһнә туст онц зөв бәәхин тускар Чиҗин Андрей тодрхаһар келҗ өгв.
- Әрәсән болн Казахстана хам-хоша бәәдг регионмуд хоорнд нөкцлт батруллһна керг сәәнәр делгрҗәнә. Тиигәд, Атырауск мүҗин болн Хальмг Таңһчин хоорнд иньгллтин залһлда батрулҗ, инвестиционн төсвс күцәҗ болхмн. Бидн хулд-гүүлгәнә болн промышленностин Палатд тана сүв-селвгүдиг йовулад, Хальмгин болн Казахстана арһлачнр селәнә эдл-ахун, хулд-гүүлгәнә, эдл-ууш эд-бод келһнә болн талдан халхар төсв күцәхин туст бооца батлхвидн. Хамцу керг-үүлдврмүдин зура белдҗ, мана нөкцлтиг делгрүлх кергтә. Хойр-һурвн җилд күцәгдх зура батлад, хөөннь терүнд орсн керг-үүлдврмүдин аш диглҗ, цааранднь хамцу үүлдҗ болхмн. Зуульчллһна, спортын, сойлын халхар залһлда батруллһна болн нань чигн халхар бидн хамдан үүлдҗ чадхвидн, - гиҗ Канат Хасенов келв.
Селвлцәнә хөөн гиичнрт тосхгдҗадг «Хальмг Таңһчин агропромышленн парк», «Сән махн» кемҗәлгдсн дааврта ниицәс, Хальмг ик сурһулин селәнә эдл-ахун мал өсклһнә номин-производственн төв үзүлв. Тер өдрин бийднь күндтә гиич Б.Б.Городовиковин нертә Хальмг ик сурһулин һардврла болн номтнрла, Әрәсән келн-улсин бүрдәцин хальмг әңгин болн хасг улсин сойлын «Жерлестер» төвин гешүдлә харһв.

ДООҖАН Наталья