Ончта өөнд нерәдсн байрт орлцв

Шидр Хальмгин Толһач Хаска Батун даалһсар мана таңһчин делегац Моңһл орн-нутгин Увс әәмгин 100 җилин өөнин байрт нерәдсн керг-үүлдврт орлцв. Әрәсән сенатор Байир Путеев делегациг һардв.

Моңһлын Увс әәмгт бәәдг мана ахнр-дүүнрин тууҗ, сойл, авг-бәрц маднд өөрхн болҗ бат залһлдата. Цуг Моңһлас, Китдәс, Хальмг Таңһчас, Тыва болн Алтай Республикүдәс 100 миңһн һар гиич тиигәрән ирв.
Байрин йовудт Байир Путеев болн Тыва Республикин толһач Владислав Ховалыг Моңһл орн-нутгин президент Ухнаагийн Хурэлсухла (зургт), Моңһлын Хуралын ахлач Дашзэгвийн Амарбаясгаланла болн Увс әәмгин губернатор Сэмжид Батжаргалла харһҗ күүндв. Ниигмин болн сойлын халхсар нөкцлтин тускар күүндвр болв.
Әрәсән болн Моңһлын хоорндк хәрлцән кезәнәс авн батлгдв. Тодлхас, одахн Әрәсән Президент Владимир Путин тиигәрән йовад, Халхин һолд болсн дәәлдәнә 85 җилин өөнд нерәдсн керг-үүлдврт орлцсн билә. Тер мет Төрскән харсгч Алдр дәәнә йовудт Энгэлийн Бадамин тәвц темдглгдәд, эн эгл күүкд күүнә нерн тодлулгдв. Советин Союзин цергчнрт дөң-тусан күргәд, Бадамин Фронт гиҗ эн тууҗд орв.
– Хөрн шаху җилдән хальмг оютнриг, арһлачнриг, олна үүлдәчнриг болн номтнриг дөңнәд, даңгин маднд нөкд болҗадг «Тод номын гэрэл» бүрдәцин һардач Баатаржав Бат-Амгаланд Басан Бадьминович Городовиковин орден бәрүлҗ өггдв. Элстд болх шар шаҗна нарт-делкән чуулһн өөрдҗ йовна. Олн гиичнрин тоод Моңһлын делегациг бас күләҗәнәвидн, – гиҗ Хальмг Таңһчин Толһач Хаска Бату эврәннь ниигмин сүлҗәнә халхст зәңглв.
ОЛЬДАН Цаһан