Лаганя районд одв

Хальмгин Толһач Хаска Бату Лагань балһснд «Цевр усн» шаңһа көтлврин йовудт тосхгдсн усна станц шинҗлҗ хәләв. Белдврин көдлмш давад, удл уга станц экләд көдлхмн.
– Усна шин станцд өдгә цагин кергсл углҗ тәвгдв. Лаганя района 14 миңһн һар бәәрн улс цевр усар теткгдхмн. Мана таңһчин төрмүдт оньган өгчәдг Әрәсән Президент Владимир Путинд болн орн-нутгин залврт ик ханлтан өргҗәнәв, – гиҗ Хаска Бату онц темдглв.
Тер өдр Бату Сергеевич Улан Хол селәнд одад, Зая-Пандитан нертә селәнә дунд сурһульд төгсчәдг бат ясвриг хәләв.
Тенд хот уудг хорад шишлң кергсл углҗ тәвгдв, эрмдгтә улсин төлә пандус кегдв болн әәмшг уга бәәдл тогталһна туст турникет тәвгдв.
– Селән һазрт дунд сурһуль онц орман эзлнә. 2022 җиләс авн мана таңһчд 47 ирлцңгү бәәрн ясгдв. Эн җилд болхла 12 сурһуль-эрдмин бүрдәц ясгдхмн, тер тоод Элст балһсна бичкдүдин хойр сад орв. Шаңһа төв болн Әрәсән гегән-герлин Министерств эн туст дөңгән күргҗәнә. Сурһуль-эрдмин бүрдәцс ясгдад, дорас өсч йовдг мана үйнр сән таалд гүн медрл авч чадхмн, – гиҗ Хаска Бату темдглсн болдг.
ОЛЬДАН Цаһан