Шин байрин өдр

Әрәсәд билг-эрдмин шин байрин өдр тогтагдҗана. Артистын өдр гиҗ тернь нерәдгдхмн.

Әрәсән театральн үүлдәчнрин Ниицәнә ахлач Владимир Машков тиим седвәриг орн-нутгин сойлын Министерствд орулсмн.
Сойлын Министерств тер седвәриг дөңнәд, туула сарин 17-д артистын өдриг темдглх шиидвр авв. СССР-н улсин артистын нериг түрүңкнь болҗ зүүсн Константин Станиславскийин һарсн өдрлә ирлцүлҗ, артистын өдриг темдглдг болхмн. Станиславский Москван художествен театрин бүрдәһәчин негнь болсн деерән актерск эрдм дасхлһна шишлң әңг тогтасн үүлдәч болҗана. Артистын өдр темдгллһнә туск зәрлгиг Әрәсән залврин Ахлач Михаил Мишустин һар тәвҗ батлсмн. Эн шиидвриг бәәдл-җирһлд оруллһнд сойлын Министерствд зурһан сарин болзг заагдв. Артистын өдр театрмудын, кинон, циркин артистнрин, тер мет көгҗмчнрин болн эстрадын дуучнрин төлә эрдмин байр болҗ темдглгдхмн. Хальмгт эн эрдмин байриг һурвн театрин болн «Өөрднр» бииһин театрин артистнр темдглхнь лавта.
ҖИРҺЛИН Кермн