Келн-улсин музейин экскурсьт одв

Бичкдүдин билг-эрдм делгрүлдг «Republic» гидг төвд медрл авчадг күүкд-көвүдт амрлһна цагнь тустаһар давтха гиһәд экскурьс бүрдәнә. Иигәд эдниг Н. Пальмовин нертә Келн-улсин музейд авч одв.

«Степь как жизненное пространство» гидг нертә һәәхүлиг сурһульчнр соньмсч хәләв. Мана теегин йиртмҗин тускар күүкд-көвүдт келҗ өгәд, хальмгудын тууҗла, авъясмудла болн бәәцин бәәдллә таньлдулв.
Хальмг теегт археологическ ямаран хәәвр кегдснә тускар, терүнә йовудт ямаран соньн олвр олдсинь сурһульчнр медҗ авв. Нүүдл җирһләр бәәсн әмтн Әрәсән ханьд эврә сән дурар орад, тууҗин кесг зун җилд эн ик нутгт бәәхин тускар экскурсоводмуд күүкд-көвүдт келҗ өгв. Хальмг бичг ик ут тууҗтаһинь медхд сурһульчнрт йир соньн болв. Бәәцдән хальмгуд ямаран өлг-эд олзлҗ йовсинь эдн медҗ авв.
Музейд болсн экскурьс сурһульчнрт туста болад, шин олн медрллә таньлдулв.
ҖИРҺЛИН Кермн