Эмнлһнә чинриг өөдлүлх

Шидр П.Жемчуевин нертә таңһчин эмнлһнә улд эндокринологическ төв секгдв. Хальмг Таңһчин залврин Ахлач Босхмҗин Гилән, таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина, таңһчин эрүл-менд харлһна министр Саран Булат төвин секлһнд орлцад, цуснднь шикрин кемҗән өөдлсн улст эмнлһн энд кехин төлә ямаран кергсл углҗ тәвгдсиг хәләһәд, эмчнрлә күүндв.

Эн төв «Ут болн күцәмҗтә җирһл» гидг келн-улсин төсвин «Цуснд шикрин кемҗән өөдлсн гемәс хөрлһн» гидг шаңһа көтлврин медлд секгдв. Энд эндокринолог, хирург, офтальмолог эмчнр гемтә улст эмнлһ болн месллһ кеҗ, өөдән чинртә дөң күргдг болхмн. Энд «Диабетическая стопа» болн «Школа диабета» гидг әңгүд үүлдхмн. Эн гемәр гемтсн улсин нүднә харань икәр муурна, тегәд энд өдгә цага месллһ кехин төлә үнтә кергсл углҗ тәвгжвсн бәәнә. Эн кергт 100 сай шаху арслң һарһгдв. Байн дамшлтта эмч Опин Нина, баахн мергҗлтнр Делгә Гилән болн Эрнҗәнә Булһн өдгә цага эв-арһс олзлҗ гемтә улст месллһ кедг болхмн. Эднә келсәр, урднь иим кергсл мана таңһчд уга бәәсмн, тегәд бәәрн улс талдан балһсдт одҗ месллһ кедг бәәсн билә. Ода болхла эдн гертән шинҗллт кеҗ өөдән чинртә эмнлһ авч чадхмн гиҗ эмчнр темдглв.
- Сүл кесн то-дигәр мана таңһчд цуснднь шикрин кемҗән өөдлсн гемтә 11,5 миңһн күн бәәнә, теднәснь 4 миңһн күүнд эн гемәс иштә эрүл-мендин бәәдлднь олн зүсн харшлт учрсмн. Ода мана таңһчд 3 миңһн күн эн гемәс иштә эрмдгтә бәәнә. Таңһчин хазнас йилһгддг мөңгәр 8,5 миңһн күн эмәр теткгднә. Җил ирвәс мана таңһчд эн әәмшгтә гемәр гемтсн улсин то икдәд йовна, тегәд эн төв секгдснь эднд чинртә эмнлһ кехд туслхнь маһд уга. Мана төвд «Диабетическая стопа» гидг шишлң әңг үүлдхмн. Одахн хойр эмч Әрәсән эндокринологическ номин-шинҗллтин төвд мергҗлтән өөдлүләд ирв, эдн эн әңгд гемтә улст дөң күргдг болхмн. Эн гем түрүн болҗ илдкгдсн улст «Школа диабета» гидг әңгд цусна шинҗллт келһнә туст дөң күргҗ, чик авг-бәрцин, эрүл-мендд туста хот-хоолын тускар цәәлһврин көдлмш давулгдхмн. Мана төвд Элст балһсна болн райодын әмтн цуһар эмнлһ авхмн, – гиҗ төвин һардач Манган Байрта келв.
Хальмг Таңһчин залврин Ахлач Босхмҗин Гилән төвин хора болһнд орад, гемтә улсин болн эмчнрин төлә ямаран таал тогтасиг бүрткҗ хәләв. Дааврта һардач эмч болһнла күүндәд, таңһчин һардвр эрүл-менд харлһна халхин делгрлтин, эмнлһсин материальн-техническ ул батруллһна, эрүл-менд харлһна көдләчнрин җалв өөдлүллһнә болн эднә мергҗлт өөдлүллһнә төлә күцәҗәх көдлмшин тускар келҗ өгәд, эн төрмүд дигтә-даратаһар хаһлгдҗахиг темдглв. Эн өдр дигтә офтальмологин сән өдр бәәсмн, тегәд Гилән Герасимовна П.Жемчуевин нертә таңһчин эмнлһнә офтальмологическ әңгин һардач ачта эмч Опинә Нинад Хальмг Таңһчин Толһачин Ханлтын бичг бәрүлҗ өгв. Нина Ивановна байн дамшлтта, өөдән мергҗлттә эмч болна, эндр эн баһчудын төлҗлтд ик тәвцән орулҗана.
Эндокринологическ әңг үүлдврән эклв. Гемтә улс нааран ирҗ, гүн шинҗллт кеҗ, дор ормднь эмнлһ болн месллһ кедг болхиг өөдәнәр үнлҗ, эднә төлә иим сән таал тогтаснд ханлтан өргв. «Урднь бидн Москва болн талдан балсдт оддг биләвидн, ода болхла гертән цуг эмнлһ кехвидн», – гиҗ эдн байрарн хувалцв.
ДООҖАН Наталья