Басңга Санлын өрк-бүл диилвр бәрв

Сегодня, 13:43 | Общество, Таңһчин зәңгс, Зіњг, Марєан

Шидр Элстд «Җилин сән гисн өрк-бүл» гидг Әрәсән марһана таңһчин девсң болв. Терүнд ут тоодан арвн хойр өрк-бүл орлцад, билг-эрдмән үзүлҗ, уңг-тохминнь, авъясмудыннь тускар келҗ өгв. Эн җил марһан арвн негдгч кемдән болв. Өвкнриннь авъяс хадһлдг, олн үртә, баһ наста, селәнд бәәдг, олн җилдән хамдан ниитә болн Төрскән харсачин өрк-бүлмүд хоорндан марһлдҗ, диилвр бәрхәр зүткв.
Марһан өрк-бүлин нарт-делкән Өдрлә ирлцҗ бүрдәгдснь хойр дам темдгтә болн ончта болв. Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина марһанд орлцачнриг цаһан седкләсн сән өдрин байрла йөрәһәд, эн җилмүдин эргцд мана өрк-бүлмүд билгтә, седвәртә, ниитә, арһта болҗахан медүлв гиҗ темдглв. - Арвн негн җилин туршарт давулгдҗадг марһанд ут тоодан 300 өрк орлцв, мана таңһчин элчнр Әрәсән марһана дииләчнрин тоод орҗ нер һарна. Сүл тавн җилин эргцд мана таңһчин хойрдгч нилх болһн олн үртә өрк-бүлд һарна. Сүл то-дигәр, мана таңһчд 10 миңһн олн үртә өрк-бүл бәәнә, терүнд 30 миңһн үрн өсчәнә. Өнр-өсклң өрк-бүлд кесг үйин элчнр ниитә бәәҗ, кен ахан күндлҗ, бичкнән өкәрлҗ, өвкнриннь авъяс хадһлҗ, мана таңһчин болн орн-нутгин бат ул тогтана. Марһанд орлцдг өрк-бүлмүд олнд үлгүр-үзмҗ болҗ, отг-әәмгтән күндтә болн тоомсрта улс мөн, - гиҗ Өлзәтин Марина йөрәлин үгдән темдглв.
Эн җил Яшкулин района элчнр марһанд шунмһаһар орлцсиг заах кергтә. Тиигәд, Зургадаевихнә, Чулюкановихнә, Калабуховихнә болн Уразалиевихнә өрк-бүлмүд өвкнриннь авъяс хадһлдг, олн үртә, Төрскән харсачин өрк-бүлмүдин марһаст орлцҗ, дииләчнрин тоод орснь бахмҗта. Городовиковск районас хойр, Үстин, Баһ Дөрвдә, Сарпан, Целинн болн Лаганя райодас, Элст балһснас неҗәһәд бүл орлцв. Өрк-бүл болһн марһанд сәәнәр белдснь темдгтә, эдн ду-бииһән үзүләд, уңг-тохминнь тускар келәд, билг-эрдмәрн цуглрсн улсиг болн жюрин гешүдиг авлв. Йисн үртә Иван болн Раиса Генне Городовиковск районас, зурһан үртә Баатыр болн Екатерина Боктаевихн Үстин районас, Евгений болн Оксана Чулюкаевихн Яшкулин районас ирсн өнр-өсклң өрк-бүлмүдин күүкд сурһулян сәәнәр сурна, спортын халхар ик күцәмҗ бәрнә, билг-эрдмәрн олн марһаст нер һарна, олн үртә эк-эцкнр олна бәәдл-җирһлд шунмһаһар орлцна. Эдн дундас дииләчнриг йилһҗ авхд амр болсн уга, гиҗ жюрин гешүд келв. Аштнь Боктаевихнә болн Генн өрк-бүлмүд дииләчнр болв. Министр Өлзәтин Маринан шиидврәр Чулюкановихнә өрк-бүлд онц белг бәрүлҗ өггдв. Өвкнриннь авъяс хадһлдг Василий болн Любовь Зургадаевихн, Санл болн Цаһан Басанговихн, Владимир болн Серәтр Тихоновихн хальмг улсин сойл, тууҗ хадһлҗ, дорас өсч йовдг баһ үйнрт сән сурһмҗ өгч йовна. Төрскән харсачин өрк-бүлмүдин марһанд зуг Хамит болн Кульжан Уразалиевихн орлцв, эдн Мирхат көвүнәннь санлыг әрүнәр хадһлҗана. Лиҗ болн Герл Лактионовихнә баахн өрк-бүл ода деерән нег күүктә, иим марһанд эдн түрүн болҗ орлцснь бийнь дииләчнр болснь элгн-саднднь байр үүдәв. Анатолий болн Татьяна Изюмцевихн селәнә өрк-бүлмүд дунд ончрад, бас диилвр бәрв. Келхд, марһанд диилвр бәрсн өрк-бүл болһнд 50 миңһн арслңга мөрә өгв.
Марһана ашар Санл болн Цаһан Басанговихн «Җилин сән гисн өрк-бүл» гидг Әрәсән марһана таңһчин девсңгин дииләчнр болад,150 миңһн арслңгар мөрәлгдв. Мергн, Церн, Очр, Эрдм болн Лари көвүдтә баахн эк-эцк хойрин келсәр, марһанд диилвр бәрснь эднд ик байр-бахмҗта болв. Эдн 2009 җилд өрк-бүлән өндәлһәд, хальмг келндән хару, төрскнч седклтә баһчуд мөн. Эләднь Кичгә Төлән нертә келн-улсин гимназьд сурна, герин эзн МЧС-ин мергҗлт болна. Гимназин багшнр, элгн-саднь эн марһанд белдхд дөң-нөкд болснд баһчуд ик ханлтан өргәд, нарт-делкән өрк-бүлин Өдрлә иим марһанд диилвр бәрсндән байрта бәәхән медүлв.
ДООҖАН Наталья

Видео