Өвкнрин үлдәсн зөөр хадһлый!

Сегодня, 13:39 | Общество, Таңһчин зәңгс, Зіњг

Өдгә цагт мана өвкнрин сойлын болн амн үгин зөөр хадһллһнд онц оньг өггдҗәнә. Тер тоод «Җаңһр» алдр баатрльг дуулвр ончта орман эзлдг мөн. Ик кезәнәс авн үйәс үйд келгдәд, җаңһрчнрин нилчәр эн дуулвр мана цаг күртл күрв.
Шидр «Калмыкия» РИА-н барин төвд «Җаңһр» үүдәвриг хадһллһна төрәр брифинг болв. Хальмгин сойлын болн зуульчллһна министрин дарук Санҗрһа Герман болн таңһчин улсин үүдәлтин Герин мергҗлт Тербатан Очр терүнд орлцв.
Эндр Хальмгт хоолан шахч «Җаңһр» дуулвриг дуулдг улсин тонь цөн гиҗ келх кергтә. Тегәд нидн Элстд секгдсн сойл делгрүллһнә Төвд иим эрдм дасхин төлә шишлң кичәлмүд эклхмн.
2025 җилин намрар алдр дуулврин 585 җилин өөн темдглҗәсн йовудт таңһчин райодар «Җаңһрин сө» нертә керг-үүлдвр давулгдла. Терүнд олн-әмтн ирәд, алдр дуулврар соньмсчахан медүлв. Аштнь иим төсв күцәх седвәр татсн болв.
– Мана таңһчд җаңһрчин өвәрц эрдмтә зуг зурһахн күн бәәнә. Дорас өсч йовдг баһчудт эн эрдмд дасхх кергтә. Алтн зөөр болҗадг «Җаңһриг» бидн хадһлад, мартх зөв угавидн, – гиҗ Герман Эрднеевич темдглв.
Тербатан Очрин келсәр, таңһчин сойл делгрүллһнә Төвд җаңһрчин эрдм дасх цуг таал тогтагдсн бәәнә. Мөчн сард кичәлмүдән эклхәр эн зуралҗана.
– Җаңһрчин эрдмиг дасхар седҗәдг ик-бичкн уга иигәрән ирҗ чадҗана. Алдр дуулврин 590 җилин өөн темдгллһнә җилд җаңһрчнрин то икдәд чигн бәәх биз гисн иткл үүднә. Тиим кичәлмүдт олн-әмтиг орлцулад, иргчдән җаңһрчнрин күрәлң бүрдәҗ болхмн. Тер мет эн соньн төсв күцәлһнд хальмг келнә багшнр бас орлцад, «Җаңһрин» бөлгүдиг чикәр умшдгиг дасхмн. Терүнәс нань сурһулин ашар җаңһрчнрин дунд марһан давулгдх, – гиҗ Тербатан Очр тоолврарн хувалцв.
БАДМИН Занда

Видео