Нерән өөдән бәрҗ зөрмгән үзүлв

Цергә шишлң керг-үүлдврт орлцачнр залу-зөрмгин, төрскнч седклин үлгүр болҗ, «Җаңһр» алдр дуулврин баатрмуд мет ааһ цусан асхҗ, хортнла сүл әмсхл күртл дәәлдҗ йовна. Хамдан дәәлдҗ йовх үүрмүдтән итклтә түшг болҗ, бийиннь тускар ухаллго эдн өмәрән зөрҗ, ардасн талдан цергчнриг дахулна. Баахн цергч Бүүрчин Җаңһр (зургт) цергә керг-үүлдврт орлцҗ йовх нег һазра дәәчнр дунд зөвтә орман эзлҗ, залу-зөрмгәрн ик бахмҗ үүдәнә.
Җаңһр 1996 җилд Көтчнрә района Өвдг селәнд һарсмн. Энд өвкнриннь авъяс-заңшал әрүнәр хадһлдг, төрскнч седклтә улс бәәнә. Дорас өсч йовх баһчуд төрскн һазр-усндан эңкр, хальмг келндән хару, чик авг-бәрцтә улс мөн. Алдр Богд Җаңһрин нер зүүҗәдг баахн көвүн әәрмд церглҗәсн цагтан цааранднь цергә халхар үүлдхәр шиидв. Тиигәд Бүүрчин Җаңһр әәрмәс бууҗ ирснә дару һурвн җилдән Ингушетьд артиллерийск әңгд церглв. Тенд терроризмәс хөрлһнә керг-үүлдврт орлцад, эн залу-зөрмгән үзүлсн төләдән «Терроризмәс хөрлһнә керг-үүлдврт орлцсн төлә», «Кавказд церглсн төлә» болн «Цергә туурмҗин төлә» гидг медальмүдәр ачлгдсмн. Хөөннь Җаңһр Кунашир арлд цергә даалһвран күцәҗ йовсмн. Тенд хамдан церглҗ йовсн үүрмүдтәһән цергә шишлң керг-үүлдврт орлцсмн.
- Би 39-ч тойгта гвардейск йовһн цергә бригадын ханьд цергә шишлң керг-үүлдвр эклснәс авн орлцлав. Донецкин өмн үзгин халхд Славянск, Новомихайловка селәдиг сулдхлһна бәрлдәнд орлцҗ, шав авсн цергчнриг зөөҗ, госпитальд күргдг багд ордг биләв. Би тер һазра хаалһиг сәәнәр меддг биләв, тегәд шавтсн цергчнриг дарунь авч һарһҗ авдг биләв. Күсдундур җилин эргцд зун һар цергчиг һарһҗ авад, теднә әм аврлав. Бидн өдр-сө гиҗ хәләлго мана цергчнр тал һарч йовдг биләвидн. Хортн намаг гетәд дәврдг бәәсмн. Нег дәкҗ сөөһәр талдан цергчнрт эн хаалһиг үзүлхәр һарч йовсн биләв. Хортна артиллерь дәврәд бәәв, болв тер бийнь бидн хаалһасн хаҗисн угавидн. Эдн мадниг мекләд, дрон олзлад деерәс гранат хайв, тер хаалһд мин дала бәәсмн, тегәд бидн терүнд бәргдвидн. Нанла хамдан йовсн үүрмүдм гиигн шав авв, би болхла күнд шав авад, госпитальд тусв, – гиҗ Җаңһр тодлвран сергәҗ келв.
Түрүләд эн Березово селәнд бәәсн госпитальд тусв, хөөннь энүг Донецкд болн Ростов-на-Дону балһснд күргв. Москва балһснд Вишневскийин нертә госпитальд бас удан цагт эмнлһ авх кергтә болв. Күнд шав авсна ашт баахн дәәч көлән геев, болв эн бийән зөрмг кевәр бәрҗ, гейүрсн уга. Эк-эцкнь, олн элгн-саднь болн авальнь энүг күнд цагла дөңнҗ чидл-омг өгсмн. Энүнд өдгә цага кегдл тәвҗ өгв, тегәд эн шинәс йовдг дасв. Бүүрчин Җаңһр давсн җиләс авн Элст балһсна цергә комиссариатд күцәмҗтәһәр көдлҗәнә. Хамдан көдлҗәдг үүрмүднь энүг дөңнҗ, дамшлтарн хувалцҗ ямр нег төр хаһлхд сүв-селвгән өгнә. Җаңһр хамдан церглҗ йовсн үүрмүдтәһән залһлда бәрҗ, бәәдл-җирһлиннь туск зәңгәрн хувалцҗ, эднд халун менд келүлнә. Одахн эн теднд золһҗ одад, хөөнә шимтә мах күргҗ өгв. Энүнә келсәр, хамдан церглҗ йовсн үүрмүднь энүнд хамгин өөрхн болн ицлтә улс болҗ, ахнр-дүүнрт тоолгдна. Эдн цергә даалһвр күцәҗ йовсн цагт нег хәләцәр нег-негән медҗ, түрүн дуудврар дөңгән күргҗ йовсмн. Цергә шишлң керг-үүлдврт шав авсн дәәчнрин әм аврҗ залу-зөрмгән үзүлсн төләдән Бүүрчин Җаңһр «Зөрмгин төлә» орденәр, «Әм аврсн төлә» болн «СВО-д орлцсн төлә» гидг медальмүдәр ачлгдсмн.
Цаг негәр бәәдго гиҗ келгддгәр, ода Бүүрчин Җаңһр эвин таалд көдлҗ, Бошня авальтаһан күүкән асрҗ, олна хормад багтҗ йовна. Элтә күүкнь эк-эцкән байрлулҗ өсчәнә. Җаңһр көдлн бәәҗ Хальмг ик сурһульд инженерин эрдм дасчана. Цергә шишлң керг-үүлдврин ветеран болҗ эн олн зүсн онц тус авна, тиигәд көлгнә алв өгхәс эн сулдхгдсмн. Сул цаг учрхла Җаңһр цогц-махмудан батрулҗ спортивн марһаст болн баһчудт төрскнч седклин сурһмҗ өглһнә керг-үүлдврмүдт орлцх арһ хәәнә. Эн зунар төрскн Чкаловский селәнд мини-футболар болсн марһа секлһнд эн орлцв. СВО-н ветеранмудын спартакиадт Җаңһр бас шунмһаһар орлцҗ, эв-дован үзүлнә. Эн пауэрлифтингәр, саадгар халһна, мини-футболар болдг марһаст орлцҗ, цергә керг-үүлдврт орлцачнр дунд нер һарна. Владимирск мүҗд пауэрлифтингәр Әрәсән марһанд, Сочи балһснд «Стальная воля – лига героев» мини-футболар болсн марһанд ончрсмн.
Бүүрчин Җаңһр һучн нас күрәд уга баахн залу күн болна. Эн дән гисн үгин учр-утхиг, хамдан церглҗәдг үүртән бат түшг болҗ, кергтә болхла әмән чигн әврлго зөрмг йовдл һарһхин тускар сәәнәр меднә. Җирһлин хаалһнь ут болҗ, өнр-өсклң өрк-бүлтә болад, эк-эцкдән өлзәтә үрн болн таңһчдан туста иргн болтха гиҗ дурдҗанавидн. Кесг цергчин әм аврсн зөрмг йовдлнь ик буйн болтха!
ДООҖАН Наталья
Зургт: Бүүрчин Җаңһр цергә иньгтә