Халхин һол төрмүдәр күүндв

Өцклдүрк өдрин хойрдгч өрәлднь сурһуль-эрдмин болн номин халхд бүртклһ кедг Федеральн цергллтин һардач Сергей Кравцовиг болн терүг дахҗ ирсн Хальмг Таңһчин правительствин Ахлачин дарук Лариса Васильеваг, Хальмг Таңһчин Улсин Хуралын (Парламентин) депутат, Хальмг государственн университетин ректор Бадм Салаевиг болн Хальмг Таңһчин сурһуль-эрдмин болн номин министр Николай Манцаевиг эврәннь кабинетдән Хальмг Таңһчин Улсин Хуралын (Парламентин) Ахлач Анатолий Козачко тосҗ авв.

Анатолий Васильевич Сергей Кравцовд таңһчин парламентин көдлмшин ончинь цәәлһҗ өгв. Бас тер мет Улсин Хуралын һоллгч даалһврин тускар келв. Спикерин келсәр, парламент таңһчин социальн-экономическ делгрлтин төлә кергтә зөв-йосна көрң тогтана. Эн туст бидн оратх зөв угавидн, гиҗ А. Козачко үгән төгсәв.

Сергей Кравцовин келсәр, энүнә һардҗах цергллт кесг даалһврта, болв теднәс хамгин ик чинртәнь ямарамб гихлә, ЕГЭ-г болн сурһулин заведеньсин чинриг бүртклһн. ЕГЭ-н тускар келхләрн, федеральн һардач эн җил кампань сәәнәр давв гив. Юңгад гихлә орн-нутгт, тер дотр Хальмгт ЕГЭ эндү угаһар болн заканла ирлцәтәһәр болв.

Цааранднь С. Кравцов эн җил мана цергллт һурвн зун сурһулин заведеньсин лицензийсиг булаҗ авла гиҗ зәңглв. Зуг энтн мана һоллгч керг биш, сурһулин заведеньс эврә көдлмшин чинрәр өөдлүлтхә гисн күслтәһәр үүлдҗәнәвидн, гиҗ федеральн һардач келв.