«МанджиевФест»: үүдәгч нөкцлтин наадм

Элст балһсн соньн олн керг-үүлдврмүдин хотл болҗахинь «Манджиев Фест» гидг театрин наадм медүлҗәнә. Басңга Баатрин нертә Келн-улсин театрт хулһн сарин 2-ас авн соньн наадм көдлмшән эклв.
Иигәд хулһн сарин 2-ас авн 7 күртл Хальмг театрин тәәз деер талдан регионмудын театрмуд ирҗ, нааддан үзүлҗәнә. Хальмг Таңһчин сойлын болн зуульчллһна министерствин болн театрин үүлдәчнрин Әрәсән Ниицәнә Хальмг әңгин дөңгәр театрмудын региональн наадм бүрдәгдв.
«МанджиевФЕСТ» гидг регионмуд хоорндк наадм хойрдгч кемдән театрмудыг цуглулҗана. Наадмин йовудт хальмг режиссер Манҗин Борис белдҗ тәвсн наадд үзүлгдҗәнә. Әрәсән кесг театрмудла нөкцҗ үүлдәд, режиссер Манҗин Борис тенд белдҗ тәвсн наадд ода Хальмг театрин тәәз деер үзүлгдҗ, таңһчин хәләһәчнрин оньгиг эзлҗәнә. Долан хонгин туршарт театрт ирҗ, олн хәләһәчнр хальмг режиссер талдан театрмудт тәвсн нааддынь хәләҗәнә. Наад тәвсн театр болһнд Манҗин Борис мел тер келн-улсин тууҗд, сойлд, авъясмудт нерәдсн наадд тәвдгнь йирин йовдл мөн. Иигәд хальмг режиссерин үүдәгч үүлдврин дөңгәр таңһчин әмтн талдан келн-улсин сойлла, театрин үүлдврлә таньлдҗ чадҗана.
Хулһн сарин 2-т «Прощание с Матёрой» гидг наадн үзүлгдв. Горномарийск драмин театрт Манҗин Борис Валентин Распутинә түүкәр наад тәвсмн. Иҗл һол деер ГЭС тосхсна ашт Марий Эл Республикин кесг селәд уснд авгдад, уга болҗ одсна тускар нааднд келгдҗәнә. Тууль-түүкст келгддг метәр эн нааднд күн болһнд төрскн һазрнь, уңг-тохмнь йир үнтә болдг. Өвкнрин туск санлыг әрүнәр хадһллһн болн төрскн һазран медлһн ямр чинртә болҗахиг артистнрин дүрмүдәр медҗ чадсиг наад хәләсн әмтн темдглв.
Чувашин К. Ивановин нертә академическ драмин театр хулһн сарин 3-д наадан үзүлв. «Израненная судьба» гидг наадндан театрин коллектив Төрскән харсгч Алдр дәәнд орлцачнрин тускар келҗ өгчәнә. Нажиб Асанбаевин наадар тәвгдсн үүдәврт дәәнә күчр-күнд бәәдлиг давҗ һарсн ветеранмуд иргчин туск ямр ухалврта бәәхиг үзүлҗәнә. Үнн-чик бәәдлин туск тоолвр, кесг улсиг харсч авсн әмтиг үүмүлҗәдг нань чигн төрмүдиг режиссер болн артистнр әмтнә санлын дөңгәр медүлҗәнә.
Дарук өдрмүдтнь Чувашин уйн наста хәләһәчнрин М. Сеспелин нертә театр «Сын нового дня» наадыг үзүлхмн. Чувашин наадһасин театр «Король Лир» гидг наадыг авч ирв. Хулһн сарин 3-д болн 4-д У. Шекспирин «Король Лир» наадыг Хальмг театрт хәләҗ болхмн.
«Эрьзя. Летящий к свету» гидг Мордовск Келн-улсин драмин театрин наадн чигн әмтнә оньгиг эзлхмн. Оренбургас М. Файзин нертә маңһд драмин театр «Фальстаф» гидг наадыг хәләһәчнрин оньгт тусхахмн.
Наадмиг тосч авч давулҗадг Басңга Баатрин нертә Келн-улсин театр «Белой дороги!» гидг наадан үзүлхмн.
Эн керг-үүлдврин йовудт үүдәгч харһлтс бас болхмн. Наадн болһна хөөн театрин шалһачнр шинҗллтәрн хувалцҗ, тоолвран медүлхмн. Наадмин тускар дарани тойгудт чигн келгдхмн.
Таңһчин хәләһәчнрт талдан регионмудын театрмудын нааддыг гертән хәләх сән таал учрҗана.
ҖИРҺЛИН Кермн