Сурһулин театрин үүлдвриг делгрүлхәр

Күүкд хальмг келән мартҗана гиҗ бидн ода келнәвидн. Тер төриг хаһлхин төлә кесг эв-арһ бәәнә. Тер тоод сурһулин театр мөн. Бичкдүд болн арвтнр нааднд хальмгар келәд, келән ясрулҗ, шин үгмүд дасад, төрскн келәр күүнднә. Тиим эв-арһиг сурһульмудт өргнәр олзлҗ болҗана, орс болн талдан келн-улсин кел түүнә дөңгәр дасч болҗана гиҗ Әрәсән гегән-герлин Министерств чигн селвг өгчәнә.

Болв ода деерән хальмг сурһульчнр театрин билг-эрдмәр икәр соньмсхш. Хальмг келнә багшнр эврән сурһулин бәәдл-җирһләр ахр наадд бичәд, сурһульчнран театрин үүлдврт орлцулҗ чадхмн билә. Болв тиим седвәр бас уга, соньн төрәр ахр наад бичәд, сурһульчнран урмдулҗ болхмн билә.
Яһад гихлә ода кесг келн-улсин сурһульчнр олн марһаст хальмг бичәчнрин шүлгүд чееҗәр умшна, төрскн келән меддгән үзүлнә. Түүнлә дегц эдн ахр наадд үзүлсн болхла төрскн кел даслһнд тернь хойр дам туста болх бәәсмн.
Москвад һаха сарин эклцәр сурһульмудын театрин ик хург болв, тенд бас бичкдүдиг орлцуллһна тускар күүндвр болснь лавта. Тиигәрән Элстин лицейин болн К.Д.Убушиеван нертә Баһ Дөрвдә селәнә сурһулин элчнр йовла. Түүнд цуг Әрәсән регионмудас 178 күн орлцв. Элстин лицейин болн Баһ Дөрвдә сурһулин театрин коллективс Төрскән харсгч Алдр дәәнд нерәдсн наадд тәвҗ, таңһчин марһанд нүүрләчнрин тоод орла.
-Театрин хург нанд икәр таасгдв, эврә дамшлтын тускар келсн деерән талдан регионмудын театрмудын үүлдврлә, тер салврин шин эв-арһла тодрхаһар таньлдлавидн, – гиҗ Баһ Дөрвдә сурһулин һардачин селвгч Софья Сапиева келнә. - «Орленок» лагерьт тәвсн наадыг мана театрт тәвх селвг маднд өглә. Терүнд арвтнр зуни цагла ээҗ талан амрхар ирәд, селәнә хуучн герт кезәңк бичгүд олҗ авч. Теднә элнцг эцкнр, ээҗнр дәәнә цагин тускар терүнд бичҗ, җирһлднь учрсн йовдларн хувалцҗасмн. Тер цага йовдлд арвтнр бас орлцсмн, дәәнә йирин әмдрл, үүрмүдән, элгн-садан геесн кесг йовдл теднд өөрхн болсмн. Мана күүкд тер амр биш даалһвриг яһҗ күцәхинь наадар дамҗад медхвидн.
Болв хальмг келәр бичсн наадн уга болҗана. Сурһулин бәәдл-җирһлд учрдг нег йовдл авад, түүнә ул деер ахр наад тәвҗ болҗана, эн туст хальмг келнә багшнр нөкд болҗ чадхмн. Тиим керг-үүлдвр багшнрт чигн, сурһульчнрт чигн туста болхмн, зуг кергән эклх кергтә, тиигхлә цугнь бүтх гиҗ сангдна.
Элстин лицейд бас сурһульчнрин театр бәәнә, эдн хургудт билг-эрдмән үзүлнә, йоста артистнр болҗ әмтнә седклинь авлна. Театрин һардач Ирина Горяшкиеван келсәр, эдн бас нурһлҗдан орс келәр Чеховин болн нань чигн бичәчнрин наадд тәвнә. Лицейин өөнд нерәдҗ, эдн алдр шүлгч Александр Пушкин хальмг һазрт ирсн йовдлар бас наад тәвхәр седҗәнә. Пушкин хальмг келәр келсн болхла, айта сәәхн юмн болх билә.
Элстд ирсн зуульчнр хальмг кел соңсхар, хальмг авъясин, тууҗин тускар юм медхәр седнә, эн саамд сурһулин театрмуд хальмг келәр ахр наадд тәвәд, тер седклинь хаңһаҗ чадх билә. Орс наадд эдн талдан кесг регионд үзх, сенр-соньн хальмг наадн эднд таасгдна, болв мана таңһчд тернь ховр болҗана. Хальмг келнә багшнр эн туст седвәр татад, ахр наад үүдәҗ, түүнд сурһульчнран орлцулҗ, төрскн келнә медрлинь чигн батрулҗ, ирсн улст соньн хальмг наад үзүлҗ чадҗана. Ямаран чигн театрин марһанд тиим наадн өөдәнәр үнлгдхнь лавта, зуг седклән өгх кергтә.
Эклц классмудас болн бичкдүдин садас тер көдлмшиг эклх кергтә, тиигхлә эдн бичкнәсн авн бийән яһҗ бәрдгән дасх. Тиим авг-бәрц йирин бәәдл-җирһлд чигн туслхмн, зуг бичкдүдт урмд өгдг сурһмҗлач кергтә. Тиим улс мана таңһчин сурһульмудт баһ биш, зуг теднә седвәринь, күүкдиг хамцулдг билг-эрдминь өргнәр олзлх кергтә.
ТҮРВӘН Һуна