Билг-эрдмин хаалһд орулдг сурһуль

Чонкуша Петрин нер зүүҗәдг Элстин билг-эрдмин колледж 65 җилә өөнән темдглҗәнә. Хальмгин сойлын җирһлд ик тәвцән орулҗадг, улсин билг-эрдм делгрүллһнд, сойлын халхин мергҗлтнр белдлһнд эн сурһуль ик чинр зүүҗәнә. Энд билг-эрдмин медрл авсн, сойлын көдлмшин хаалһд орсн олн күн таңһчин болн орн-нутгин нертә дуучнр, биичнр, зурачнр, сойлын нань чигн халхин үүлдәчнр болҗ, эн сурһулин нериг өөдән өргҗ дуудулҗана.
Хулһн сарин 8-д Хальмг госфилармоньд олн улс цуглрҗ ирв. Энд билг-эрдмин Хальмг колледж 65 җилә өөнән темдглв. Эн җилмүдин туршарт сурһулиг төгсәсн олн күн эндрк багшнрла болн сурһульчнрла байран хувалцхар ирсмн. Хамдан сурч йовсн үүрмүдтәһән харһхар, җирһлин хаалһд орулҗ, эрдм дасхсн багшнртан ханлтан өргхәр нааран темцсн әмтн филармоня бәәриг дүүргв. Колледжин тууҗин болн энд көдлҗ йовсн, сурһуль сурч йовсн баһчудыг, теднә сурһулин йовудыг үзүлсн видеозургудыг әмтн соньмсч хәләв. Таньдг чирә үзәд, давсн цаган сергәв. Оютнрин хореографическ үүдәврәр байрин нәр эклв. Колледжин тууҗин һол девсңгүдиг тедн тодрхаһар үзүлҗ чадв.
Хальмг Таңһчин билг-эрдмин ачта үүлдәч Настинә Мергнә һардврт Шаңһа симфоническ оркестр татсн көгҗм байрин үүлдврт немр сергмҗ үүдәв. Симфоническ оркестриг дахч, «Розовая пантера» гидг үүдәвриг колледжин оютн Котина Дмитрий наадв.
Родион Щедринә үүдәвриг Әәдрхнә консерваторь төгсәсн Манҗин Александр билгтә кевәр күцәсинь әмтн таасч тосв. Хальмг Таңһчин ачта артистк Спивак Наталья хуур татҗ, Хальмг Таңһчин сойлын ачта көдләч Дорҗин Ноһала пианино цокч наадсн хамцу көгҗмиг олн хәләһәчнрт нерәдв. Мөрн хуур татсн ансамблин моңһл көгҗмчин үүдәвр цуглрсн улст бас таасгдв.
Хальмг Таңһчин Улсин Хуралын депутатнрин нерн деерәс колледжин коллективиг депутат, Төрскән харсачнрин саңгин һардач Хаалһин Очр йөрәв. Хальмг Таңһчин Улсин Хуралын Ахлач Артем Михайловин йөрәлин бичгиг эн олнд соңсхад умшв.
Хальмг Таңһчин сойлын болн зуульчллһна министрин дарук Санҗрһа Герман колледжин коллективиг өөнләнь йөрәв. Эднә күцәҗәх чинртә көдлмшиг темдгләд, Герман Эрдниевич сойлын җирһлд ик тәвцән орулҗадг таңһчин үүдәгч коллективсиг толһалҗ йовдг Очкан Анна, Катан Савр, Настина Мергн болн эн сурһулиг цагтан төгсәсн билгтнр таңһчин бахмҗ болҗахинь заав. Таңһчан шинәс босхч авчасн амр биш цагт көгҗмин иим сурһуль секлһн ик чинртә болн хол үүлдвртә шиидвр бәәсмн. Ода таңһчин сойлын бүрдәцсәр болн үүдәгч коллективсәр көдлҗәдг әмтнә ик зунь Чонкуша Петрин нертә колледж төгсәсмн. Эн җилин бар сард Хальмгин түрүн көгҗмч Чонкуша Петрин өөн темдглгдхмн. Билгтин нер зүүҗәдг сурһуль үүлдврән делгрүләд, цагин неквриг дахч шин эрдм даслһна әңгүд секч үүлдҗәхиг темдгләд, министрин дарук колледжин коллективд үүдәгч шин күцәмҗ дурдв. Эн сурһульд олн җил көдлҗ йовдг багшнр, көдләчнр өөнлә ирлцүлҗ, таңһчин сойлын министерствин Күндллһнә һашгудар ачлгдв. Кесг көдләчнрт министерствин Ханлтын бичгүд бәрүлҗ өггдв.
Хальмгин билг-эрдмин колледж ончта өөндән белдәд, кесг керг-үүлдвр, харһлтс, нань чигн тоот бүрдәһәд, энд сурч йовсн олн улсиг тодлҗахин тускар колледжин һардач, Хальмг Таңһчин ачта артистк Эрнҗәнә Лилия келв. Эндр колледжд сурчадг баһчуд өөнин ик концерт белдв. Дуучнр, биичнр, шүлг умшачнр, театрин үүлдврт орлцачнр, зурачнр - цугтан төрскн сурһульдан күндллһән медүлҗ, билг-эрдмән эн өөнд нерәдв.
Хальмг улсин сойлын зөөр яһҗ хадһлгдҗахиг эндрк оютнр билг-эрдмнь үзүлҗәнә. Өвкнрин сойлын зөөриг әрүнәр хадһлад, цааранднь делгрүләд, күцсн күцәмҗән баһ наста көгҗмчнр, дуучнр, биичнр, артистнр өөнин концертд орулв.
Концерт угтҗ зурачнрин әңгин оютнрин һәәхүл бүрдәгдв. Оютнрин зурсн өңгтә зургудыг әмтн соньмсч хәләв. Урн һарин эрдмин әңгин оютнрин олн кегдлмүд чигн нааран ирсн улсиг соньмсулв. Күүкд улсин кеерүл болдг тоот болн модыг зорҗ кесн ааһ-сав болн домбр күртлән, нань чигн кегдлмүд олна оньгт тусхагдв.
Өдгә цагт колледжд өдгә цагин индустрийин сурһулин әңг үүлддгин тускар колледжин һардач Эрнҗәнә Лилия келҗ өгв. Цагин некврлә ирлцәтә мергҗлтнр энд белдгднә. Өдгә цага ик концертс болн олн орлцата керг-үүлдврмүдиг теткх эрдмчнрт болн нань чигн мергҗлтнрт энд шин эв-арһсин медрл заагдна.
«Билг-эрдмин колледж: билг-эрдмд цергллһнә 65 җил» гидг нертә концерт болв. Байрин керг-үүлдврт таңһчин нертә коллективс, нер туурсн дуучнр болн көгҗмчнр орлцв.
Хальмг Таңһчин билг-эрдмин ачта үүлдәч Катан Саврин келсәр, колледжин байрин керг-үүлдврт орлцад, сойлын хаалһд орулсн сурһулин багшнрт үнн седклин ханлтан медүлв.
Энд олн җилмүдин туршарт багшнрин болн сурһмҗлачнрин гүн медрлтә болн өөдән мергҗлттә коллектив колледжд тогтв. Эдн оютнртан билг-эрдмин сән медрл өгсн деерән сойлын йоста көдләчнр болдг сурһмҗ күүкд-көвүдт өгсмн. Энд сурсн баһчудын ик зунь Әрәсән нер һарсн ик сурһульд сурч, цуг халхин белдвртә артистнр, дуучнр, көгҗмчнр, биичнр болн сойлын үүлдвр бүрдәһәчнр болҗ, олн зүсн халхсар көдлҗ йовна. Энд көдлҗәсн багшнрин цуцрлтан уга үүлдврин ашт кесг зун мергҗлт белдгдҗ, таңһчин сойлын җирһлд тәвцән орулҗ йовна.
Тер багшнрин тоод Хальмг Таңһчин сойлын ачта көдләч Дорҗин Ноһала билгтә олн баһчудыг эврәннь эрдмәр дасхад, сойлын үүлдврт орулсн билгт болҗана. «Мана сурһулин бүрдәцд түрүн җилмүдт талдан һазрас ирсн багшнр көдлҗәлә, - гиҗ Дорҗин Ноһала тодлна. – Ода болхла, колледжд мана багшнр белдсн оютнр төлҗәд, ик сурһуль сурад ирсн, билг-эрдмдән төлҗсн оютнр, ах үйин багшнрла зергдән билгтә баһчудт медрл өгч көдлҗәнә. Таңһчд үүлдҗәдг коллективсин ик зууһинь мана колледжиг төгсәсн үүлдәчнр һардҗана. Эдн колледжин хамгин ик бахмҗ болҗана».
Цуман Айта актерск билг-эрдмиг дасчана. Үүрмүдтәһән седвәртә эн күүкн бурхн-шаҗна нарт-делкән хургин үүлдврт орлцв. Бурхн Багшт болн эн номиг цәәлһҗ тархаҗадг үүлдәчнрт нерәдсн көгҗмин магталд орлцсан Айта тодлҗ авв. «Билг-эрдмин колледж мини төрскн гер болв. Өөнин байр энд сурч йовсн цуг билгтнриг болн эндрк оютнриг хамцулҗадг өргмҗтә үүлдвр болҗана», - гисн тоолврарн Айта хувалцв.
Үгин эклцд бидн өөнин концертын классическ әңгин тускар келвидн. Хальмг келн-улсин билг-эрдмиг цуг халхарнь үзүллһнд урднь эн сурһуль төгсәсн көгҗмчнр болн артистнр үзүлв. Келн-улсин оркестр Чонкуша Петрин болн Манҗин Аркадин үүдәврмүдиг соңсхв. Хальмг улсин артистк Очкан Анна, Хальмг Таңһчин ачта артист Һәрән Лиҗ әмтн дунд тааслт олсн дууһарн ик байр үүдәв. Колледжин баһ наста билгтнр чигн концертд орлцснь чинртә.
Иигәд Хальмгин сойлын җирһлд ик тәвцән орулҗадг Чонкуша Петрин нертә билг-эрдмин колледж тууҗан сергәҗ, багшнртан ханлтан медүдҗ, өдгә цага оютнрин билгиг үзүлҗ, 65 җилә өөнән темдглв. Энд билгтә олн баһчуд сән медрл болн ик мергҗлт авчахинь эн концерт медүлв.
ХӨӨЧИН Галина