Аһшин музейд зургудан белглв

Аһш балһснд Машковин нертә музейд хальмг зурач Шинян Николайин һәәхүл бүрдәгдсн билә. «Теегтән нерәдсн частр» гидг һәәхүлиг Аһш балһсна әмтн болн ирсн гиичнр соньмсч хәләсмн.
Хальмг Таңһчин болн цуг Әрәсән сойлын җирһлд зөвтә тәвцән орулҗадг нертә хальмг зурачин үүдәврмүд әмтнә соньмслт үүдәв. Әрәсән билг-эрдмин ачта үүлдәчин зургудын дөңгәр олн хәләһәчнр хальмг улсин бәәдл-җирһллә, улсин авъясмудла, сойлын зөөрлә таньлдҗ чадв.
Хальмгин болн Әрәсән ачта зурач Шинян Николайин үүдәврмүдиг әмтн сән меднә. Энүнә билгтә үүлдвр кесг мөрәһәр, тер тоод «Орс улсин билг-эрдм. XXI зун җил» гидг Келн-улсин мөрәһәр ачлгдсмн.
Олн һәәхүлмүдт орлцҗ, билгтә үүдәврмүдәрн нер һарсн зурач олна болн сойлын җирһлд шунҗ орлцҗ йовна. Хальмгин зурачнрин ниицә толһалҗ йовла. Хөөннь «Нүүдл улс» гидг зурачнрин негдлт бүрдәһәд, хальмг билг-эрдмиг орн-нутгин кесг һазрт үзүлсмн. «Шин зун җил» гидг делкән зурачнрин Академин гешүн болҗ, кесг керг-үүлдврт орлцҗ йовна. Билгтә үүдәврмүдәрн нер һарч, сойлын болн олна үүлдврәрн олн дунд күндллһ олсн төләдән Хальмг Таңһчин күндтә иргнә нер Шинян Николай зүүсмн.
Аһш балһснд болсн зурачин һәәхүл күцәмҗтә болв. Хальмг улсин тууҗиг, сойлын зөөриг, улсин авъясмудыг зурачин үүдәврмүдәр дамҗад медҗ авсн хәләһәчнр ханлтын үгән энүнд нерәдв. Хальмг Таңһчин күндтә иргн, зурач Шинян Николай һәәхүлиг бүрдәсн музейин көдләчнрт ханлтан медүләд, Машковин нертә музейд һурвн зурган белглв. Һәәхүлд үзүлгдсн зургуд: «Мини тег», «Баатрин туск поэм» болн «Сальк өрәд» үүдәврмүд ода музейин көрңгин тоод орв. Хоша бәәдг ик балһсна сойлын җирһлд зөвтә орман олсн нертә хальмг зурачин белг регионмуд хоорндк залһлданд дәкн нег ишкдлнь болв.

ҖИРҺЛИН Кермн