Хамцу үүлдврин бооца батлв

Шидр Хальмг Таңһчин Улсин Хуралын (Парламентин) Ахлач Артем Михайлов, энүнә дарукс Бадмин Вячеслав болн Нуура Николай Ар Осеть-Алания Республикин Парламентин 30 җилин өөнин керг-үүлдврт орлцв. Артем Васильевич Хальмг Таңһчин Толһач Хаска Батун нерн деерәс байрин хургт йөрәлин үг келҗ, депутатнрт күцәмҗтә үүлдвр болн цаһан хаалһ дурдв.

Хальмг Таңһч болн Ар Осеть-Алания Республик селәнә эдл-ахун, экономикин, йиртмҗ олзллһна халхар бат залһлда бәрҗ, хамцу үүлдҗәхиг Артем Михайлов темдглв. Өөнин керг-үүлдврмүдин йовудт хойр региона зака үүдәгч бүрдәцс нөкцлтин бооца батлв. Терүнд Хальмг Таңһчин Улсин Хуралын (Парламентин) Ахлач Артем Михайлов болн Ар Осетин Парламентин Ахлач Таймураз Тускаев һаран тәвв. Нөкцлтин туск бооцан регионмуд хоорндк залһлда батруллһнд, күцәмҗтә хамцу үүлдвр делгрүллһнд туслх гиҗ Артем Михайлов байрин хургт темдглв.
Хальмгин делегац талдан регионмудас ирсн гиичнрлә хамдан Владикавказ балһснд Туурмҗин бумблвд одад, мөңк һалд цецгүд тәвв. Артем Михайлов байрин керг-үүлдврт ирсн регионмудын зака үүдәгч хургудын һардачнрла болсн селвлцәнд орлцв.
БАТАН Сәәхлә