«Абилимпикс» марһан Москвад болв

Сегодня, 10:42 | Спорт, Таңһчин зәңгс, Зіњг

Одахн Москвад шалтгта улсин Цугәрәсән «Абилимпикс» марһан дөрвн өдрин эргцд болв. Түүнә йовудт сурһульчнр, оютнр болн көдлҗәдг мергҗлтнр орлцв. Марһаг Әрәсән гегән-герлин Министерств бүрдәв. Эрдмгтә болн шалтгта баһчуд эрдмән улм сәәнәр дасч автха, көдлмш олҗ автха гисн күсл марһан тәвҗәнә. Энүнд ут турштан шалтгта нег миңһн күн орлцв, эднд тавн зун волонтер дөң болҗав.

Ут турштан марһана 50 әңгәр орлцачнр эв-дован, хоршасн дамшлтан үзүлв. Һоллгч марһан «Тимирязев төвин» талвңд болв. Әрәсән 54 субъектәс ирсн зарһчнр баһчудын кесн көдлмшин чинринь йилһҗәв. Тер мет һурвн сара хонг урд, така сарин 24-29-д, СВО-д 79 орлцач дунд чигн марһан болв, эдн орн-нутгин Келн-улсин марһана 15 әңгәр эв-дован үзүлв, 38 мүҗиг болн таңһчиг элчлв.
Һазадын орна элчнр чигн эн марһана кергт орлцв, тер тоод Түрг, Китдин болн 14 талдан чигн орн-нутгин баһчуд энд марһлдв. Хальмг Таңһчиг Сарңга Савр элчлв. Мергҗлтнр дунд болсн таңһчин марһанд Савр Владимирович диилвр бәрлә. «2025 җилин «Абилимпикс» марһанд шүүҗ авлһна девсңд чигн өөдән аш бәрҗ шунлттаһар орлцҗ нүүрлгч орм эзлв. Тиигчкәд Савр Владимирович кесг дәкҗ марһанд орлцад, шатрин, армрестлингин, «бочча» дөрлдәнд нүүрлгч орм эзлҗ йовла», - гиҗ Саврт дөң болҗасн Хальмг Таңһчд «Абилимпикс» җисәг зүүцүлдг Батлан Гилән келв.
Марһана йовуд чинвртә болв, яһад гихлә кесг регионмудын элчнрлә дөрлдх саам учрв. Тиигсн бийнь Сарңга Савр сән белдврән үзүлв, кесг марһанд орлцҗ диилвр бәрхәр зүтклә, болв түүнә төлә шунлттаһар дөрлдх кергтә болв. Зуг талдан мүҗсин орлцачнрин эв-довнь болн мергҗлтнь деер бәәсмн, түүнәс көлтә Савр дииләчнрин тоод орҗ чадсн уга, тиим болв чигн Әрәсән марһанд орлцлһна халхар сән дамшлт хоршаҗ дарук дөрлдәнд улм сәәнәр белдх, таһчин талдан баһчудт сән үлгүр болх гиҗ дамшулачнрнь болн дөң болҗасн улснь келв.
- Марһана йовудт орлцачнр болн теднә делегацсин һардачнр, теднд дөң болҗасн улс олн зүсн төрәр болсн «төгрг ширән» сүүрмүдт орлцҗ, кесг шин тоот медҗ авв. Тер мет «Абилимпикс » төвин һардачнрин болн СПО-н көтлвриг күцәҗәдг багшнрин төлә сурһуль-эрдмин өдгә цагин төрәр сессьмүд бүрдәгдв, тенд бидн дамшлтарн хувалцҗ, талдан регионмудт ямаран көдлмш күцәҗәхинь медҗ аввидн, – гиҗ таңһчин сурһуль-эрдмин министерствин ах мергҗлт Кермн Муева келв.
Тер мет эрдм шүүҗ авлһна керг-үүлдвр сурһульчнрин болн оютнрин, эрдмән сольхар седҗәдг улсин төлә давулгдв. Әрәсән сурһуль-эрдмин Министерствин ул деер шин эрдмлә таньдуллһна керг күцәгдв, баһчуд олн зүсн кергсл яһҗ олзлдгинь медҗ авад, түрүн ишкдлән кев, гиҗ Кермн Викторовна цәәлһв.
Цуг делегацсин элчнрт марһанд болсн олн һәәхүлмүд чигн таасгдв. Эрдмгтә улсин төлә Әрәсәд һарһдг реабилитацин өдгә цагин кергсл үзүлв. Роботмуд олзллһна һәәхүл бас олна оньг авлв.
Москван музеймүдт болн сойлын талвңгудт кесг экскурсь болсна йовудт сәәнәр амрч болхмн билә. Спортын марһаст сурһульчнр болн баһчуд орлцв. Тиим кевәр эднд марһанд эв-дован сөрлһнә болн амрлһна төлә сән таал тогтагдв гиҗ келх кергтә. Сурһульчнрла хамдан ирсн багшнр бас шин олн тоот медҗ авв.

ТҮРВӘН Һуна

Видео