Лаганя сурһульчнр диилвр бәрв

Одахн Аһш балһснас байрта зәңг ирв. Энд болсн «Аһшин сувсн» гидг VI нарт-делкән наадмд Лагань балһсна 1-ч тойгта дунд сурһулин «Бичкн дүрмүд» гидг нертә театрт орлцачнр диилвр бәрв. «Театрин наадн» гидг әңгд эдн негдгч орм эзләд, негдгч девсңгин дипломар ачлгдв. «Онегин болн 9 «а» классин күүкд-көвүд» гидг наадыг уйн наста артистнр үзүлв. Эднә багш болн театрин һардач Сюкенә Татьянан һардврт сурһульчнр диивлр бәрв.

Шидр бидн Татьяна Васильевнала ирлцңгү төрәр күүндвидн.
– Би тууҗин багшв, театрин режиссерин эс гиҗ нам артистин сурһуль сурсн угав. Бичәчнрин нааднас, романас соньн нег юм шүүҗ авад, деернь талдан наадна өврмҗтә тоот немәд тиигәд шин наадн үүднә, – гиҗ Татьяна Васильевна тоолврарн хувалцв. – Евгений Онегинә туск наадыг туслң 9-ч классин төлә бичләв. Яһад гихлә эдн ода Пушкинә шүлгләд бичсн романиг дасчана, түүнә учр-утхинь сәәнәр медҗ автха гиһәд тер наад үүдәләв. Зәрмнь Пушкинә үүдәврин учр-утхинь меднә, наадкснь зуг кичәлдән багшин даалһвриг күцәхин төлә энүг дасна.
Тиим кевәр сурһульчнр бас багшан урмдулад, Татьяна Васильевнан нааддт орлцад, сул цаган тустаһар давулҗ сән сурһмҗ авна. Тиигҗ багш болн сурһульчнр шин керг күцәһәд хоорндан хәрлцәд бәәхлә соньн юмн үүднә.
Тиим хәрлцән сурһульчнрт таасгдна, тиигчкәд театрин наадар багш эдниг соньмсулҗ чадв, тернь амр биш бәәсмн. «Нааднд орсн үгиг мартсн болхла, эврә үгән орулад келтн, наадн тана эндрк бәәдл-җирһлин тускар герчлҗәнә, театр таднд хөөтндән таасгдад бәәх», - гиҗ Татьяна Васильевна сурһульчнран урмдулна.
Района болн таңһчин «Нарна толян» гидг театрин марһанд орлцсн кемд эн тоолвриг багшнь кесг дәкҗ тодлулҗасмн. Нааднд 9-ч классин сурһульчнр утх-зокъялын кичәлдән орад, Онегинә болн Татьянан бичгүд умшчана. Болв сәәнәр сурдг күүкиг мууһар сурдгнь наад бәрҗәнә. Тиигхлә багшнь терүг һазаран һарһдг болна. Нег класст Пушкинә үүдәврин һол дүрнь Татьяна суухинь көвүн үзнә. Онегинд бичг бичҗәнә, 19 зун җилин кезәңк мебель хораг кеерүлҗәнә.
Цааранднь Онегин Ленский хойр бәәр бәрлднә. Көвүн эдниг хөрхәр седнә, әәмшгтә юм һарһҗанат гиһәд зогсахар седнә. Наадн арвтнрт таасгдв. Шин наадна һол учр-утхнь сурһульчнрт медгдв, болв түүнә тускар ода хәләһәчнрт келҗ медүлх кергтә бәәсмн. Тер даалһвриг күцәһәд Лаганя 1-ч тойгта сурһулин 9-ч «а» классин артистнр наадан улм даавртаһар белдв.
«Тиигҗ мана театр үүлдврән эклв. Түрүләд района, дәкәд таңһчин марһанд диилвр бәрвидн. Цааранднь Аһшин нарт-делкән марһанд орлцхар шиидвидн. Мана наадна туск видеозурциг жюрид илгәләв», – гиҗ сурһулин театрин һардач келнә. Теднә наадыг таңһчин марһанд багшнрин мергҗлт өөдлүллһнә күрәлңгин көдләчнр үзәд Аһшин нарт-делкән наадмд орлцтн гиҗ селвгән өгв.
Аһшин цуг сән тоотыг Лаганя артистнр һәәхв. Лаганя района толһач Коган Юрийд артистнр болн театрин һардач ханлтан өргҗәнә. Элстүр болн Аһшур йовлһна кемд толһач ик дөңгән күргв.
Аһшин наадмд театрас нань циркин, көгҗмин зевсгин, бииһин студьс бас орлцв. 71 регионас сурһульчнрин коллективс ирв. Нам һазадын орнас уйн наста артистнр билг-эрдмән үзүлв. «Эдн наадна һол учр-утхинь медүлҗ чадх угай гиҗ би үүмҗәләв. Жюри чигн мини наадыг яһҗ үнлхмб, түүнә седвәриг дөңнхий угай гиҗ маһдлҗалав», - гиҗ Татьяна Васильевна тер кемд зөвәр үүмснә тускар келнә.
Болв сурһульчнр цугинь дигтә-даратаһар күцәв. Жюрид эднә наадн бас таасгдв. Тиигҗ эдн негдгч девсңгин дипломар ачлгдла. Аһшин нарт-делкән наадмин бүрдәһәч болн режиссер Татьяна Светлая эдниг йөрәв. Күүкдт медальмүд болн диплом бәрүлҗ өгв.
Эдн тиим кевәр нарт-делкән наадмд Хальмг Таңһчиг элчлв, 14-15-та арвтнр театрин илвтә үүлдврлә экләд таньлдҗана, 1-ч классас авн эдн хамдан сурчана.
Тер наадмд класс улм хамцв. Цугтан эдн ду дуулад, наад наадад, нег керг кеһәд үүрмүд болв. Элстд болн Аһшт болҗасн наадмин йовудт эдн бас нег-негән дөңнәд бәәлә. Тиигәд хамцу кевәр үүлдәд, эдн диилвр бәрлә.
«Бичкн дүрмүд» театрин һардач, режиссер болн түүрвәч ода бар сарин 28-д нерәдсн наад тәвхәр зуралҗана, тууврин келн-улсин зовлңгин тускар баһчудт тодлулхар седҗәнә. Урднь болхла Татьяна Васильевна «Нүүдлә» хальмг дууна кев-янзар наад тәвлә. Тенд баһ наста күүкн дурта көвүһән цергт үдшәҗәлә, болв зәңг-зә угаһар геедрсн салдсиг җирһлин туршарт күләв, зуг медәрәд ирчкәд дуран өгсн күүнлә шинәс харһна.
Бийиннь тускар чигн Татьяна Васильевна келҗ өгв: «Түрүләд юристин эрдм даслав, зуг хөөннь, багш болхар шиидләв. Тиигәд ода сурһульд көдлҗәнәв, дөрвн үртәв, юм уйхдан дуртав. Мини өвк экин «Зингер» машинк Сиврт цуг өрк-бүлиннь әминь аврв, әмтн юм уюлад, ормднь хот авч ирәд бәәҗ. Би ода бас күүкдтән юм уйнав.
Аһшин наадмд күцәмҗ бәрснлә Татьяна Васильевнаг болн түүнә сурһульчнриг йөрәҗәнәвидн. «Тер ончта күцәмҗ маднд бас урмд өгчәнә. 2-ч классин сурһульчнрла Татьяна Васильевна бас наад тәвнә, тедн бас йоста артистнр болхнь лавта», – гиҗ һардачин сурһульч Басңга Ия келнә.
Тиим кевәр театр Лаганя 1-ч тойгта сурһульд бат орм эзлҗәнә. Тер үлгүр йир сән, талдан сурһульмудт чигн театрин студий бүрдәҗ ахр наадд тәвҗ сурһульчнриг хамцулҗ, хальмг кел өргҗүлҗ, эврә келн-улсин авъясан делгрүлҗ үүлдхлә туста болхнь лавта.

ТҮРВӘН Һуна