Хальмгин билгтнр Москвад ончрв

«КТК – билгтә бичкдүдт» гидг нарт-делкән марһана гала - концертд Хальмгин билгтнр билг-эрдмән үзүлв. Марһаг ашлсн байрин ик концерт Москвад болв. Көк теңгсин бүрдәцин буйнч седклин көтлвр эн җил Алдр Диилврин 80 җилин өөнд нерәдгдв.

Москвад Горбуновин нертә сойлын герт байрин ик концерт олн улсиг цуглулв. Марһанд 7-ас авн 17 күртл наста бичкдүд болн баһчуд орлцв. Марһана региональн девсңд диилвр бәрсн коллективс болн онц билгтнр байрин концертд ирҗ орлцв. Хальмгин делегацин ханьд дөчн күн йовсмн.
Байрин эн концертд күндтә гиич болҗ Хальмг Таңһчин залврин ахлач Босхмҗин Гилән орлцв. Эврәннь йөрәлин үгдән Гилән Герасимовна «КТК - билгтә бичкдүдт» гидг көтлвр Элстд эклсиг ончлҗ темдглв. Ода хөрн тавн җилин туршарт кесг зун күүкд-көвүдт сойлын хаалһд орх таал тогтаҗана. Хальмгт ниигмин-сойлын делгрлтд зөвәр ик тәвцән орулҗадг КТК–Р бүрдәцин һардврт ханлтан медүлв. Таңһчин стратегическ нөкд болҗадг КТК-Р бичкдүдин билг-эрдм делгрүллһнд орлцдг деерән региона экологин төрмүд хаһллһнд килмҗән һарһҗахинь премьер-министр темдглв.
«Әрәсән Президент Владимир Путинә темдглсәр, бичкдүд мана нутгин хамгин үнтә зөөрнь болсн деерән терүнә иргчнь болҗана. «КТК – билгтә бичкдүдт» гидг көтлврт орлцҗадг цуг бичкдүдт болн баһчудт үүдәлтин хаалһар батар ишкҗ, үүдәгч седвәртәһәр үүлдҗ, төрскн һазрин нериг өргҗ йовтн», – гиҗ йөрәлин үгән Гилән Герасимовна ашлв.
Байрин ик концертд Элстин 18-ч тойгта дунд сурһулин «Вокалики» гидг коллектив орлцв. Эднә һардачнь Дорҗ-Һәрән Байрта мөн. Элстин лицейин «Лицей» гидг театральн студьд орлцачнр Ирина Горяшкиеван һардврт үзүлсн наадн марһана хәләһәчнрин оньг авлв.
Хальмг филармоня Манҗин Эмбан нертә «Герл» коллектив чигн билгән үзүлв. Үлгүр болгч нер зүүдг коллективиг Манҗин Александра һардна.
Хар Һазра района сойлын болн амрлһна Төвин «Цецг» бииһин ансамбльд орлцач Басана Сергей концертд орлцв. Багш Мухаран Светлана терүг марһанд белдсмн. «КТК – билгтә бичкдүдт» гидг көтлврин ашлгч байрин ик концерт «Москва үүрмүдән тосчана» нертә үүдәгч ик хургин дөрвн өдрә аһу ик үүлдвриг сәәхн кевәр ашлв. Эн өдрмүдин йовудт Хальмгин баахн артистнр мастер-классмудт орлцв. Хотл балһсна сурһулин ик бүрдәцсин багшнрла харһв. Москван нертә артистнрлә харһҗ, теднә сүв-селвг соңсх таал мана билгтә баһчудт учрв. Үүдәлтин байр белглдг төсвд орлцлһн күүкд-көвүдт мартгдшго йовдл болв.

ҖИРҺЛИН Кермн