Җиңнич, домбрм, җиңнич!

Сегодня, 11:25 | Общество, Таңһчин зәңгс, Зіњг, Сойл

Хальмгин көгҗмин һол темдг болгч домбр эн җил Роспатентин музейд орулгдсмн. Хальмг күн болһнд йир өөрхн көгҗмин зевсг тиигәд ончта орман олснь темдгтә йовдл болҗана.

Хальмгудтан хәәртә домбрин тускар тууль-түүкд келгднә, хойр чивхцтә харһа хальсн домбран цокад, айсинь дахч байрлад, хальмгуд уудьвран һарһҗасмн. Домбрин айс күңкнсн цагт эдн ик-бичкн уга цуглрҗ ирәд, төрскн көгҗмин дүүрәнд муурсан-зовсан мартад, ни бәәсмн. Тиигәд ик кезәнәс авн хальмгуд домбран һартан бәрҗ йовсмн. Домбрин айс угаһар ямаран чигн нәр давдго. Өрк-бүләрн цуглрв чигн, үүрмүдтәһән харһв чигн хальмгуд домбран цокад, байрарн хувалцҗ йовсмн.
Цагтан хальмг хотнд күүкд улс захасн домбр цокдг бәәснә тускар келгднә. Домбр цоклһарн нер һарсн күүкд улсиг нәр болһнд күндлҗ дууддг бәәсмн. Хотн болһнд эврә билгтә домбрч бәәснь ил. Хөөннь җирһл уралан девшәд, йосн сольгдад, билг-эрдм делгрәд, домбрчнрин кесгнь нертә артистнр болв.
Домбрин айс соңссн хальмг күн болһна зүркн бульглад оддгнь орта юмн. Җирһлин туршарт дахч, учрсн цуг йовдлмудынь айстан орулҗ батрулсн домбрин көгҗм хальмг улсасн төрүц салшго. Хальмг келн-улсин сойлын зөөр болҗ тууҗд орсн домбриг ода Роспатентын музейд үзҗ болхмн.
Эн музей меҗәһән өргҗүләд, шин олн тоотар немгдәд бәәнә. Әрәсән олн келн-улсин сойлын зөөрлә таньлдулҗадг көгҗмин зевсгүдәр болн нань чигн келн-улс болһна сойлын өвәрциг үзүлҗәдг тоотар немгдәд йовна.
Шидр эднә хураңһуд хальмг домбриг орулсмн. Хальмг улсин көгҗмин һол темдгнь болсн домбр талдан келн-улсин зевсгүд дунд эврә зөвтә орман олв. ВПТБ-н ФИПС-ин Төвин «Полисан» нертә номин-техническ компань домбриг эн музейд белглв.
Домбриг бәәрн эрдмчнр модн харһаһас кедгнь темдгтә. Ямаран моднас зорҗ кехинь тедн сән меднә. Көгнь җиңнәд бәәдг айста болхд туслдг модыг эвинь һарһҗ белдәд, урн һарта әмтн кесг үйин туршарт домбриг кеҗ йовна. Урчин эрдмиг ик зуудан көвүднь дасч авна. Ямаран моднас, ямаран цагла кеснь сән болхиг болн нань чигн нуувчинь тиигәд медҗ авна. Һазаһаснь хәләхлә эвтәкн зевсгәс еңсг сәәхн айс һарч, әмтнә седкл догдлулдгнь йир соньн гих кергтә. Домбриг дахч дуулсн кедү айс төрсн болх! Кедү олн күн домбрин айсиг дахҗ, седклән медлцҗ, өрк-бүлән өндәлһсн болх!
Домбрин тускар түрүн болҗ XV зун җилд бичгдсиг номтнр тодлна. Тууҗин халхаснь авад хәләвв чигн домбр улсин җирһлд ик чинр зүүҗәсинь медүлҗәнә. Хальмг домбр 2019 җиләс нааран теегин таңһчин сойлын болн көгҗмин йоста һол темдгнь болҗ тоолгдна. Олн-әмтн дундан чинртә көгҗмин зевсг иигәд орн-нутгин талдан улст чигн темдгтә болҗана. Хальмг артистнр һазр эргҗ йовхла, олн-зүсн марһаст болн хәләврт орлцхла домбрин айс даңгин эднә билг-эрдмиг сән кевәр үзүлхд туслҗ йовна.
Хальмгудтан хамгин хәәртәнь көгҗмин эн зевсг баатрлг дуулвр «Җаңһриг» хәәлсн цагт көгҗмин дахуль болҗ келврин учр-утхиг әмтнә седклд күргҗ медүлхд ик чинр зүүнә. Домбрин айс йириндән йир өврмҗтә кевәр соңсгдҗ, әмтиг сәәхн делкәд орулсн болна. Тиигәд домбрин айс хальмг сойлын байн зөөрин өвәрц нег темдгнь болҗ, Роспатентын музейд олн улст үзүлгдҗәнә. «Әрәсән регионмудын көгҗмин һол темдгүд» һәәхүлд хальмг домбр орсн бәәнә. Эн музейин көрңд 1400 көгҗмин зевсг бәәнә.
Тедн дунд 2025 җиләс нааран хальмг домбр зөвтә орман олв.
ХӨӨЧИН Галина

Видео