Сурһуль-эрдмин халхар бәрсн күцәмҗ

Давсн җилд сурһуль-эрдмин салврт баһ биш сән сольвр учрв. Багшнрин болн сурһульчнрин көдлмшин болн сурһуль сурлһна өдгә цагин таал тогтагдҗана. Таңһчин 47 сурһулин герт болн һурвн садт бат ясвр кегдсн бәәнә. Орсн мөрн җилд тер көдлмш цааранднь өргнәр күцәгдх, бас 20 сурһуль шинрүлгдн гиҗәнә.

Таңһчин Толһач Хаска Бату, залврин һардачнр, Улсин Хуралын (Парламентин) болн РМО-н депутатнр, райодын толһачнр эн кергт һол оньган өгнә. Тиим дөң тосхлтыг ахр болзгт болн сән чинртәһәр күцәх арһ өгчәнә. Тәвн эс гиҗ түүнәс үлү җилд ясвр кегдәд уга сурһульмуд болн давсн җиләс авн садмуд чигн шинрүлгдәд, мел одахн эдлврт орсн гер болҗ медгднә, тиим таалд сурхд чигн йир тааста болна гиҗ сурһульчнр кезә чигн келнә, ода эдн байрта-бахтаһар шин сурһульдан одна.
Ода сурһуль-эрдмин бүрдәцс сурһульчнрин физикин болн эсвин медрл батруллһнд һол оньган өгнә, тиим күслиг орн-нутгин һардвр тәвҗәнә. Яһад гихлә шин технологийин, тооһин эв-арһ улм өргнәр олзллһнд ик оньг өггдҗәнә. Түүнә төлә Хальмг ик сурһульд талдан кичәлин багшнрас физикин болн эсвин мергҗлтнриг шинәс белдхин төлә шишлң курсмуд үүлдҗәнә. Тиим кевәр күсдүндур җилин эргцд физикин багш эсв дасхдг зөв авна, химийин багш биолог болна.
Болв хамгин түрүнд райодын болн селәдин сурһульмудын даалһврар Хальмг ик сурһульд кесг кичәлин багшнриг белдлһнә төриг күцәх кергтә. Түүнә төлә сурһульмудт багшин классмуд бүрдәгдҗәнә, тер керг мергҗлтнриг өсклһнд дөң болх зөвтә гиҗ сангдна.
Билгтә, медрлтә сурһульчнриг өскхин төлә сурһулин, района, таңһчин марһас дөң болна. Тер җисәнд кесг зун сурһульч җил болһн орлцна. Таңһчин болн Әрәсән марһаст йилһрҗ эдн призермуд болна, нег үлү утх-зокъялын, англь келнә болн нань чигн кичәләр хальмг сурһульчнр йилһрнә. Тиим болв чигн Әрәсән кемҗәнд физикәр болн эсвәр призермудын тоод орхин төлә зүткх кергтә. Эн туст бәәх сән дамшлтыг улм өргнәр тархаҗ күцәмҗд күрхлә туста болх.
Төрскн кел дасхлһиг бас ясрулх кергтә. Таңһчин сурһульчнр Әрәсән олимпиадт орлцсн бийнь, тернь зуг цөөкн билгтә сурһульчнр болҗана. Ик зууһинь төрскн келәр сәәнәр белдхин төлә таал тогтах кергтә. Хальмг кел дасхлһна сән дамшлт Элстин багшин колледжд бәәнә, энд дамшлтта мергҗлтнр көдлҗәнә, теднә болн хальмг келнә нүүрлгч багшнрин дамшлтыг улм өргнәр тархах кергтә. Одахн шин җилин өмн өргнд таңһчд сән зәңг ирв. Кичгә Төлән нертә Хальмг келн-улсин гимназь төрскн кел дасхлһна болн келн-улсин этносойлынь хадһллһна шаңһа чинртә талвң болҗ хүврв. Тиим шиидвриг Әрәсән гегән-герлин Министерств батлв. Цуг орн-нутгар 72 субъектин 77 бүрдәц йилһҗ авгдв. Теднә тоод Хальмг келн-улсин гимназь орв. Ода дорас өсчәдг үйнрт этносойлын сурһмҗ өглһн – һол неквр болҗана, тиим кевәр өвкнрин цецн ухаг, эврә келн-улсин тууҗиг болн кел дасхлһнд ик оньг өгдднә.
Садмудын хальмг келнә багшнр болн келн-улсин багмудын сурһмҗлачнр эн туст сән үлгүр үзүлҗәнә. Тер тоод Элстин 20-ч тойгта сурһмҗлач Настан Виктория 2025 җилин Цугәрәсән марһанд дииләч болад таңһчин нериг туурулв. Тер мет давсн 2024 җилд хойрдгч ормиг Элстин 24-ч тойгта садын хальмг келнә багш Балакан Екатерина эзлв. Сурһульмудын багшнр эн туст бас сән үлгүр үзүлҗ Цугәрәсән марһана нүүрләчнрин тоод орна.
Шин җилд таңһчин багшнр күцәмҗән холвҗулҗ улм өөдән үзмҗд күрх гиҗ лавтаһар келҗ болҗана. Мана орн-нутгт һоллгч байр болҗадг шин җиллә цуг багшнриг болн садын сурһмҗлачнриг йөрәҗәнәвидн, өрк-бүлтәһән, элгн-садтаһан шин җилд амулң эдлҗ бәәтн гиҗ дурдҗанавидн. Хальмг багшнр дунд билгтә мергҗлтнр баһ биш, шин җилд чигн эдн мадниг өөдән күцәмҗәрн байрлулхнь лавта, цуг салврин көдләчнр чигн цаһан хаалһар йовҗ үүрмүдәсн үлгүр авч сән ашт күрч йовтха.

ТҮРВӘН Һуна