Төрскн һазртан туста болхин төлә

Сегодня, 14:57 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Туула сарин 12-т Элст балһснд «Хальмг Таңһч – чидл урһадг һазр» гидг керг-үүлдвр болв. Шин җилин амрлһна өдрмүд төгсәд, көдлмшч түрүн өдрлә таңһчин һардвр, депутатнр, райодын толһачнр, арһлачнр цуглрад, давсн җилин аш диглҗ, эн җил арһ-чидлән агсад, төрскн һазр-уснаннь делгрлтин төлә кех-күцәх көдлмшән зуралв. Хальмг Таңһчин Толһач Хаска Батун үрврәр Әрәсән Президентин медлд үүлддг РАНХиГС-ин шаңһа залврин ик сурһулин Төвин һардач Максим Паратунов таңһчд ирҗ, «Цифровая трансформация. Дизайн-мышление» гидг төрәр илдкл кев. Харһлтын эклцәр цуһар Сингапур орн-нутгин үлгүрәр эврә һазран делгрүллһнә туск фильм хәләһәд, терүнд босхгдсн төрәр ухан-тоолврарн хувалцҗ, өргн күүндвр тогтав.
- Давсн җилин чилгчәр бидн энд хамдан цуглрад, намрар мана таңһчд болсн шар-шаҗна нарт-делкән ик хург секлһнд нерәдгдсн фильм хәләсн биләвидн. Тегәд иим керг-үүлдврмүд сән авъяст тохрҗана. Хамгин түрүнд эн нарт-делкән керг-үүлдвр давуллһна чинрин тускар әмтнд цәәлһҗ өгх кергтә бәәсмн. Терүг бүрдәхин төлә аһу ик көдлмш кех кергтә болв, тер бийнь бидн арһ-чидлән агсад, хамдан ниитәһәр көдләд, ик хургиг өөдән кемҗәнд давулвидн. Мана таңһч өвәрц, үзмҗтә, тегәд эннь олн-әмтиг соньмсулҗана. Ода амр биш цаг болҗана, тер бийнь бидн өмнән тәвсн күслдән күрхәр зүткх зөвтәвидн. 2019 җилд таңһчин Толһачин үүлд орсн цагт би төрскн һазртан тусан күргхв гиҗ келләв. Болв би гисн негн, бидн гисн олн гиҗ келгддгәр, зуг хамдан бидн ямаран чигн төриг хаһлҗ чадхвидн. Мана таңһчд билгтә, седвәртә, арһта, төрскнч седклтә улс олн. Бидн мана нег һазра улсин неквриг күцәҗ, хамдан таңһчан делгрүлх зөвтәвидн. Ах үйин зөөриг хадһлад, иргчин туст дааврта болад үнн кевәр көдлх зөвтәвидн, энтн мана күчн, - гиҗ Бату Сергеевич келв.
Максим Паратунов керг-үүлдврт орлцачнрт кесг сурвр өгч, хамгин соньн төр босхсн улст дегтрмүд белглв. Шаңһа туслмҗ күрглһнә, таңһчин делгрлтин туст ямр халхар төрмүд эркн чинртә болҗахин тускар өггдсн сурврмудт цуһар хәрү өгч, күүндврт шунмһаһар орлцв. Таңһчин Толһач Хаска Бату күндтә гиичд ханлтан өргҗ, күцәгч йосна бүрдәцсин элчнрт эн җилин эркн чинртә төрмүдин туст даалһвр өгв. «Бидн сән гисн дамшлт олзлҗ, әмтнә төлә күцәмҗтәһәр көдлх зөвтәвидн. Тер төләд йосна бүрдәцсин, арһлачнрин, әмтнә сүв-селвгиг оньгтан авч шинҗлдг эв-арһ олзлх кергтә», - гиҗ Хаска Бату темдглв.
ДООҖАН Наталья

Видео