Мал эмнлһнә халхар мергҗлтнриг белдхәр

Сегодня, 15:28 | Общество, Таңһчин зәңгс, Зіњг, Сурєуль-эрдм

Орсн Мөрн җилин эклцәр Хальмг ик сурһульд ниигмин сүлҗәнә эв-арһар болсн күүндврин йовудт Хейлунцзян провинцин селәнә эдл-ахун эрдмин-техникин колледжлә бооцан батлгдв. Түүнә ашт малын эмчнриг белдлһнә хамцу сурһулин көтлвр иргчдән күцәгдх.
Хальмг ик сурһуль нарт-делкән кесг вузмудла болн сурһулин бүрдәцслә бооца батлҗ өргнәр нөкцлтҗәнә, Китдин колледжлә бас нарт-делкән кемҗәнд нөкцлтин үүлдвр күцәгдх.
«Мана ик сурһулин төлә энтн ик чинртә йовдл болҗана. Олн җилин эргцд кесг халхар нөкцлтх санатавидн. Нүүрлгч кесг эв-арһ олзлҗадг делкән мергҗлтнрин һардврт эрдмин медрлән гүүдүлхин, белдврән ясрулхин төлә сән таал тогтагдҗана. Тиим хамцу үүлдвриг бидн цааранднь чигн делгрүлхвидн, тиим кевәр бидн олн җилин туршарт болн сән аштаһар нөкцлтҗ хойр халхд туста үүлдвр күцәхвидн», - гиҗ Хальмг ик сурһулин һардач Салан Бадм келв.
Йирдән Хальмг ик сурһуль «Ик делгрлт авчах сурһуль-эрдмин экспорт» гидг Әрәсән шаңһа төсвд орлцҗана. Түүнә ашт һазадын орна вузмудла нөкцлт бүрдәлһнә байн дамшлт хоршасн болҗана. Эндр Хальмг ик сурһульд делкән 50 орн-нутгас 1100 оютн сурчана.
Тер ик кемҗәтә үүлдврин тускар хальмг һоллгч вузин һардачин дарук, нарт-делкән нөкцлтин төрәр үүлдҗәдг Конин Оксана цәәлһвр өгв.
- Өдгә цагт Китдин 15 вузла нөкцлтин бооцан батлгдла. 1999 җиләс авн бидн теднлә залһлдаһан батрулад бәәнәвидн. Давсн җилин үкр сарас авн мана вузин медлд үүлдҗәдг Конфуцийин күрәлңгин көдлмшин туск бооцан цааранднь үүлдх болв. Маднла хамдан Өвр Моңһлын ик сурһуль нөкцлтнә. Одахн болхла Хальмг ик сурһулин бәәдл-җирһлд ончта йовдл учрв: бидн Китдин Хейлунцзян провинцин селәнә эдл-ахун эрдмин-техникин колледжлә бооца батллавидн, - гиҗ Оксана Николаевна келв.
Түүнә цәәлһсәр, эн нөкцлтин таалд сурһуль-эрдмин кесг көтлвр күцәгдх. Тер тоод мал эмнлһнә мергҗлтнриг белдлһнә салврар дамшлтарн хувалцхмн. Эн туст Китдин вуз таасмҗта ик сурһуль болҗана, гиҗ һардачин дарук темдглв. Тернь Хальмг ик сурһулин номтнрин болн багшнрин төлә ик чинр зүүҗәсн болдг.
Хальмг һоллгч вузд малын эмчнриг белдлһнә ик дамшлт хоршагдсн бәәнә. Хальмг ик сурһулин ханьд орҗадг Башантан колледжин ул деер тиим үүлдвр 100 җилин туршарт күцәгдҗәнә. Тер мет һоллгч вузин багшнр болн номтнр олн җилин эргцд тиим көтлвр күцәҗ, өдгә цагин хамгин шин эв-арһсиг өргҗүлҗәнә. Мал эмнлһнә тиңкм чигн ик дамшлт хоршасн бәәнә. Эннь Хальмг ик сурһулин номтнрт нарт-делкән кемҗәнд һарх арһ учрав.
Ода нөкцлтин, бүрдәмҗин кесг төр хальмг вузин болн китд колледжин һардвр йилһҗ авчана. Тиим кевәр шин җилин эклцәр Хальмг ик сурһулин делегац нөкцлтин кесг төриг хаһлхин төлә Китд орн-нутгур йовхмн. Тенд сурһуль-эрдмин көтлвр күцәлһнә туск бооцанд һар тәвгдх, түүнә эклцнь чигн йилһҗ авгдх.
Тиим кевәр селәнә эдл-ахун, малын эмчнриг белдлһнә халхар нөкцлт сән йовуд авчана, цааранднь талдан салврар чигн хамцу үүлдвр өргҗәд йовх гиҗ иткҗ болхмн.
ТҮРВӘН Һуна

Видео