Таңһчин сурһульчнр марһлдх

24-01-2026, 13:01 | Общество, Таңһчин зәңгс, Зіњг, Сурєуль-эрдм

Җил болһн сурһульчнрин Цугәрәсән олимпиадын таңһчин девсң болна. Хамгин билгтә күүкдиг йилһҗ авлһнд, теднә белдвриг ясруллһнд, нүүрлгч багшнрин дамшлтыг тархалһнд эн керг-үүлдвр ик нилчән күргнә. Эн җил таңһчин девсң 12 января 2026 җилин туула сарин 12-т эклв. Олимпиадт орлцх зөвиг 4-11 классин 1003 сурһульч авв. Марһан 20 кичәләр болхмн, эн җил немш келәр күүкд медрлән сөрх, тер тоод Яшалтан района сурһульчнр сән медрл хоршасн бәәнә.

- 2025-2026 сурһулин җилин Цугәрәсән олимпиад батлсн зураһар күцәгдҗәнә. Орлцачнрин то 60-с үлү болхла, үлгүрнь орс келнә марһанд, тер керг-үүлдвриг Элстин сурһульмудар бүрдәнәвидн. Теднә тонь баһ болхла мана таңһчин билгтә күүкдин белдвринь өргҗүллһнә төвд зәрм кичәлин марһа кенәвидн, - гиҗ таңһчин төвин һардач Пуган Ирина келҗ өгв.
Ирина Боглаевна келсәр, эн җил тууҗин марһан хойр өдртән бүрдәгдв. Тер мет биологин марһан давсна хөөн дииләчнр болн призермуд йилһгдв. Җил болһн таңһчин марһана дииләчнр болн призермуд багшнрлаһан хамдан Цугәрәсән марһанд һарч йовна. Хальмг Таңһчас кедү сурһульчнр йовхинь шишлң тооһинь Әрәсән гегән -герлин министерств йилһҗ өгнә. Давсн җил эсвәр, физикәр болн нань чигн кичәләр таңһчин билгтә сурһульчнр һарч йовла. Олимпиад кичәләс иштә орн-нутгин кесг балһсар болна гиҗ төвин һардач темдглв.
Эн җил биологин олимпиадт райодын сурһульчнр өөдән аш бәрҗ йилһрв гиҗ онц темдглх кергтә. Тиим кевәр һанцхн хотл балһснд биш, райодт чигн гүн медрлтә, билгтә сурһульчнриг белдҗ болҗана, – гиҗ тер ашнь иткүлҗәнә.
Иигәд, дииләчин өөдән нериг биологийин таңһчин олимпиадт 11-ч классин сурһульчнр дунд Элстин 3-ч тойгта сурһулин элч Бадан Ольга зүүв. Хоршаҗ болх 285 баллас билгтә күүкн 149 баллд цуг даалһвриг күцәв. Тиим өөдән үзмҗд күрсн сурһульчнр Цугәрәсән олимпиадт чигн орлцҗ чадҗана. Хойрдгч ормд Баһ Дөрвдә гимназин элч Бембән Петр һарв (138 балл). Һурвдгч призернь Элстин техникин лицейин билгтә сурһульч Ямана Полина болв (134 балл). Тер мет райодын элчнрәс Яшалта селәнә дундын сурһулин ховр медрлтә арвт Көглтин Элина йилһрҗ 120,6 баллд даалһвран күцәһәд, нүүрлгч дөрвдгч орм эзлв.
Тер мет олимпиадын кичәлмүдин профильмүд өргҗүлгдв. Тер тоод «Күч-көлсн» (технологий) кичәлд «Герин сойл, дизайн болн технологий» гидг зөрүллт болн «Техник, технологий болн техникин үүдәлт»гидг салвр немгдв. «Информатикин» кичәлд – «Программировань», «Зәңгллһнә әәмшг уга бәәдл», «Робототехник» болн «Йосн биш ухан» гидг салврмуд орулгдв.
Эн җил «Зәңгллһнә әәмшг уга бәәдл» гидг салврт Элстин техникин лицейин, хотл балһсна 4-ч тойгта сурһулин болн олн салврта гимназин арвтнр медрлән сөрх. «Йосн биш ухан» кичәлин таңһчин марһанд Лаганя района Северный селәнә сурһулин элчнр орлцх. Тиим кевәр селәнә сурһульчнр чигн ард хоцрҗахш.
Эн кичәләр Элст балһсна муниципальн марһанд 3-ч тойгта сурһулин 11-ч классин билгтә арвт Бадмин Наяна 270 балл хоршаһад дииләчнь болв. Хамгин өөдән үзмҗнь 600 балл бәәсмн. Тиим болв чигн Наянан үзүлснь ашнь йир сән гиҗ келҗ болхмн. Иим үзмҗд күрсн сурһульч таңһчин болн Цугәрәсән марһанд орлцх зөв авчана. Хойрдгч ормд бас 3-ч тойгта сурһулин элч Бачан Даяна һарв. Һурвдгч ормиг Элстин лицейин төгсәһәч Цернә Айтана эзлв.
Англь келәр Элст балһсна болн райодын сурһульчнрин медрлнь йир сән. Таңһчин олмипиадт чигн эдн өөдән үзмҗд күрхнь лавта. Эднәс кесгнь таңһчин олимпиадын даалһвриг 100 процентд гилтә күцәнә, тер үзмҗ Әрәсән марһанд орлцх зөв өгчәнә. Тегәд орн-нутгин марһанд одхин төлә эднә хоорнд чаңһ мейәрклһн болхнь лавта. Талдан чигн кичәләр, хамгин түрүнд физикәр болн эсвәр тиим өөдән аш бәәсн болхла, хальмг сурһульчнрин нерн цуг орн-нутгт темдгтә болх бәәсмн. Болв ода деерән эн салврар медрлән гүүдүлх кергтә.
Таңһчин олимпиад цааранднь болад бәәнә. Цуг орлцачнрт бидн күцәмҗ дурдҗанавидн. Эдн хамгин икәр орс келнә, эсвин, биологийин болн физкультурин марһаст орлцна, талдан чигн кичәләр билгтә сурһульчнрин то немгдәд йовтха.

ТҮРВӘН Һуна

Видео