Эңкр теегин тускар

Н. Пальмовин нертә Келн-улсин музейд дарани һәәхүл секгдв. Тернь зурач Ванькан Валентинан түрүн ик һәәхүл болҗана. Туула сарин 23–д энд цуглрсн улс зурачин зургудла таньлдв.
Ванькан Валентина 1957 җилд Әәдрхнә мүҗин Енотаевск мүҗин Сероглазка селәнд һарсмн. Бичкнәсн авн юм зурхдан дурта билә. Тиигәд дуран өгсн кергнь җирһлин туршарт дахад йовв. 1961 җилд эднә өрк-бүл Хальмгт нүүҗ ирв. Төрскн һазртан ирсн Ванькаевихн таңһчин җирһлд орлцҗ, седкл таварн бәәв. Эн һазрин өвәрцнь, теегин бәәдл күүкнд йир таасгдв. Валентина 70-ч җилмүдт бичкн зурачнрин сурһульд сурдг болв. Василий Иванович Хахулинә һардврт күүкн зурлһна эрдм дасла.
Терүнә хөөн күүкн эрдмдән улм дамшхар Власовин нертә Әәдрхнә художественн училищд орҗ сурв. Зурлһна эрдмиг тиигәд арднь орҗ дасад, Валентина 1981 җилд эн сурһулиг төгсәв.
Җирһлиннь туршарт Валентина кесг көдлмш кеҗ йовв, талдан олн эрдм дасв. Таңһчин җирһлд зөвтә тәвцән орулҗ йовв. Болв зург зурлһн, үүдәгч эрдм энүг даңгин соньмсулдг билә. Бичкндән таассн эрдмән эн хайлго бәәв.
Зурачин һәәхүлд 23 зург үзүлгдҗәнә. Зургудын ик зууднь төрскн теегин бәәдл тодлгдснь әмтнә оньг авлна. «Иҗлин өндр эргд», «Үвләр Цаһан Амна өөрк паром» болн «Өр цәәлһн» гидг зургудыг әмтн кесгтән оньган өгч хәләнә.
Төрскн һазр, терүнә өвәрц йиртмҗ зурачиг урмдулҗахинь һәәхүл үзүлҗәнә.
ҖИРҺЛИН Кермн