Төрскн селәндән көдлҗәнә

Таңһчин эрүл-менд харлһна бүрдәцст эмчнр болн дунд медицинск көдләчнр эс күртҗәхнь чинртә төр болҗана. Эн төр хаһллһнд «Земск эмч/фельдшер» гидг шаңһа көтлвр сәәнәр туслҗана. Терүнә йовудт мана таңһчин селәдин эмнлһнә бүрдәцст эмчнр болн дунд зергин эмнлһнә көдләчнр көдлҗ, бәәрн улст чинртә дөң күргҗәнә. Нидн эн көтлврин йовудт 39 күн селәдин эмнлһст көдлдг болв.
Һурвн җил хооран Элст балһсна поликлиникд көдлҗәсн Насуна Евгения (зургт) шаңһа көтлврт орлцхар шиидәд, өрк-бүләрн төрскн селәнүр нүүҗ ирв. Целинн района Ик Чонс селәнд өсәд-боссн Евгения Валерьевна тиим шиидвр авсндан нег чигн дәкҗ хармсн уга. Энд энүг цуһар сәәнәр меднә, тегәд таньл-үзл улс дунд көдлхд тааста болн амр болна. Селәнә эмнлһнд тәвн шаху җилдән көдлҗәдг медицинск эгч Наталья Ман-Суновна Гакова баахн көдләчд нүдн-амн болҗ, сүв-селвгәрн дөң болна. Олн җилин туршарт төрскн селәндән көдлҗәдг төләдән эн көдлмшән даавртаһар күцәҗ, цугинь дигтә-даратаһар кеҗ, байн дамшлтарн Евгения Валерьевнала хувалцна.
- Би бичкнәсн авн эмч болхар сандг биләв, тегәд Т.Хахлынован нертә медицинск колледжд орад, тааста эрдмтә болв. Күч-көлснә хаалһан Элст балһсна поликлиникд экләд, тенд ах үүрмүдиннь хәләврт түрүн дамшлт хоршаҗ авсндан хамдан көдлҗәсн үүрмүдән бүләнәр тодлнав. Терапевтическ әңгиг эмч Нина Дмитриевна Чанчаева һарддг билә, терүнә чадмг һардврт төлҗләв. Хөөннь би Целинн района эмнлһнә терапевтическ әңгд көдлсн биләв. Тенд гемтә улст олн зүсн тәрлһ, эмнлһ кех кергтә бәәсмн, тегәд Арвһан Байрта болн Гангулин Саглр нанд ик дөң болснд ик ханллта бәәнәв. Нааран ирхиннь өмн би балһсна поликлиникин бачм дөң күрглһнә әңгд көдлдг биләв. Төрскн селәнә эмнлһнд фельдшер кергтә болҗахиг медәд, һурвн җил хооран нааран ирләв. Төрскн һазртан көдлх амр болв чигн ик дааврта болна, тегәд кергән тохнятаһар, үнн-чик седклтәһәр күцәхәр шуннав, – гиҗ Евгения Валерьевна келнә.
2021 җилд Ик Чонс селәнд «Эрүл-менд харлһн» гидг келн-улсин төсвин йовудт модульн фельдшерск пункт тосхв. Селәнә эмнлһнд ЭКГ-аппарат бәәнә, энд бәәрн улст цусна болн нань чигн шинҗллт кенә. Олн зүсн гемәс саглулхин төлә батлгдсн диг-дарала ирлцәтәһәр тәрлһ кенә. Евгения Валерьевнан келсәр, намрин кемд әмтнд гриппәс саглуллһна тәрлһ кенә, малчнр җил болһн цусан өгч, эрүл-мендин бәәдлән шинҗлнә. Давсн җилин моһа сард «Эрүл-менд бәәтн!» гидг керг-үүлдврин йовудт эмчнр нааран ирәд, селәнә әмтнд дөң күргв. Хуучта, гемтә-шалтгта улст эмчнр онц оньг тусхаҗ, эмнлһнә туст селвг өгв. Эн җил хаврар нааран мобильн маммограф болн флюорограф ирхмн гиҗ зуралгдҗана.
- Хойр долан хонгт мана тал Троицкое селәнәс эмч Цернә Гилән ирәд, әмтнә эрүл-мендин бәәдл шинҗлҗ, эмнлһнә туст сүв-селвгән өгнә. Бидн урдаснь селәнә әмтиг медүләд, кергтә шинҗллт кеҗ белднәвидн. Кемр эмчин дөң кергтә болхла, бидн Троицкое селәнүр тедниг йовулнавидн, Гилән Владимировна дарунь дөңгән күргнә. Ода селәнд һурвн зун һар күн бәәнә, тегәд бидн күн болһнд кезә ямаран шинҗллт кехинь диглҗ авнавидн. Бәәрн улс дунд хуучта, эрмдгтә улс бәәнә, тегәд теднд онц килмҗ тусхаҗ, дару-дарунь гертнь чигн однавидн. Наталья Ман-Суновна болхла бичкдүдин эрүл-менд харна, эднд кезә ямаран тәрлһ кехинь эн бүрткнә. Дәкәд диспансеризацд кен орхиг бидн чаңһ кевәр хәләҗ, саглуллһна кергт орлцхин туст әмтн дунд цәәлһврин көдлмш кенәвидн, – гиҗ селәнә фельдшер Насуна Евгения хувалцҗ келнә.
Һурвн җил хооран хотл балһснас төрскн селәнүр нүүх шиидвр авсн Насуна Евгенияг авальнь болн дөрвн үрнь дөңнснь энүнд ик урмд өгв. Нааран нүүҗ ирәд, эдн селәнд гер хулдҗ авв. Герин эзн эврә дөңцл эдл- аху бәрҗ, малан асрҗ өрк-бүлән теҗәнә. Ууһн Дамир зөв-йос харлһна бүрдәцд көдлҗәнә. Көвүнь гертә-малта болад, түрүн ач һарһад, эк-эцкән байрлулв. Алдр болн Валерия Ик Чонса дунд сурһульд сурчана, отхн Саша тавта, эн бичкдүдин садт орна. Евгения Валерьевна бичкнәсн авн эмчин эрдмин тускар санҗ йовсн төләдән ик сурһульд эс орсндан һундрна. Ор һанцхн Валерия күүкнь өсәд-босхларн эмчин эрдм шүүҗ авх чигн гиҗ экнь санаһан геехш. «Би сурһулян төгсәснә хөөн тааста эрдмәрн арвн хойр җилдән көдлҗәнәв. Төрскн селәндән ирҗ өрк-бүләрн бәәнәв, нег һазра улст дөң-тусан күргҗәнәв. Күн болһнд төрскн һазр чидл-омг өгдг, тегәд би шаңһа көтлврт орлцад, өсәд-боссн селәндән ирәд, энд торад үлдсндән ик байрта бәәнәв», – гиҗ Евгения Валерьевна темдглв.
ДООҖАН Наталья