Хаврт нерәдсн көгҗм

Хавр эн җил йир сәәхн болн соньн болх гиҗ Хальмгин Келн-улсин оркестрт тоолҗана. Нарт-делкәд нер туурсн көгҗмлә таңһчин соңсачнриг таньлдулхар оркестр моһа сард «Мировые хиты» гидг көтлвр белдҗәнә.

Көгҗмд дурта әмтнд өдгә цага классическ үүдәврмүдлә зергднь рок, поп болн көгҗмчнрин оньгт бәәдг нань чигн янзар үүдәгдсн тоотла таньлдх арһ учрҗана. Шин цагт әмтнә оньгт туссн болн олна тааслт олсн үүдәврмүдиг оркестр эднд наадҗ медүлхмн. Олн зүсн зевсгүдин көг орсн көгҗм концертд ирсн улст таасгдхнь маһд уга. Улсин зөөр болсн көгҗмәс нань эн делкәд талдан олн янзар көгҗм делгрҗәхинь үзҗ медҗ авхд, Хальмг Таңһчин билг-эрдмин ачта үүлдәч Катан Саврин һардврта коллектив эн хаврин көтлвртән әмтнә оньгт тусхахмн.
Келн-улсин оркестрла хамдан эн концертд Цевгә Төлән нертә дууна коллективин дуучнр болн көгҗмчнр бас орлцхмн.
Хаврин концерт өдгә цага көгҗмин олн зүсн янзла таньлдулҗ, сергмҗ үүдәх гиҗ Келн-улсин оркестрин һардач Катан Савр иткүлҗәнә.
ҖИРҺЛИН Кермн