Келн-улсин авъясан делгрүлхин төлә

Әрәсәд келн-улсин ниицлтин җил Хальмг Таңһчин райодар болн Элстд сурһулин бүрдәцст байрин керг-үүлдвр болҗана. Тиим кевәр сурһульчнр болн оютнр келн-улсин хоорндк иньгллтиг батруллһна, эврә келән, тууҗан, авъясан медҗ авлһна җисәнд орлцҗахан медүлҗәнә.
Лу сарин 6-д Әрәсән улсин ниицлтин җил секлһнә керг-үүлдвр Элстин политехникин колледжд болв. Энд олна бүрдәцсин элчнр, колледжин багшнр болн оютнр цуглрв. Таңһчин сурһуль-эрдмин болн номин министрин дарук Натра Антон эдниг йөрәҗ, министрин илгәсн бичг умшв. Мана таңһчин олна җисәнд улм өргнәр орлцҗ, келн-улсин хамцлтыг чаңһаҗ йовтн. Цуг келн-улс, регион болһн Әрәсән сойлыг байҗуллһнд тәвцән орулна, зууһад җилин туршарт хоршасн сойлын зөөр бахмҗ үүдәнә, орн-нутгин күчн чигн өсәд йовна, гиҗ йөрәлд келгдв.
Цааранднь колледжин «Хәдрис» ансамблин күүкд хадг татад биилв. Эн җил оютнр таңһчин олна керг-үүлдврт орлцҗ шаҗна ик хургт волонтермуд болҗ олар дөңгән күргв. Шунлтта үүлдвр күцәсн оютнриг баһчудын кергүдәр бәәдг Агентствин көдләч Ханҗин Андрей Ханлтын бичгәр ачлад, оютнриг болн багшнриг йөрәҗ, мана орн-нутгин хамцлтыг цааранднь батрулх кергтә, гиҗ келв. Кесг келн-улсин элчнр ода цергә шишлң керг-үүлдврт ээм-ээмән түшлдҗ, әмән әрвллго Төрскән харслһнд залу-зөргтәһәр орлцҗахиг эн темдглв.
«Иньгллт» гидг Келн-улсин хальмг герин һардач Шевкән Ревмира оютнрт «Темәнә урлдан» гидг наад белглв. Терүнә дөңгәр Хальмг Таңһчин һәәхмҗтә кесг һазрла, авъясла таньлдҗ болхмн. «Тадн цугтан Элстд сурчанат, Хальмг Таңһч таднд өөрхн һазр болв. Өдгә цагт мана таңһчд 100 һар келн-улсин элчнр бәәнә, эдн орн-нутгин делгрлтд чигн нилчән күргҗәнә, хоорндан ниитәһәр бәәнә. Эдн талдан келн-улсин сойл, кел, авъяс күндлнә, тернь мана хамцлтыг цааранднь батрулҗана»,- гиҗ Ревмира Борисовна келв.
-Тана колледжд билгтә оютнр сурна, «Хәдрис» ансамбльд орлцачнр биилнә, оютнр сәәхн ду дуулна, – гиҗ «Зурач» гидг төсвин бүрдәһәч, олна үүлдәч Инҗин Виктория темдглв. Эдн «Әрәсән келн-улсин ассамблей» гидг олна бүрдәцлә хамдан хальмг кел даслһна керг делгрүлхәр седҗәнә, тиим кевәр төрскн кел өргҗүллһнә төлә сән таал тогтахар бәәнә. Тер седвәриг колледжин оютнр дөңнх болҗ үгән өгв.
Керг-үүлдврин йовудт оютнр билг-эрдмән үзүлв. Орс оютнр хальмг ду дуулв, хальмг көвүн күүкн хойр «Лезгинка» би биилв.
- Иньгллт –мана күчн мөн. Элстин политехникин колледжд 14 келн-улсин элчнр сурна. Эдн цугтан хоорндан ах-дүүһинәр бәәҗ үүрлнә, багшнр теднд төрскнч сурһмҗ өгнә. Тиигҗ мана колледжин коллектив чигн келн-улсин иньгллтд нилчән күргҗәнә, - гиҗ эн сурһулин бүрдәцин һардач Васькинә Галина темдглв.
Одахн Москвад Келн-улсин «Әрәсә» төвд улсин хамцлтын җилин байрин ик хургиг Әрәсән Президент Владимир Путин секв. Энд тер мет «Медрл» ниицәнә гегән-герлин керг-үүлдвр болҗана. «Хальмг Таңһчин делегац тер керг-үүлдврт шунмһаһар орлцҗана. Мана «Медрл» ниицән Хальмг Таңһчд бас тиим керг-үүлдвр бүрдәхәр зуралҗана. Әрәсәд бәәдг келн-улсин тууҗин, авъясин тускар әмтн соньн кесг тоот медҗ авхмн.
Одахн намаг Хальмг Таңһчин Олна палатын гешүнд болн терүнә хүүвин ахлачд суңһв. Тер көдлмш бас келн-улсин хоорндк хәрлцәнлә залһлдата. Тиим кевәр мана ниицәнә үүлдвриг шунмһадулҗ таңһчд бәәдг келн-улсин тускар улм тодрхаһар келҗ, олна хамцлтд ик нилчән күргәд бәәхвидн», - гиҗ «Медрл» ниицәнә таңһчин әңгин ахлач Манҗин Элеонора бас тоолвран медүлв.
Тиигҗ олн улсин ниицлтин җил эклв. Тернь төрскн кел, авъяс, тууҗ хадһллһнд туста болхмн. Эн керг-үүлдврин чинрнь цаг ирвәс өсәд йовхнь лавта.
ТҮРВӘН Һуна