Седкүлчнриг ачлв

Шидр Хальмг Таңһчин Улсин Хуралын (Парламентин) Ахлач Артем Михайлов зака үүдәгч хургин үүлдврин тускар бичдг седкүлчнрлә харһад, эдн дунд 2025 җилд зарлгдсн марһана аш диглв.
- Таңһчин Улсин Хуралын депутатнрин үүлдврин тускар олнд зәңглҗ медүлх кергтә. Эн көдлмшиг таңһчин олнд зәңгллһнә эв-арһсин көдләчнр өөдән кемҗәнд күцәҗ, нег һазра улст таңһчин бәәдл-җирһлин тускар медүлнә. Тана көдлмшиг урмдулхин төлә бидн марһа давулх шиидвр авсн биләвидн. Марһанд таңһчин барин һарцсин, телеүзлин седкүлчнр орлцад, депутатнрин үүлдврин тускар белдсн соңсхврмудан болн зәңгсән жюрин оньгт тусхав. Эн марһан цааранднь маднла хамцу үүлдхд туслх гиҗ санҗанавидн, - гиҗ Артем Васильевич келв.
Седкүлчнрин көдлмшиг үнлхин төлә шишлң баг бүрдәгдв, таңһчин Улсин Хуралын (Парламентин) Ахлачин дарук Бадмин Вячеслав, депутат Мацга Татьяна, зака үүдәгч хургин көдләчнр, олна бүрдәцсин элчнр терүнд орлцсмн. Татьяна Сергеевна седкүлчнрин көдлмшиг өөдәнәр үнлҗ, селән һазрт бәәдг умшачнртаһан болн хәләһәчнртәһән харһҗ, таңһчин бәәдл-җирһлин тускар олнд медүлхиг дурдв.
«Калмыкия» зәңгллһнә бүрдәцин седкүлчнр Дооҗан Наталья болн Бембинә Данара нүүрлгч орм эзлснь бахмҗта болв.
БАТАН Сәәхлә