Төрскн келән делгрүлхин төлә

Сегодня, 14:04 | Общество, Таңһчин зәңгс, Зіњг, Сурєуль-эрдм

Эн җил Әрәсән келн-улсин ниицлтин җил гиҗ орн-нутгин Президент Владимир Путин зарлв. Түүнә йовудт мана эң-зах уга орн-нутгт бәәдг келн-улсин төлә төрскн келән хадһлхин, делгрүлхин болн өвк-эцкин авъясан сергәҗ тедниг өргҗүлхин төлә сән таал тогтагдҗана. Келн өвкнрин үлдәсн зөөр болсн деерән келн-улсин бахмҗ болҗасмн.
Иигәд СВО-н йовудт мана ах-дү бурят улс эврәһәрн хоорндан күүндәд даалһвр-заквр өгәд бәәхлә, теднә келсинь хортна салдсмуд медлго, кесг дәәчнрән гееһәд, хооран цухрсмн. Тедү дүңгә күчтә төрскн келн болҗана, түүнә күчинь бидн мартх зөв угавидн.
Өдгә цагин хальмг баһчуд төрскн келән хадһлхар, түүнә ул-сүүринь батрулхар седҗәнә. Тернь мел чик хәләц болҗана, яһад гихлә бидн эврә төрскн келән эс дөңнхлә, хаҗуһас мана төриг хаһлшго. Тиим седвәриг «Зурач» гидг төсвин һардач Инҗикә Виктория татад, «Хальмг келн - мини келн» гидг керг-үүлдвриг эдн эклҗәнә, терүг «Әрәсән келн-улсин ассамблей» гидг олна бүрдәцлә хамдан эдн күцәҗәнә.
- Ода Әрәсән келн-улсин ниицлтин җил болҗах кемд бидн төрскн келән делгрүлхд туслх зөвтәвидн,- гиҗ Виктория Геннадьевна күүндвриг эклв. – Тиим тодрха нег кергнь ширә деер нааддг «Темәнә урлдан» гидг наадн мөн. Түүнә дөңгәр бичкдүд эк-эцкнртәһән хамдан хальмг келән дасх, - гиҗ Инҗикә Виктория шин керг-үүлдврин учр-утхинь цәәлһв.
«Әрәсән келн улсин ассамблей» гидг олна бүрдәцин таңһчин әңгин ахлачин дарук Шевкән Ревмира эн харһлтд бас орлцв. Олна үүлдәч төрскн келнә төрмүдт ик оньган өгч, хальмг келәр бичкдүдин садмудын күүкдин төлә дегтрмүд, наадһас болн сурһулин дөңцлмүд барлҗ һарһна. Түүнә һарһсн дегтрмүдиг таңһчин сурһуль-эрдмин болн номин министерств садмудын сурһмҗлачнрт болн хальмг келнә багшнрт селвглнә. Эн халхар 20 җилин туршарт Ревмира Борисовна өргн үүлдвр күцәҗәнә, тер мет «Иньгллт» гидг келн-улсин «Хальмг гер» гидг олна бүрдәцин һардач болҗана.
- Ут турштан 30 дегтр болн нань чигн тоот барлҗ һарһлав, эннь хальмг лит, дууна хураңһус, тольмуд, наадд, хальмг келәр бичкдүдин төлә барллав. «Мини түрүн даслур» гидг дегтрм Әрәсән болн нарт-делкән электронн дегтрин саңд орла,- гиҗ Ревмира Борисовна келв.
«Темәнә урлдан» гидг наадыг өрк-бүлд, садт болн сурһульмудт олзлҗ болхмн, тиим наадн эндр өдр эрк биш кергтә болҗана. Темәнә нүүдл кеһәд мана таңһчин, райодын, аң-аһрусна болн нань чигн тоотын тускар кесг тоот медҗ болҗана. Наадн орс, хальмг болн англь келәр бичгдсмн гиҗ Шевкән Ревмира темдглв.
Тиигчкәд ода сурһульд эс гиҗ садт хальмг келнә зуг цөөкн кичәл болна, тегәд гертән цуглрад бичкдүд ах үйин улсла наадад медрлән гүүдүлх гисн иткл үүднә. Тиим соньн эв-арһ олзлад хальмг болн талдан чигн кел дасч болхмн. Үлгүрнь, Китдин Шинҗәнә өөрд улс наадар дамҗад орс кел дасна.
Тер мет мана күүндврт Элстин депутатнрин Хургин гешүн Соятин Бадм орлцв, депутат хальмг келнә халхар бүрдәгдсн олна керг-үүлдвриг дөңннә. Бичкдүд болн арвтнр хальмг домбр сәәнәр цоктха гиһәд «Домбра-08» гидг кружокд болн нань чигн бүрдәцст Бадм Владимирович 20 домбр белглв.
«Домбр - хальмг улсин кезәңк көгҗмин зевсг, олн зүсн айсиг наач болхмн, тернь олн улст икәр таасгдна. Эн зевсгиг бидн бичкдүд дунд тархах зөвтәвидн, тернь бас хальмг улсин авъясиг хадһллһнд туслх»,- гиҗ депутат келнә. Темдглхәс, «Темәнә урлдан» гидг наадыг одахн Элстин 8-ч тойгта садын баг болһнд эн белглв. Бас тиим наадыг 24-ч тойгта садын бичкдүд күләҗәнә, тиим кевәр эдн төрскн һазран улм сәәнәр медҗ, хальмг келән дасх гиҗ сангдна.
Ода «Зурач» төсв күцәлһнә йовудт эн наадыг Элстин садт белглҗәнә. Таңһчин Олна палатын коллектив, түүнә гешүн, олна үүлдәч болн арһлач Наталья Зинченко «Зурачин» төсвиг бас дөңнәд, эн наадыг белглх болв.
Тиим кевәр «Темәнә нүүдл» наадн төрскн кел даслһнд туслхнь лавта. Таңһчин болн райодын тускар гүн медрл өгх саната бәәхән түүрвәчнр медүлв. Ода электронн наад бүрдәхиг әмтн сурҗадг болна.
ТҮРВӘН Һуна

Видео