Хаврин байран хамдан тосв

Әрәсән Президентин зәрлгәр келн-улсин ниицлтин җил зарлгдв. Энүнәс иштә җилин йовудт орн-нутгт ирлцңгү керг-үүлдврмүд давулхар зуралгдҗана.

Одахн А.М.Амр-Санана нертә келн-улсин дегтрин саңгин көдләчнр ахнр-дүүнр болҗадг Тыван дегтрин саңгин көдләчнрлә хамдан видеозалһлдана эв-арһар соньн керг-үүлдвр давулв.
Долан хонг шаху хооран Әрәсән орн-нутгт бәәдг шар шаҗнд шүтдг сүзгтнр хаврин байран тосв. Тегәд Хальмгин Цаһан Сар болн Тыван Шагаа байрин тускар соньн күүндвр бүрдәгдв.
Тыва Республикин сойлын министерств ирлцңгү харһлт бүрдәх седвәр орулв. Манахс болхла тер дарунь гилтә зөвән өгсн болдг. Хальмгин сойлын болн зуульчллһна министрин дарук Санҗрһа Герман, таңһчин сойлын ачта көдләч, шүлгч Канкан Эрднь, Көтчнр селәнә билг-эрдмин бичкдүдин сурһулин һардач Шорван Феликс, А.М.Амр-Санана нертә дегтрин саңгин һардач Майя Безидеева терүнд орлцв.
Керг-үүлдврт орлцсн элчнр хаврин байран яһҗ тосч авлһна авъясан тодрхаһар цәәлһҗ келв. Цаһанла килгиннь ханцан бәрҗ мендләд, Шорван Феликс һартан келкә боорцгта гиичд ирв. Цаһан Сарин йөрәлән олн-әмтнд нерәдәд, хуучн ут ду дуулв.
Эрднь Потаевич болхла олн зүсн боорцгудын тускар цәәлһв. Целвг, тоһш, җола, темән, хуц, мошкмр, хорха болн талдан боорцгудын чинринь медүлв. Тер мет Окн Теңгрин туск домг болн өрүн чансн цәәһин йөрәл олнд соңсхв.
Улан зандн җомбаг яһҗ чандгин тускар дегтрин саңгин һардач Майя Безидеева келв. «Сар Герл» ансамбльд орлцачнр болн Цевгә Төлән нертә шаңһа хорин артист Бадҗан Бадм хальмг улсин сойлын зөөрлә таньлдулҗ билг-эрдмән үзүлв.
Тыва Республикин элчнр эврәннь Шагаа хаврин байрин йовудт ямр керг-үүлдврмүд болн авъясмуд күцәдгин тускар бас келв. Келн-улсин байрт ямаран сенр хот-хол белдәд эдлдгинь медүлцхәв.
Немхәс, нидн Элстд болсн шар шаҗна нарт-делкән ик хургт Тыва Республикин делегац ирҗ орлцсн билә. Энүнә тускар харһлтын йовудт бас тодлулгдв. Мана таңһчин сойлын бүрдәцс терүнә белдлһнд шунмһаһар орлцла. Эн җилин ноха сард Тывад ирлцңгү дөрвдгч хург давулгдхмн. Эн туст болхла мана таңһчин элчнр чинртә хург давуллһнд дамшлтарн хувалцхан медүлв.
Видеозалһлдана чилгчәр ахнр-дүүнр болҗадг республикүдин дегтрин саңгудын һардачнр Майя Безидеева болн Ирина Эртине мендән илгәҗ, цааранднь чигн нөкцлтин халхар олн зүсн харһлтс давулхар үгцв. Тиим кевәр нег-негнәсн хол бәәдг регионмудын элчнр ниигмәнә сүлҗәнә эв-арһар харһҗ, хамцу төсвс күцәҗ чадҗана, гиҗ Хальмгин сойлын болн зуульчллһна министрин дарук Санҗрһа Герман товчлв.

ОЛЬДАН Цаһан