Эрдмчнр марһлдв

Сегодня, 12:22 | Общество, Таңһчин зәңгс, Зіњг, Сурєуль-эрдм

Одахн Элстд «Эрдмчнр» гидг Цугәрәсән марһана таңһчин девсң төгсв. Элстин колледжмүдин болн Хальмг ик сурһулин талвңд эдн олн зүсн эрдмәр мергҗлтән үзүлҗ дөрлдв. Эднә эв-довинь дааврта жюрин гешүд үнлҗ оютнр болн сурһульчнр дундас хамгин белдвртәһинь шүүҗ авв.

Эн җил Хальмг ик сурһулин зурһан талвңд марһан бүрдәгдв, терүнд хальмг вузин медлд үүлддг колледжин болн нань чигн бүрдәцсин оютнр дөрлдв, тернь хамгин ик кемҗәтә марһан болв гиҗ келх кергтә. Хальмг ик сурһулин колледжин болн вузин медлд үүлддг Башантан Ф. Г. Поповин нертә колледжин оютнр «Эрдмчнр» марһана дииләчнрин тоод орсиг онц темдглх кергтә. Тиим кевәр «Мал эмнлһн» гидг әңгд Долгана Данил дииләчнь болв, хойрдгч ормиг Башантан колледжин элч Буктенә Ольга эзлв, һурвдгч ормд Хулхачин Бата һарв. Түүмрәс саглуллһна марһанд Артем Блинников дииләчин өөдән нер зүүв. «Залвриг бәрмт цаасар тетклһнә болн архивин керг» гидг әңгд һурвдгч ормиг Читрә Амуланга эзлв.
Тер мет Элстин политехникин колледжин оютнр кесг марһанд орлцҗ йилһрв. Тер тоод «Веб - технологии» әңгд түрүн ормиг Данил Попов эзлв. «Социальн көдлмш» әңгд Орука Ирина бас дииләчин нер зүүв. Һурвдгч ормд политехникин колледжин оютн Зарина Хакимова һарв. «Өдгә цагин хувцна технологий» гидг дөрлдәнд бас эднә элч Ванькан Заяна йилһрәд дииләч болв. 3-ч орм эзлсн Иляна Аксенова сән уячнрин тоод бас орв. «Виртуальн ил бәәдлиг ухалҗ тогталһна» марһанд политехникин колледжин уйн наста программист Цеднә Мазн хойрдгч ормд һарв. Түүмрәс саглуллһна әңгд Артем Бешимов хойрдгч орм эзлв. Әәмшг уга бәәдлин дөрлдәнд һурвдгч ормд Никита Савченко һарв. Ишкә кегдлмүд белдлһнд Сарңга Цаһан йилһрәд 3-ч орм эзлв.
- Иим ишкә эд-бод келһнә марһан ода цуг Әрәсәд делгрҗәнә, тиим марһаг би урднь Ар үзгин Осетьд үзләв, - гиҗ Элстин политехникин колледжин һардачин дарук Жанна Сильнеева келнә. - Мана колледжин улд тавн талвң көдлв, цуг тер көдлмшиг мана багшнр дигтә-даратаһар күцәв. Түрүн орм эзлсн Данил Поповин сурһмҗлачнь Хурдан Ольга белдврин темдгтә көдлмш күцәв. Мана оютнр колледжд гүн медрл авна. Одахн Москван политехникин ик сурһуляс маднд бичг ирв. Алексей Рыбаловиг белдснд вузин һардвр маднд ханлтан өргв. Әәрмәс бууҗ ирснә хөөн Алексей Москван политехникин шаңһа ик сурһульд орла, программист болхар седҗәнә.
Элстин хулд-гүүлгәнә-технологин колледжин оютнр бас таңһчин марһанд шунлттаһар орлцв. Тер тоод уйн наста замчнр дунд колледжин элч Анна Дерябина дииләчин өөдән нер зүүв. Кондитермүд дунд Петькин Полина бас түрүн ормд һарв, Кокан Элвг хойрдгч орм эзлв. Веб-технологийин марһанд эднә колледжин оютн Святослав Титаренко 2-ч ормд һарв. Финансистнр дунд болсн марһанд Виталий Сахипов дииләчин күндтә нер зүүв. Тер мет уйн наста арһлачнр дундас Екатерина Волохова таңһчин марһанд йилһрәд 3-ч ормд һарв.
- Тиим кевәр мана колледжин оютнр марһанд сән күцәмҗ бәрв гиҗ келҗ болҗана. Ут турштан колледжин 120 оютн болн таңһчин сурһульмудын 30 сурһульч марһанд орлцв. Колледжин оютнрин төлә 21 әңгд марһан болв, сурһульчнр 6 әңгд дөрлдв, - гиҗ хулд-гүүлгәнә колледжин һардачин дарук Көкән Светлана келв.
Таңһчин девсңгин дииләчнр мөрн сард шүүврин марһанд цааранднь орлцх, цуг регионмудын оютнрла көдлмшч кесг эрдмәр эдн дөрлдх. Аштнь эднәс Әрәсән ашлгч девсңд әңг болһнд 10-15 күн марһанд орлцх. Регионмуд хоорндк чинвртә марһанд күцәмҗ бәртхә гиҗ дурдҗанавидн, - гиҗ Светлана Николаевна тоолврарн хувалцв.
Марһана шинҗләчнрин тоолврар, оютнр эв-дован болн медрлән үзүлҗ мергҗлтән өөдлүлв.

ТҮРВӘН Һуна

Видео