Төрскән харсачнриг йөрәв

Сегодня, 12:55 | Общество, Таңһчин зәңгс, Зіњг, Сойл

Мана таңһчин улс нег һазра дәәчнрән дөңнхин төлә хот-хол, хувц-хунр, эм, олн зүсн кергсл болн талдан тоот цергә шишлң керг-үүлдвр давҗадг һазрур даңгин авч одна. Тер мет байрин өдрмүдлә ирлцүлҗ, таңһчин нертә артистнр тиигәрән бас одад, Төрскән харсачнриг йөрәнә.
Одахн Луганск Улсин Республикин Антрацитын района Боково-Платово селәнд Хальмгин делегац одад ирв. Цаһан Сарин, Масленица болн Төрскән харсачин сән Өдрлә дәәчнриг йөрәв. Бәәрн сойлын Герт «Бамб цецг» ансамблин, Цевгә Төлән нертә хорин болн Антрацитын района артистнр хамцу концерт бүрдәв.
Байрин концертын йовудт мана таңһчин делегациг ахлҗ одсн залврин ахлачин дарук Җамбинә Очр Хальмгин Толһач Хаска Батун даалһсар нег һазра хойр дәәчиг Делгә Эрднин медаляр ачлв.
– Кезәнәс авн мана өвкнр төрскн һазран харсад ончрад йовла. Эндр болхла аавнриннь үлгүрәр нег һазра дәәчнр бас Төрскән зөргтәһәр харсчана. Олна кергт тәвцән орулҗадг дәәчнрт ханлтан өргҗәнәв. Шулун диилвр делдҗ, цуһар гертән әмд-менд ирхиг күләҗәнәвидн, – гиҗ таңһчин Толһач Хаска Бату йөрәлин бичгтән темдглв.
Терүнәс нань Бату Сергеевич дәәчнрин өөрхн элгн-саднднь бас зүркни ханлтан медүлв. Дәәч болһна экнь, авальнь, үрднь өдр-сө уга бурхнд мөргәд, дотран зальврад, герин эзән күләҗәнә гив. Делегацин ханьд ирсн лам мөргүл давулв. Тер мет Элстин болн Хальмг епархин элчнр номта цаас өгүлв.
«Буран» дуудврта дәәч Хальмгин Толһач Хаска Батуд болн байрин керг-үүлдвр бүрдәсн нег һазра улстан ханлтан өргв.
– Мадниг цуг халхар даңгин дөңнәд, буйнч аца авч ирсн улсла улан чирәһәрн, уста нүдәрн үзлцснь гертән одсн болҗ медгднә, – гиҗ эн келв.
Тер өдр сойлын Герин шидр олн-әмтиг халун хальмг җомбаһар, боорцгар болн шимтә махар тоов.
Темдглхд, Хальмг Таңһчин болн ЛНР-ин Антрацитын района хоорнд нөкцлт цаарандан батрад йовна. ЖКХ-н болн тосхлтын багмуд даңгин тиигәрән одад, ирлцңгү дөңгән күргнә. Тер мет эрүл-менд харлһна, сурһуль-эрдмин көдләчнр бас өөрхнәр залһлдна. Спортын болн талдан олн зүсн хамцу керг-үүлдврмүд чигн бүрдәгднә.

КАРСАНА Евгения

Видео