Хотл балһсна элч диилвр бәрв

Сегодня, 12:56 | Общество, Таңһчин зәңгс, Зіњг, Сурєуль-эрдм

Давсн долан хонгин пүрвә өдрлә Элстд, олн салврта гимназин ул деер, «Хальмг Таңһчин дунд сурһулин 2026 җилин йилһән сән һардач» гидг марһан болв. Энүнд орлцсн 11 района болн Элстин элчнр марһлдв.
Теднә тоод таңһчин сурһульмудын тоомсрта һардачнр мергҗлтән үзүлв: Ик Буурла района Көвүд селәнә дунд сурһуляс Бамбша Эрднь, Яшкулин района Хар Толһа селәнә сурһуляс Басңга Савр, Лаганя района Улан Хоолас Васкеева Анна, Хар Һазра района Нарн Худгас Гадыша Антонина, Баһ Дөрвдәс Зинаида Караваева, Октябрьск района Восход селәнәс Копан Светлана, Целинн района Вознесеновка селәнәс Наталья Кравцова, Городовиковск балһсна олн салврта гимназяс Виктория Лайпанова, Элст балһсна Хальмг этносойлын гимназяс Лиҗин Елена, Сарпан района Кануково селәнә сурһуляс Манҗин Светлана, Үстин района Харбаһас Шургчин Марина болн Яшалтан района Яшалтаһас Любовь Энс мөн.
Эдниг марһан эклсн йовдлла таңһчин сурһуль-эрдмин болн номин министр Александр Ким йөрәҗ, һардач күн эврә коллективән уралан көтлҗ, багшнрла хамдан көдлмшән ясрулҗ, сурһуль болһна авъясиг, онц эв-арһиг делгрүлҗ йовна, түүнә даавр җил ирвәс өсәд йовна гиҗ темдгләд, марһанд күцәмҗ бәрҗ сурһулин нерән дуудултн гиҗ дурдв.
Тер мет Целинн района Овата селәнә дунд сурһулин һардач, 2025 җилин Хальмг Таңһчин ирлцңгү марһана дииләч Бодран Марина марһанд орлцачнриг йөрәснь бас темдгтә болв.
Эднә үүлдвринь болн мергҗлтинь жюри үнлҗәлә, таңһчин сурһуль-эрдмин министерствин элчнр, номтнр, багшнрин мергҗлт өөдлүллһнә күрәлңгин көдләчнр, профсоюзин үүлдәчнр болн сурһульмудын һардачнр терүнә ханьд орв. Тер тоод Аһшин шаңһа социальн-багшин ик сурһуляс ирсн күндтә гиичнр, олн җилдән сурһуль-эрдмин салврар шинҗллт кеҗәдг номтнр Денис Латышев болн Юрий Квинтюк жюрин гешүдлә хамдан орлцачнрт кесг сурвр өгч, теднә мергҗлтинь сөрҗ үзв.
Марһана түрүн девсңд орлцачнр сурһулин делгрлтин көтлвриг олнд соңсхад, теднә бүрдәцин өөрхн иргчин, күцәҗәдг төсвсин, керг-үүлдврин, сурһмҗин көдлмшин тускар тодрхаһар келҗ өгв. Бичкн селәдин сурһульмудт багшнр күртҗәхш, тегәд эдн хам-хоша бәәдг селәдәс багшнриг дуудҗ төрән хаһлна. Тиим болсн бийнь эдн шин эв-арһс олзлҗ сурһульчнртан бат медрл өгхәр шунна. Баһ кемҗәтә сурһульмуд селәдин әмтиг хамцулна, теднә җирһлин һол төвнь болна, хальмг кел хадһллһна сән таал энд бәәнә, терүгән эдн делгрүлхәр шунҗана. Нег үлү эндр өдр орн-нутгин болн таңһчин һардвр төрскн кел, сойл, тууҗ хадһллһна төрмүдт һол оньган өгчәх кемд тиим хәләц ик чинр зүүнә.
Городовиковск олн салврта гимназьд ЛНР-ин болн ДНР-ин сурһульмудла сән залһлда бәрнә, тер иньгллтән җил ирвәс делгрүләд йовна, Әрәсән келн-улсин ниицлтин җилин кемд тер дамшлт бас ик чинр зүүҗәхнь лавта.
Хойрдгч девсңд сурһульмудын һардачнр дамшлтарн хувалцҗ, эрдмчнрин кичәлмүд давулв. Теднлә хамдан ирсн дөңнлтин багмуд эднд нөкд болад бәәв.
Тиим кевәр түрүн девсңгин ашар тавн нүүрләч йилһгдв. Цааранднь эдн интервью өгәд, сурһулин иргчиг йилһҗ ямаран чик эв-арһ шүүҗ авдгин, өдгә цагин һардачин хәләц ямаран болдгин тускар эдн цәәлһв.
Дарук өдртнь Хальмг этносойлын гимназьд марһана дииләчнриг болн нүүрләчнриг ачллһна байрин керг-үүлдвр болв. Ончта нәр-нааднд Хальмг Таңһчин залврин Ахлачин дарук, таңһчин то-дигин делгрлтин министр Этән Алексей, таңһчин сурһуль-эрдмин болн номин министр Александр Ким болн таңһчин сурһуль-эрдмин көдләчнрин профсоюзин ахлач Эдән Цаһан орлцҗ сурһульмудын һардачнриг йөрәв.
Чинвртә марһана йовудт Хальмг этносойлын гимназин һардач Лиҗин Елена дииләчин өөдән нер зүүв. Хойрдгч ормд Городовиковск балһсна олна салврта гимназин һардач Виктория Лайпанова һарв. Хар Һазра района Нарн Худг селәнә сурһулин һардач Гадыша Антонина һурвдгч ормиг эзлв. Тер мет дөрвдгч ормд Яшкулин района Хар Толһа селәнә сурһулин һардач Басңга Савр һарв. Ик Буурла района Көвүд селәнә сурһулин һардач Бамбша Эрднь тавдгчнь болв.
Эн марһан таңһчин сурһуль-эрдмин җирһлин халхар ончта йовдлд хүврв. Чадмг һардачнриг эн негдүлв.
- Элстин багшин училищ, дәкәд Хальмг ик сурһуль төгсәҗ, багшин эрдмәр бат медрл авлав. Тер олн җилин дамшлтарн ода үүрмүдләрн хувалцҗанав. Мана Городовиковск районд кесг келн-улсин элчнр ээм-ээмән түшлдҗ ни-негн бәәнә, теднә иньгллтиг батрулхин, талдан регионмудын сурһульчнрла болн багшнрла нөкцлтән өргҗүлхин төлә мана гимназин коллектив баһ биш көдлмш күцәҗәнә. Дамшлтта мергҗлтнр тер кергиг һардҗана. Эн марһан нанд таасгдв, кесг үүрмүдән энд олҗ авлав, байн дамшлт хоршалав, – гиҗ марһана дииләчнрин тоод орсн Городовиковск балһсна олн салврта гимназин һардач Виктория Лайпанова тоолврарн хувалцв.

ТҮРВӘН Һуна

Видео